សាកលវិទ្យាល័យ Nanyang Technological University (NTU) បានប្រែក្លាយខ្លួនពីស្ថាប័ន ដែលមានគេស្គាល់តិចតួចបំផុត ទៅជាសាកលវិទ្យាល័យមួយ ក្នុងចំណោមសាកលវិទ្យាល័យកំពូលទាំង ៣០ នៅទូទាំងពិភពលោក ត្រឹមតែ ១៤ឆ្នាំប៉ុណ្ណោះ ដែលធ្វើឱ្យស្ថាប័ននេះ ក្លាយជាសាកលវិទ្យាល័យមួយ ក្នុងចំណោមសាកលវិទ្យាល័យ ដែលរីកចម្រើនបំផុតលើពិភពលោក។

បង្កើតឡើងក្នុងឆ្នាំ ១៩៩១ NTU ដើមឡើយ ជាសាលាដែលផ្ដោតលើការបណ្ដុះបណ្ដាលវិស្វករ ដើម្បីគាំទ្រដល់សេដ្ឋកិច្ចឧស្សាហកម្មសិង្ហបុរី។ នាពេលនោះ សាលានេះ មានការទទួលស្គាល់តិចតួចប៉ុណ្ណោះ ពីសំណាក់អន្តរជាតិ។ ខណៈនៅដំណាក់កាលដំបូងបំផុត ក្នុងឆ្នាំ១៩៨១ សាលានេះ មានឈ្មោះថា វិទ្យាស្ថានបច្ចេកវិទ្យាណានយ៉ាង (NTI) ដែលត្រូវបង្កើតឡើង ដើម្បីការអប់រំវិស្វករ សម្រាប់សេដ្ឋកិច្ចដែលកំពុងរីកចម្រើន របស់ប្រទេសសិង្ហបុរី។

នៅឆ្នាំ ១៩៩១ NTI បានរួមបញ្ជូនជាមួយវិទ្យាស្ថានជាតិអប់រំ ដើម្បីបង្កើតជា NTU ហើយនៅឆ្នាំ ១៩៩៦ NTU បានស្រូបយកអតីតនិស្សិតនៃអតីតសាកលវិទ្យាល័យ Nanyang យ៉ាងច្រើន។

ក្នុងឆ្នាំ ២០០៦ NTU បានក្លាយជាស្ថាប័នស្វយ័តមួយ ហើយចាប់តាំងពីពេលនោះមក ស្ថាប័ននេះបានក្លាយជាសាកលវិទ្យាល័យសាធារណៈដ៏ធំបំផុតមួយរបស់សិង្ហបុរី។ នៅឆ្នាំ២០១១ សាកលវិទ្យាល័យនេះ បានជាប់ចំណាត់ថ្នាក់ទី១៧៤ លើពិភពលោក ផ្អែកតាមតារាងចំណាត់ថ្នាក់សាកលវិទ្យាល័យ Time Higher Education (THE)។ សព្វថ្ងៃនេះ NTU ជាប់ចំណាត់ថ្នាក់ទី ៣០ នៅទូទាំងពិភពលោក ហើយស្ថិតក្នុងចំណោមសាកលវិទ្យាល័យកំពូលទាំង ៥ក្នុងទ្វីបអាស៊ី ដោយហក់ឡើងរហូតដល់ ១៤៤ចំណាត់ថ្នាក់ ក្នុងរយៈពេលត្រឹមតែ ១៤ឆ្នាំ។

ការអភិវឌ្ឍយ៉ាងឆាប់រហ័សនេះ ត្រូវបានគេសន្មត់ថា កើតឡើងដោយសារការផ្លាស់ប្ដូររបស់ NTU ទៅជាស្ថាប័នដែលផ្ដោតលើការស្រាវជ្រាវជាចម្បង។ គុណភាពស្រាវជ្រាវ និងបរិស្ថានអំណោយផល គឺជាលក្ខណៈវិនិច្ឆ័យសំខាន់ ក្នុងការកំណត់ចំណាត់ថ្នាក់ ដោយ THE ហើយកត្តានេះ មានឥទ្ធិពលរហូតដល់ ២៩% ទៅ ៣០% ឯណោះ លើការកំណត់ចំណាត់ថ្នាក់។

