បច្ចេកវិទ្យា បានក្លាយជាផ្នែកមួយដែលមិនអាចខ្វះបាននៅក្នុងជីវិតរស់នៅប្រចាំថ្ងៃ​របស់មនុស្ស ។ ទន្ទឹមគ្នានេះ បច្ចេកវិទ្យា ក៏បានដើរតួនាទីយ៉ាងសំខាន់ក្នុងការអប់រំ ការទំនាក់ទំនង និងការផ្តល់ឱកាសការងារផងដែរ។

យ៉ាងណាមិញ ដោយសារតែបច្ចេកវិទ្យាកាន់តែរីកចម្រើនទៅមុខយ៉ាងឆាប់រហ័សក៏បានធ្វើឱ្យមនុស្សជាច្រើនពុំបានត្រៀមខ្លួន និងពុំអាចតាមទាន់ការវិវឌ្ឍន៍រហ័សនេះ ដែលជាហេតុបង្កឱ្យមាននូវបញ្ហាគម្លាតឌីជីថលនៅក្នុងសង្គម ។ ដើម្បីដោះស្រាយនូវបញ្ហានេះ ស្ថាប័នរដ្ឋ ឯកជន និងគ្រប់ភាគីពាក់ព័ន្ធទាំងអស់បានព្យាយាមធ្វើសកម្មភាពជាច្រើនក្នុងការកាត់បន្ថយបញ្ហាគម្លាតឌីជីថល ដើម្បីធានាបាននូវអត្ថប្រយោជន៍ជូនបុគ្គលសហគមន៍ និងសង្គមទាំងមូល។

បើតាមមជ្ឈមណ្ឌលកម្ពុជា ៤.០ ការកាត់បន្ថយគម្លាតឌីជីថលផ្តល់នូវអត្ថប្រយោជន៍សំខាន់ៗជាច្រើន រួមមាន៖

ទី១. ការទទួលបានព័ត៌មានស្មើៗគ្នា ៖ ការកាត់បន្ថយគម្លាតឌីជីថលអាចធានាបានថា មនុស្សគ្រប់គ្នាអាចមានសិទ្ធិទទួលបាន និងចូលប្រើប្រាស់ព័ត៌មានបានគ្រប់ប្រភេទដោយមិនមានការរើសអើងភេទ អាយុ ឬស្រទាប់វណ្ណៈនោះទេ។ ការណ៍នេះ អាចជួយឱ្យប្រជាពលរដ្ឋមានចំណេះដឹង និងធនធាន ដើម្បីកែលម្អជីវិតរបស់ពួកគេ និងធ្វើការសម្រេចចិត្តប្រកបដោយការយល់ដឹង។

ទី២. ពង្រឹងការអប់រំ ៖ ការចូលប្រើប្រាស់ធនធានឌីជីថល ដូចជា វគ្គសិក្សាតាមប្រព័ន្ធអ៊ីនធឺណិត, គេហទំព័រអប់រំ និងសៀវភៅអេឡិចត្រូនិក អាចបង្កើនឱកាសអប់រំសម្រាប់បុគ្គល ឬសិស្សានុសិស្សនៅក្នុងសហគមន៍ ដើម្បីពង្រឹងចំណេះដឹង ឬជំនាញផ្សេងៗក្រៅពីជំនាញគោលរបស់ពួកគេទៀតផង ដែលនេះអាចនាំឱ្យអត្រាអក្ខរកម្ម និងលទ្ធផលអប់រំកាន់តែប្រសើរឡើង។

ទី៣. ពង្រីកឱកាសសេដ្ឋកិច្ច ៖ នាពេលបច្ចុប្បន្ន ឱកាសការងារ គឺមិនមានការកំណត់តែក្នុងស្រុកទៀតនោះទេ ពោលយើងអាចស្វែងរកការងារបន្ថែមនៅក្រៅប្រទេសបាន។ ដូច្នេះ ការដែលអាចកាត់បន្ថយគម្លាតឌីជីថលនឹងអាចផ្ដល់ឱ្យប្រជាពលរដ្ឋនូវលទ្ធភាពទទួលបានឱកាសការងារតាមប្រព័ន្ធអ៊ីនធឺណិត, បង្កើនធនធានសហគ្រិន និងវេទិកាពាណិជ្ជកម្មអេឡិចត្រូនិកជាដើម ដែលទាំងនេះអាចជួយដល់ការពង្រឹងសេដ្ឋកិច្ចដោយបង្កើតមធ្យោបាយថ្មីសម្រាប់ការបង្កើតប្រាក់ចំណូល និងកាត់បន្ថយអត្រាគ្មានការងារធ្វើ។

ទី៤. សេវាថែទាំសុខភាព ៖ បច្ចេកវិទ្យាឌីជីថលអាចធ្វើឱ្យប្រសើរឡើងនូវការចូលប្រើសេវាថែទាំសុខភាពតាមរយៈថ្នាលថែទាំសុខភាព ឬ ពិគ្រោះជំងឺ, Telemedicine, ផតថលព័ត៌មានសុខភាព និងឧបករណ៍ត្រួតពិនិត្យពីចម្ងាយជាដើម។ ការកាត់បន្ថយគម្លាតឌីជីថលនឹងអាចធានាថា មនុស្សគ្រប់គ្នារួមទាំងប្រជាពលរដ្ឋដែលនៅតំបន់ដាច់ស្រយាល ឬជនបទអាចទទួលបានធនធាន និងសេវាថែទាំសុខភាពសំខាន់ៗយ៉ាងងាយ។

ទី៥. បរិយាបន្នសង្គម ៖ ការប្រើប្រាស់បច្ចេកវិទ្យាឌីជីថលអាចជំរុញបរិយាបន្នសង្គម (សំដៅលើទាំងអស់គ្នា) តាមរយៈការផ្តល់នូវវេទិកាសម្រាប់ការទំនាក់ទំនង ការសហការ និងការចូលរួមក្នុងសហគមន៍ជាដើម។ ការកាត់បន្ថយគម្លាតឌីជីថលនឹងជួយកាត់បន្ថយភាពឯកោរបស់បុគ្គលនៅក្នុងសង្គម និងផ្តល់នូវបទពិសោធន៍ថ្មីៗសម្រាប់ពួកគេផងដែរ។

ទី៦. សេវារដ្ឋាភិបាល ៖ បច្ចេកវិទ្យាឌីជីថលអាចជួយសម្រួលដល់ការចូលប្រើប្រាស់សេវារដ្ឋាភិបាលឱ្យបានកាន់តែងាយស្រួល ដែលសេវាទាំងនោះ រួមមាន ការស្នើសុំការអនុញ្ញាត ការបង់ពន្ធ និងការចូលប្រើប្រាស់កម្មវិធីសុខុមាលភាពសង្គមជាដើម ដែលនេះអាចសម្រួលដំណើរការរដ្ឋបាល និងធ្វើឱ្យសេវារបស់រដ្ឋាភិបាលកាន់តែមានប្រសិទ្ធភាព និងអាចប្រើប្រាស់បានសម្រាប់ប្រជាពលរដ្ឋទាំងអស់៕