គណៈកម្មការវាយតម្លៃជ័យលាភីថ្នាក់ក្រុង/ស្រុក បានសម្រេចផ្តល់ពានរង្វាន់ជ័យលាភីលេខ១ “ភូមិ ឃុំ សង្កាត់មានសុវត្ថិភាព” ក្នុងវិស័យបរិស្ថាន ដល់ ឃុំ-សង្កាត់ ចំនួន៥ និងភូមិចំនួន៥ នៅតាមបណ្តាក្រុងស្រុកទាំង១៣ នៃខេត្តកណ្តាល ដែលបានចូលរួមក្នុងកម្មវិធីប្រឡងប្រណាំងផ្ទៃក្នុងខេត្ត “ភូមិ ឃុំ សង្កាត់មានសុវត្ថិភាព” ក្នុងវិស័យបរិស្ថាន។

លោក ពៅ សោមាណាក់ ប្រធានមន្ទីរបរិស្ថានខេត្តកណ្តាល បានឱ្យដឹងថា ឃុំ-សង្កាត់ឆ្នើម សម្រាប់កម្មវិធីប្រឡងប្រណាំងផ្ទៃក្នុងខេត្ត “ភូមិ-ឃុំ-សង្កាត់មានសុវត្ថិភាព” ក្នុងវិស័យបរិស្ថាន ក្នុងចំនួន១៣ក្រុង-ស្រុក នៃខេត្តកណ្តាល រួមមាន ជ័យលាភីលេខ១ ឃុំដីឥដ្ឋ ស្រុកកៀនស្វាយ, ជ័យលាភីលេខ២ សង្កាត់តាខ្មៅ ក្រុងតាខ្មៅ, ជ័យលាភីលេខ៣ ឃុំសំរោងលើ ស្រុកអង្គស្នួល, ជ័យលាភីលេខ៤ ឃុំព្រែកអញ្ចាញ ស្រុកមុខកំពូល, ជ័យលាភីលេខ៥ សង្កាត់សំពៅពូន ក្រុងសំពៅពូន។ ចំណែក ភូមិឆ្នើមទាំង៥ រួមមាន ជ័យលាភីលេខ១ ភូមិកំពង់សំណាញ់ ស្ថិតក្នុងក្រុងតាខ្មៅ, ជ័យលាភីលេខ២ ភូមិព្រែកជ្រូក ស្ថិតក្នុងក្រុងអរិយក្សត្រ, ជ័យលាភីលេខ៣ ភូមិស្តៅកន្លែង ស្ថិតក្នុងស្រុកកៀនស្វាយ, ជ័យលាភីលេខ៤ ភូមិបឹងក្រោម ស្ថិតក្នុងស្រុកលើកដែក, ជ័យលាភីលេខ៥ ភូមិថ្នល់ទទឹង ស្រុកអង្គស្នួល។

ប្រធានមន្ទីរបរិស្ថានខេត្តកណ្តាល បញ្ជាក់បន្ថែមថា ការវាយតម្លៃជ័យលាភី គឺផ្អែកលើលក្ខណៈវិនិច្ឆ័យចំនួន៣ រួមមាន អនាម័យ មានសោភ័ណភាពល្អ និងបរិស្ថានល្អ រួមទាំងសូចនាករចំនួន១០ និងមធ្យោបាយផ្ទៀងផ្ទាត់ចំនួន៩១ចំណុច កំណត់ក្នុងវិស័យបរិស្ថាន រួមមាន គឺទី១. គ្មានសំណល់រឹង(សំរាម), ទី២. គ្មានសំណល់រាវ(ទឹកកខ្វក់), ទី៣. មានទឹកស្អាតប្រើប្រាស់, ទី៤. មានបង្គន់អនាម័យ, ទី៥. មានរុក្ខជាតិ(ដើមឈើ), ទី៦. មានការតុបតែងលម្អ, ទី៧. មានទេសភាពស្អាត, ទី៨. ទទួលការអប់រំនិងផ្សព្វផ្សាយ, ទី៩. ចូលរួមការពារធនធានធម្មជាតិ និងទី១០. ចូលរួមអភិវឌ្ឍន៍សហគមន៍។

ក្នុងពិធីប្រកាសជ័យលាភី និងប្រគល់ពានរង្វាន់ សម្រាប់ការប្រឡងប្រណាំង ផ្ទៃក្នុងខេត្ត “ភូមិ-ឃុំ-សង្កាត់ មានសុវត្ថិភាព” ក្នុងវិស័យបរិស្ថាន ឯកឧត្ដម គួច ចំរើន អភិបាលខេត្តកណ្ដាល មានប្រសាសន៍ថា កម្មវិធីប្រឡងប្រណាំងផ្ទៃក្នុងខេត្តស្តីពី “ភូមិ-ឃុំ​-សង្កាត់ មានសុវត្ថិភាព” ក្នុងវិស័យបរិស្ថាន គឺឈរលើមូលដ្ឋានវាយតម្លៃ និងដាក់ពិន្ទុផ្អែកលើលក្ខណៈវិនិច្ឆ័យចំនួន៣ សូចនាករចំនួន១០ មធ្យោបាយផ្ទៀងផ្ទាត់ចំនួន៩១ចំណុច ព្រមទាំងមាននីតិវិធី និងដំណើរការនៃការជ្រើសរើសជ័យលាភី ចំនួន០៥ ជំហាន។

អភិបាលខេត្តកណ្ដាល ក៏បានជំរុញឱ្យក្រុង-ស្រុក ឃុំ-សង្កាត់ទាំងអស់ យកលទ្ធផលនេះ ទៅបន្តការផ្សព្វផ្សាយ ដើម្បីភូមិឃុំផ្សេងទៀត ដែលពុំបានជាប់ចំណាត់ថ្នាក់បន្តខិតខំយកចិត្តទុកដាក់ថែរក្សាបរិស្ថាន ក៏ដូចជាឱ្យពួកគាត់បានត្រៀមលក្ខណៈចូលរួមប្រកួតនៅលើក្រោយទៀត សំដៅឱ្យភូមិឃុំទាំងអស់មានភាពស្អាតរហូត ខណៈចំនួនភូមិសរុបនៅក្នុងខេត្តដែលបានចូលរួមទើបតែមានត្រឹម១០ភាគរយប៉ុណ្ណោះ។

“ប្រសិនបើមានស្មារតីនេះជាប្រចាំនោះ ភូមិឃុំយើងនឹងមានភាពស្អាតជារៀងរហូត ហើយតែមានភាពស្អាតនេះហើយ នឹងទាក់ទាញបាននូវកំណើនទេសចរ និងការវិនិយោគបន្ថែមទៀត”

គួរជម្រាបជូនថា ក្រសួងបរិស្ថាន បានរៀបចំចលនាការរៀបចំប្រឡងប្រណាំងផ្ទៃក្នុងខេត្ត “ភូមិ-ឃុំ-សង្កាត់មានសុវត្ថិភាព” ក្នុងវិស័យបរិស្ថាន រៀងរាល់២ឆ្នាំម្តង ដោយក្នុងនោះសម្រាប់ខេត្តកណ្ដាល មានភូមិចំនួន១២៣ និងឃុំ-សង្កាត់ ចំនួន១២២ បានចូលរួមការប្រឡងប្រណាំងផ្ទៃក្នុងនេះ នៅតាមបណ្តាក្រុងស្រុកទាំង១៣ នៃខេត្តកណ្តាល៕