របាយការណ៍ថ្មីៗ ដោយ THE បង្ហាញពីរបៀប នៃការវិវត្តន៍ចំណាត់ថ្នាក់សាកលវិទ្យាល័យ ដែលមិនធ្លាប់មានទាល់តែសោះកាលពីមុន និងបានធ្វើឱ្យ NTU ក្លាយជាស្ថាប័នគម្រូ សម្រាប់សាកលវិទ្យាល័យដទៃទៀត ដោយទាក់ទាញការចាប់អារម្មណ៍ពីអ្នកសិក្សានៅទូទាំងពិភពលោក។ របាយការណ៍នេះ ក៏កត់សម្គាល់ដែរថា សាកលវិទ្យាល័យ ចាត់ទុកចំណាត់ថ្នាក់ជារង្វាស់ដ៏សំខាន់ សម្រាប់ការអភិវឌ្ឍយុទ្ធសាស្ត្រ និងភាពជោគជ័យរបស់ខ្លួន។

បរិបទក្នុងស្រុក និងការផ្លាស់ប្ដូរយុទ្ធសាស្ត្រ

ដើម្បីយល់ពីរបៀប ដែល NTU សម្រេចបានការផ្លាស់ប្ដូរនេះ ចាំបាច់ត្រូវពិចារណាអំពីបរិបទក្នុងស្រុករបស់សិង្ហបុរី ។

នៅដើមទសវត្សរ៍ឆ្នាំ២០០០ សិង្ហបុរីបានប្រឈមមុខនឹងការប្រកួតប្រជែងកាន់តែខ្លាំងឡើងពីសំណាក់ប្រទេសជិតខាងដូចជា ចិន ឥណ្ឌា និងឥណ្ឌូនេស៊ី ដែលកំពុងរីកចម្រើនសេដ្ឋកិច្ច ជាមួយនឹងតម្លៃពលកម្មទាប។ ដោយដឹងថា ខ្លួនមិនអាចប្រកួតប្រជែងក្នុងផលិតកម្មឧស្សាហកម្មបានទៀត ប្រទេសសិង្ហបុរី បានផ្លាស់ប្ដូរឆ្ពោះទៅរកសេដ្ឋកិច្ច ដែលពឹងផ្អែកលើចំណេះដឹង (Knowledge-based) និងផ្ដោតលើសេវាកម្ម។

រដ្ឋាភិបាលបានបង្កើតមូលនិធិស្រាវជ្រាវ (NRF) ដើម្បីគ្រប់គ្រងការស្រាវជ្រាវ និងផ្ដល់មូលនិធិដល់អ្នកដែលមានទេពកោសល្យក្នុងការសិក្សា។ ទោះជាយ៉ាងណាក៏ដោយ ការប៉ុនប៉ងលើកដំបូងរបស់ NTU ដើម្បីទទួលបានមូលនិធិពី NRF ក្នុងឆ្នាំ២០០៦ មិនបានជោគជ័យទេ ដែលជំរុញឱ្យសាកលវិទ្យាល័យ ពិចារណាឡើងវិញនូវយុទ្ធសាស្ត្ររបស់ខ្លួន។

ភាពជាអ្នកដឹកនាំរបស់ NTU ត្រូវបានទទួលស្គាល់ឡើងវិញ ដោយសារការផ្ដល់អាទិភាពដល់ការស្រាវជ្រាវជាជាងផ្ដោតលើការបង្រៀន។ បន្ទាប់ពីវាយតម្លៃរួចរាល់ ២៥% នៃមហាវិទ្យាល័យរបស់សាកលវិទ្យាល័យ ត្រូវបានលុបបំបាត់។ បន្ទាប់មក សាកលវិទ្យាល័យបានជ្រើសរើសអ្នកប្រាជ្ញលំដាប់កំពូលៗ ជាពិសេសមកពីសហរដ្ឋអាម៉េរិក និងចក្រភពអង់គ្លេស ហើយជំរុញមហាវិទ្យាល័យដែលនៅសល់ ឱ្យ​ផ្ដោតលើការស្រាវជ្រាវជាចម្បង។

