ការកំណត់ចំនួនបេក្ខជនចុះឈ្មោះចូលរៀននៅសាកលវិទ្យាល័យធំៗចំនួន ៥ របស់ប្រទេសហូឡង់ អាចធ្វើឱ្យប្រទេសនេះ ខាតបង់ទឹកប្រាក់រហូតដល់ ៥ពាន់លានអឺរ៉ូ (៥,៨ពាន់លានដុល្លារអាមេរិក) នៃផលិតផលក្នុងស្រុកសរុប (GDP), នេះបើយោងតាមការសិក្សាថ្មីមួយ។

ការសិក្សាដោយ SEO Economic Research ដែលជាវិទ្យាស្ថានស្រាវជ្រាវមួយក្នុងទីក្រុងអាំស្ទើរដាំ បានព្រមានថា ការកំណត់ចំនួននិស្សិតបរទេសនៅសាកលវិទ្យាល័យ Leiden, សាកលវិទ្យាល័យ Utrecht, សាកលវិទ្យាល័យ Erasmus Rotterdam, សាកលវិទ្យាល័យ Amsterdam និង Vrije Universiteit Amsterdam នឹងធ្វើឱ្យប៉ះពាល់ដល់ទីផ្សារការងារ សេវាកម្មអាជីវកម្ម និងវិស័យសាធារណៈ ដែលកំពុងប្រឈមនឹងកង្វះខាតធនធានមនុស្សមានទេពកោសល្យ។

តំបន់ Randstad ដែលជាទីតាំងនៃសាកលវិទ្យាល័យទាំង៥ មានទំហំទឹកប្រាក់ប្រមាណពាក់កណ្ដាលនៃ GDP របស់ប្រទេសហូឡង់ អាចស្រូបយក ៨២ភាគរយ នៃការខាតបង់ ដែលបានព្យាករណ៍។ វិស័យដែលរងផលប៉ះពាល់ខ្លាំងបំផុតគឺ វិស័យសេវាកម្មអាជីវកម្ម (៣៩ភាគរយ) ស្ថាប័នហិរញ្ញវត្ថុ (២០ភាគរយ) និងវិស័យសាធារណៈ (១០ភាគរយ), នេះបើយោងតាមការស្រាវជ្រាវសេដ្ឋកិច្ច SEO។

អ្នកស្រាវជ្រាវបានកត់សម្គាល់ថា និស្សិតអន្តរជាតិដែលបានបញ្ចប់ការសិក្សាក្នុងប្រទេសនេះ ដើរតួនាទីយ៉ាងសំខាន់ ក្នុងការបំពេញចន្លោះប្រហោងជំនាញ ដែលមានតម្រូវការក្នុងទីផ្សារការងារប្រទេសហូឡង់ ដោយនៅសល់ជាងមួយភាគបួន។

ការកំណត់ចំនួននិស្សិតអន្តរជាតិចុះឈ្មោះចូលរៀន នៅតាមសាកលវិទ្យាល័យហូឡង់ ត្រូវបានស្នើឡើងជាដំណាក់កាល ដោយការពិភាក្សាដំបូងចាប់ផ្ដើមនៅឆ្នាំ២០២២ និងច្បាប់ផ្លូវការត្រូវបានស្នើឡើងនៅឆ្នាំ២០២៣ និងឆ្នាំ ២០២៤។

យោងតាម ICEF Monitor ក្នុងខែកុម្ភៈ ឆ្នាំ២០២៤ សាកលវិទ្យាល័យហូឡង់ បានបង្ហាញផែនការដ៏ធំមួយ ក្នុងការកាត់បន្ថយចំនួននិស្សិតអន្តរជាតិចុះឈ្មោះចូលរៀន ដើម្បីឆ្លើយតបទៅនឹងសម្ពាធរបស់រដ្ឋាភិបាល ដែលកំពុងកើនឡើង។ រដ្ឋាភិបាលហូឡង់ បានចំណាយពេលភាគច្រើននៃឆ្នាំ២០២៣ ដើម្បីបង្ហាញពីការព្រួយបារម្ភ អំពីការកើនឡើងយ៉ាងឆាប់រហ័ស នៃចំនួននិស្សិតអន្តរជាតិក្នុងប្រទេស។

