និស្សិតអន្តរជាតិ ដែលមានទិដ្ឋាការសិក្សាត្រឹមត្រូវនៅប្រទេសនូវែលសេឡង់ នឹងត្រូវបានអនុញ្ញាតឱ្យធ្វើការបន្ថែម ៥ម៉ោងក្នុងមួយសប្ដាហ៍ ចាប់ពីខែវិច្ឆិកាឆ្នាំនេះ ដោយបង្កើនដែនកំណត់ប្រចាំសប្ដាហ៍ដល់ ២៥ម៉ោង អំឡុងពេលសិក្សា។

យោងតាមច្បាប់អន្តោប្រវេស៍នូវែលសេឡង់ (INZ) នឹងអនុវត្តចំពោះនិស្សិតអន្តរជាតិទាំងអស់ ដែលបានផ្ដល់ទិដ្ឋាការចាប់ពីថ្ងៃទី៣ ខែវិច្ឆិកា តទៅ។

និស្សិតដែលកាន់ទិដ្ឋាការចាស់ បច្ចុប្បន្នកំណត់ឱ្យធ្វើការត្រឹម ២០ម៉ោងក្នុងមួយសប្ដាហ៍ ត្រូវតែដាក់ពាក្យសុំផ្លាស់ប្ដូរលក្ខខណ្ឌទិដ្ឋាការ ឬស្នើសុំទិដ្ឋាការថ្មី ដើម្បីបង្កើនម៉ោងធ្វើការដល់ ២៥ម៉ោង ក្នុងមួយសប្ដាហ៍។ សម្រាប់ការផ្លាស់ប្ដូរនេះ ពួកគេក៏នឹងត្រូវបង់ថ្លៃអន្តោប្រវេសន៍ផងដែរ។

សម្រាប់សិស្សឆ្នាំទី១២ និងទី១៣ ដែលចង់ធ្វើការងារ ត្រូវមានការអនុញ្ញាតពីឪពុកម្ដាយ និងសាលារៀន ដែលពួកគេកំពុងសិក្សា ហើយពួកគេត្រូវធ្វើតាមម៉ោងកំណត់ ត្រឹម ២៥ម៉ោង ក្នុងមួយសប្ដាហ៍។

ការផ្លាស់ប្ដូរនេះ គឺជាផ្នែកមួយ នៃ «ផែនការអប់រំអន្តរជាតិឆ្ពោះទៅរកកំណើន» របស់ប្រទេសនូវែលសេឡង់ ដែលប្រកាសដោយរដ្ឋាភិបាលកាលពីថ្ងៃចន្ទសប្ដាហ៍នេះ។

ផែនការនេះមានគោលបំណងបង្កើនការរួមចំណែកសេដ្ឋកិច្ចប្រចាំឆ្នាំ នៃការអប់រំឧត្តមសិក្សាដល់ ៧,២ពាន់លានដុល្លារនូវែលសេឡង់ (៤,៣ពាន់លានដុល្លារអាមេរិក) ដោយបង្កើនការចុះឈ្មោះនិស្សិតអន្តរជាតិ ពី ៨៣,៧០០នាក់ កាលពីឆ្នាំមុន ដល់ ១១៩,០០០ នាក់នៅឆ្នាំ២០៣៤។

រដ្ឋមន្ត្រីក្រសួងអប់រំ Erica Stanford បានថ្លែងនៅក្នុងសេចក្តីថ្លែងការណ៍មួយថា ជាមួយនឹងការចុះឈ្មោះនិស្សិតអន្តរជាតិកើនឡើងជាលំដាប់ចាប់តាំងពីឆ្នាំ២០២៣ មក រដ្ឋាភិបាលចង់ជំរុញកំណើននេះ ឱ្យកាន់តែលឿនថែមទៀត, នេះបើយោងតាមសារព័ត៌មាន Reuters ។

លោកស្រីបានបន្ថែមថា ក្នុងរយៈពេលខ្លី ការអប់រំនូវែលសេឡង់នឹងផ្ដោតលើការផ្ដល់នូវតម្លៃអប់រំដែលសមរម្យ និងមានសក្តានុពលខ្ពស់បំផុតសម្រាប់ការអភិវឌ្ឍខ្លួន។

បច្ចុប្បន្នមានអ្នកកាន់ទិដ្ឋាការសិស្សចំនួន ៤០.៩៨៧នាក់ ដែលមានសិទ្ធិការងារ ក្នុងនោះទិដ្ឋាការចំនួន ២៩,៧៩០ នឹងផុតកំណត់ មុន ឬនៅថ្ងៃទី ៣១ ខែមីនា ឆ្នាំ២០២៦ ហើយ ១១,១៩៧ ទិដ្ឋាការនឹងផុតកំណត់បន្ទាប់ពីកាលបរិច្ឆេទនោះ។

បន្ថែមពីលើការបន្ថែមម៉ោងធ្វើការនូវែលសេឡង់ក៏កំពុងពង្រីកសិទ្ធិធ្វើការសម្រាប់និស្សិតសាកលវិទ្យាល័យទាំងអស់ដែលចូលរួមក្នុងកម្មវិធីផ្លាស់ប្តូរ ឬកម្មវិធីរយៈពេលខ្លី រួមទាំងវគ្គសិក្សាមួយឆមាសផងដែរ។ សិស្សដែលផ្លាស់ប្តូរសាលារៀន ឬវគ្គសិក្សាកម្រិតទាបនឹងត្រូវដាក់ពាក្យសុំទិដ្ឋាការសិក្សាថ្មី។

ចាប់តាំងពីខែតុលាឆ្នាំមុន តម្លៃសម្រាប់ទិដ្ឋាការសិក្សានូវែលហ្សេឡង់បានកើនឡើងដល់ ៧៥០ដុល្លារនូវែសេឡង់ កើនឡើងទ្វេដង ដែលកាលពីមុន មានតម្លៃ ៣៧៥ដុល្លារនូវែលសេឡង់។ តម្លៃទិដ្ឋាការសម្រាប់និស្សិតអន្តរជាតិ ដែលធ្វើការបន្ទាប់ពីបញ្ចប់ការសិក្សា ក៏បានកើនឡើងយ៉ាងខ្លាំងផងដែរ ពី ៧០០​ ដុល្លារនូវែលសេឡង់ ទៅ ១,៦៧០ដុល្លារនូវែលសេឡង់។

នូវែលសេឡង់បានធ្វើជាទីកន្លែងសិក្សា សម្រាប់និស្សិតអន្តរជាតិចំនួន ៧៤,៩៩០នាក់ សម្រាប់គ្រប់កម្រិតសិក្សាកាលពីឆ្នាំមុន ដែលធ្លាក់ចុះពីកម្រិតខ្ពស់បំផុត ១២៥,៤១០នាក់ ក្នុងឆ្នាំ២០១៦, នេះបើតាមក្រសួងអប់រំនូវែលសេឡង់៕