ក្នុងដំណាក់កាលនេះ សាកលវិទ្យាល័យ បានធ្វើទំនើបកម្ម វិធីសាស្ត្របង្រៀនរបស់ខ្លូន ដោយទាញយកការបំផុសគំនិតពីស្ថាប័នល្បីៗដូចជា សាកលវិទ្យាល័យ Oxford និងសាកលវិទ្យាល័យ Cambridge ដោយបញ្ចូលបច្ចេកវិទ្យាថ្មី និងធានាបាននូវសុវត្ថិភាពលើការវិនិយោគហិរញ្ញវត្ថុសំខាន់ៗ ដើម្បីលើកកម្ពស់បទពិសោធនិស្សិត។

យុទ្ធសាស្ត្រផ្ដោតលើការស្រាវជ្រាវ

យុទ្ធសាស្ត្ររបស់ NTU មានភាពច្បាស់លាស់ ៖ ដើម្បីផ្លាស់ប្ដូរទៅជាសាកលវិទ្យាល័យ ដែលពឹងផ្អែកខ្លាំងលើការស្រាវជ្រាវ។ សាកលវិទ្យាល័យបានបង្កើត ផែនការស្រាវជ្រាវ រយៈពេល ៥ឆ្នាំ ដែលផ្ដោតលើវិស័យសិក្សាជាច្រើន ហើយជារឿយៗត្រូវបានបន្ស៊ីជាមួយអាទិភាពជាតិដូចជា ការថែទាំសុខភាព និរន្តរភាព និងសន្តិសុខ។ ទិសដៅយុទ្ធសាស្ត្រនេះ នាំទៅរកការទទួលបានកញ្ចប់ថវិកាសំខាន់ៗជាច្រើន រួមទាំង ភាពជាដៃគូអន្តរជាតិ ការសហការ និងការបង្កើតសាលាវេជ្ជសាស្ត្រក្នុងភាពជាដៃគូជាមួយ Imperial College London ដែលជាសាកលវិទ្យាល័យដ៏ល្បីល្បាញក្នុងចក្រភពអង់គ្លេស។

ការផ្តោតជាចម្បងលើការស្រាវជ្រាវរបស់ NTU រួមជាមួយនឹងគោលនយោបាយជាតិ ដែលអំណោយផល បានអនុញ្ញាតឱ្យសាកលវិទ្យាល័យ ធ្វើការបោះជំហានគួរឱ្យកត់សម្គាល់នៅក្នុងចំណាត់ថ្នាក់អន្តរជាតិផ្សេងៗ។ នៅឆ្នាំ២០២០ សាកលវិទ្យាល័យនេះ បានក្លាយជាសាកលវិទ្យាល័យកំពូលទាំង ៥០របស់ពិភពលោក ក្នុងតារាងចំណាត់ថ្នាក់ THE ដោយវ៉ាដាច់ សាកលវិទ្យាល័យ Ivy League, Brown និងមហាវិទ្យាល័យ Dartmouth របស់អាម៉េរិក។

NTU មានភាពល្បីល្បាញលើមុខវិជ្ជាជាក់លាក់ជាច្រើន ជាពិសេសគឺជំនាញបញ្ញាសិប្បនិម្មិត (AI) ដែលបានទាក់ទាញអ្នកស្រាវជ្រាវលំដាប់កំពូល មកពីទ្វីបអឺរ៉ុបជាច្រើន។ គម្រូនៃការអភិវឌ្ឍយ៉ាងឆាប់រហ័ស បានទាក់ទាញចំណាប់អារម្មណ៍ថ្នាក់ដឹកនាំសាកលវិទ្យាល័យមកពីជុំវិញពិភពលោក ឱ្យមកទស្សនកិច្ចនៅសាកលវិទ្យាល័យនេះ ដើម្បីសិក្សាពីបទពិសោធន៍៕