យុទ្ធសាស្ត្រនេះ រួមមានការអនុវត្តការកំណត់ចំនួននិស្សិតអន្តរជាតិចុះឈ្មោះចូលរៀន ការបញ្ឈប់ការពង្រីកកម្មវិធីបរិញ្ញាបត្របង្រៀនជាភាសាអង់គ្លេស​ និងការបញ្ចប់វគ្គសិក្សាឆ្នាំសិក្សាមូលដ្ឋាន។ លើសពីនេះ សាកលវិទ្យាល័យនឹងកាត់បន្ថយការជ្រើសរើសនិស្សិតអន្តរជាតិ ហើយណែនាំកម្មវិធីសញ្ញាបត្រ ដែលបង្រៀនជាភាសាហូឡង់បន្ថែមទៀត ដើម្បីពង្រឹងការប្រើប្រាស់ភាសាហូឡង់។

វិធានការទាំងនេះ មានគោលបំណងដោះស្រាយកង្វល់អំពីកង្វះខាតលំនៅដ្ឋាន ថ្នាក់រៀនចង្អៀត និងការធ្វើសមាហរណកម្ម និស្សិតអន្តរជាតិទៅក្នុងសង្គមហូឡង់។ ផែនការនេះ ក៏ផ្ដោតលើការបង្កើនការរក្សានិស្សិតអន្តរជាតិបន្ទាប់ពីបញ្ចប់ការសិក្សា និងកែលម្អកន្លែងស្នាក់នៅរបស់និស្សិត។

របាយការណ៍របស់ SEO Economic Research បានព្រមានថា ការរឹតបន្តឹងលើនិស្សិតអន្តរជាតិ នឹងប៉ះពាល់មិនត្រឹមតែលើថវិការដ្ឋ និងទីផ្សារការងារប៉ុណ្ណោះទេ ប៉ុន្តែថែមទាំងធ្វើឱ្យអាជីវកម្មហូឡង់ អាចពិចារណាទៅបោះទីតាំងកន្លែងផ្សេង ប្រសិនបើពួកគេមិនអាចទាក់ទាញធនធានមនុស្ស ដែលមានទេពកោសល្យខ្ពស់ មកកាន់ប្រទេសហូឡង់។

យោងតាម The PIE News សាកលវិទ្យាល័យ និង UNL ដែលជាស្ថាប័នតំណាងរបស់ពួកគេ បានជំរុញឱ្យរដ្ឋាភិបាលអនុម័តគោលនយោបាយ ដែលអាចបត់បែនបាន និងផ្អែកលើទិន្នន័យ ដែលបន្ស៊ីការជ្រើសរើសបុគ្គលិក ជាមួយនឹងតម្រូវការកម្លាំងពលកម្មក្នុងតំបន់ ជំនួសឱ្យការដាក់កម្រិតលើភាពទូលំទូលាយ។

លោក Van Zijst មន្ត្រីកិច្ចការសាធារណៈរបស់ UNL បានប្រាប់ The PIE ថា និស្សិតអន្តរជាតិ គឺមានសារៈសំខាន់សម្រាប់សមត្ថភាពរកប្រាក់ចំណូលរបស់ប្រទេសហូឡង់ និងវិបុលភាពរយៈពេលវែង ដោយបានបញ្ជាក់ពីអត្ថប្រយោជន៍នៃប្រព័ន្ធអប់រំឧត្តមសិក្សាចម្រុះ និងតួនាទីរបស់ពួកគេក្នុងការបំពេញកង្វះខាតទីផ្សារការងារជាប់លាប់នៅគ្រប់វិស័យ រាប់ចាប់តាំងពីវិស័យហិរញ្ញវត្ថុ រហូតដល់ការថែទាំសុខភាព និងវិស័យអប់រំ៕