ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
វេទិកាសេដ្ឋកិច្ចពិភពលោក បានបង្ហាញថា នៅពេលដែលអត្រាសង្ឃឹមរស់លើពិភពលោកកើនឡើង ហើយជំងឺរ៉ាំរ៉ៃកាន់តែរីករាលដាល ប្រព័ន្ធថែទាំសុខភាពកំពុងប្រឈមនឹងសម្ពាធកាន់តែខ្លាំង ដោយត្រូវប្ដូរពីការប្រតិកម្មតបទៅនឹងជំងឺទៅជាការការពារ។
យោងតាមអង្គការសុខភាពពិភពលោក បានឱ្យដឹងថា ជំងឺមិនឆ្លងមានចំនួន ៧៤ភាគរយ នៃការស្លាប់ទាំងអស់ទូទាំងពិភពលោក។ ខណៈមូលហេតុដែលបង្កឱ្យមានជំងឺមិនឆ្លងគឺដោយសាររបៀបរស់នៅ មានឥទ្ធិពលខ្លាំងបំផុត។ ដំណោះស្រាយ សម្រាប់ការកើនឡើងជាសកលនៃជំងឺរ៉ាំរ៉ៃនឹងតម្រូវឱ្យមានការផ្លាស់ប្ដូរអាកប្បកិរិយាផ្ទាល់ខ្លួន ដែលអាចកាត់បន្ថយជំងឺ មរណភាព និងការចំណាយលើការថែទាំសុខភាព។ ការរស់នៅដោយមានទម្លាប់ល្អ ជាវិធីមួយ ដែលអាចពង្រឹង សុខភាពមនុស្ស ប្រព័ន្ធសុខាភិបាល និងសង្គមទាំងមូល។
បើតាមការសិក្សារបស់វេទិកាសេដ្ឋកិច្ចពិភពលោក ការផ្លាស់ប្ដូរអាកប្បកិរិយាក្នុងការថែទាំសុខភាព ពិតជាមានសារៈសំខាន់ខ្លាំងណាស់ ព្រោះវាមានឥទ្ធិពលទៅលើអត្រាមរណៈ ការលើកកម្ពស់សុខភាព និងអាយុវែង។
ការសិក្សាលើមនុស្ស ៥០ម៉ឺននាក់ ក្នុងរយៈពេល ៥ឆ្នាំ បានបង្ហាញថា អ្នកដែលមានអាយុចាប់ពី ៤៥ ទៅ៦៥ឆ្នាំ ដែលបានផ្លាស់ប្ដូរទម្លាប់រស់នៅ ដោយមិនហាត់ប្រាណសោះ ទៅហាត់ប្រាណកម្រិតមធ្យម ឬកម្រិតខ្ពស់ លទ្ធផលបានបង្ហាញថា ហានិភ័យនៃការស្លាប់របស់ពួកគេបានថយចុះចន្លោះពី ៣៨ ទៅ ៥៨ភាគរយ។ សម្រាប់អ្នកដែលមានអាយុចាប់ពី ៦៥ឆ្នាំឡើងទៅអាចកាត់បន្ថយហានិភ័យនៃការស្លាប់ចន្លោះពី ៥២ ទៅ ៥៩ភាគរយ។
សម្រាប់អ្នកមានជំងឺរ៉ាំរ៉ៃ ការធ្វើសកម្មភាពរាងកាយ អាចកាត់បន្ថយអត្រាមរណភាព និងថ្លៃថែទាំសុខភាព។ ការសិក្សារបស់ Discovery ក្នុងរយៈពេល ៣ឆ្នាំបង្ហាញថា អ្នកមានជំងឺទឹកនោមផ្អែម ដែលមានទម្លាប់ហាត់ប្រាណជាប់លាប់ ក្នុងកម្រិតស្រាល ឬមធ្យម អាចមើលឃើញពីការថយចុះ ការចំណាយក្នុងមន្ទីរពេទ្យ ១៦ភាគរយ និងថយចុះអត្រាមរណភាព ១៨ភាគរយ។
តាមរយៈលទ្ធផលនៃការសិក្សាបង្ហាញថា ការកសាងទម្លាប់រស់នៅល្អ និងឱ្យមានជាប់លាប់មានឥទ្ធិពលយ៉ាងខ្លាំង ទៅលើស្ថានភាពសុខភាពរបស់យើង។ តាមរយៈការធ្វើសកម្មភាពរាងកាយជាប្រចាំ របបអាហារមានតុល្យភាព និងការពិនិត្យសុខភាពជាប់លាប់ អាចធ្វើឱ្យសុខភាពរបស់យើងប្រសើរឡើង ដែលនេះបង្កើនឱកាសរស់នៅឱ្យមានសុខភាពល្អ និងអាយុវែង៕
