ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសនានាជាសមាជិករបស់សហភាពអឺរ៉ុប ឬ European Union បានសម្រេចចិត្តប្រើខ្សែ USB Type-C ជាផ្លូវការចាប់ពីថ្ងៃដំបូងនៃឆ្នាំ២០២៤ នេះតទៅ ។ គោលបំណងសម្រេចចិត្តរួមគ្នាប្រើប្រាស់ខ្សែឧបករណ៍អេឡិចត្រូនិកប្រភេទនេះ ក្រោមហេតុផលជំរុញឱ្យអ្នកប្រើប្រាស់ងាយស្រួលប្រើ និងងាយស្រួលសាកថ្មលើឧបករណ៍អេឡិចត្រូនិកផ្សេងៗ រាប់ទាំងទូរស័ព្ទដៃ កុំព្យូទ័រ កាម៉េរា និងថេប្លេតជាដើម ។
ស្តាប់ទៅគ្រាន់តែជាការប្រកាសឱ្យប្រជាជនប្រើខ្សែតំណភ្ជាប់ USB Type-C តែប៉ុណ្ណោះ ប៉ុន្តែពីក្រោយខ្នងនៃការប្រើប្រាស់នេះ គណៈកម្មការអឺរ៉ុបបានប្រកាសជាគោលការណ៍តែម្តងថា ខ្សែ USB Type-C នឹងក្លាយជាស្តង់ដារទូទៅសម្រាប់ឧបករណ៍អេឡិចត្រូនិកនៅក្នុងសហភាពអឺរ៉ុបទាំងមូល ។ ទន្ទឹមគ្នានេះ គណៈកម្មការអឺរ៉ុបបានបញ្ជាក់បន្ថែមថា ខ្សែ USB Type-C នឹងជំនួយឱ្យបច្ចេកវិទ្យាសាកថ្មកាន់តែប្រសើរ កាត់បន្ថយកាកសំណល់អេឡិចត្រូនិក និងចំណេញពេលវេលា និងមិនរំខានអ្នកប្រើប្រាស់ក្នុងការស្វែងរកឆ្នាំងសាកប្រភេទផ្សេងៗ ។
ទន្ទឹមគ្នានេះដែរ សេចក្តីប្រកាសព័ត៌មានរបស់គណៈកម្មការអឺរ៉ុប ក៏បានឱ្យដឹងទៀតថា គោលការណ៍លើកកម្ពស់ការប្រើប្រាស់ខ្សែ USB Type-C នឹងជំរុញដល់ការលើកកម្ពស់គំនិតច្នៃប្រតិដ្ឋបច្ចេកវិទ្យាសាកថ្មឧបករណ៍អេឡិចត្រូនិក និងងាយស្រួលស្វែងរកនៅលើទីផ្សារអ៊ឺរ៉ុប ។ ឧបករណ៍អេឡិចត្រូនិកដែលប្រើខ្សែ USB Type-C រួមមាន ទូរស័ព្ទដៃ កាសស្តាប់សំឡេង កុំព្យូទ័រ កាំម៉េរា ថេប្លេត ឧបរណ៍បំពងសំឡេង ឧបករណ៍ហ្គេម ឧបករណ៍អេឡិចត្រូនិកជំនួយដល់ការអាន (e-book readers) ឧបករណ៍ថតសំឡេង (Mice) ក្តារចុចកុំព្យូទ័រ (Keyboards) និងឧបករណ៍បច្ចេកវិទ្យាផ្សេងៗជាច្រើនទៀត ។
គួរបញ្ជាក់ថា គណៈកម្មការអឺរ៉ុបបានប្រកាស និងប្តេជ្ញាយ៉ាងមុតមាំថា នៅឆ្នាំ២០២៦ ខាងមុខ រាល់ប្រភេទកុំព្យូទ័រយួរដៃទាំងអស់ដែលដាក់លក់នៅក្នុងទីផ្សារអ៊ឺរ៉ុប ត្រូវតែផលិតឡើងដោយភ្ជាប់មកជាមួយរន្ធប្រភេទ USB Type-C ។ ជាមួយគ្នានេះ សហភាពអឺរ៉ុបក៏នឹងពិចារណាផ្តល់ពេលវេលាឱ្យគ្រប់គ្រាន់ដល់ក្រុមហ៊ុនផលិតសម្ភារៈ ឬឧបករណ៍សម្រាប់ឧស្សាហកម្មបច្ចេកវិទ្យា ដើម្បីផ្តល់ពេលវេលាឱ្យក្រុមហ៊ុនផលិតទាំងនោះ សម្របខ្លួនទៅនឹងបទបញ្ញត្តិថ្មីដែលបានដាក់ចេញនៅអ៊ឺរ៉ុប ។
ជារួមមកវិញ ការប្រើប្រាស់ខ្សែ USB Type-C ដែលសហភាពអឺរ៉ុបប្រកាសខាងលើនេះ នឹងជួយបង្រួមពេលវេលាសាកថ្មឱ្យបានលឿនរហ័ស សុវត្ថិភាព កាត់បន្ថយចំនួនឧបករណ៍សាក សន្សំសំចៃ ព្រមទាំងជួយបរិស្ថាន បញ្ជៀសពីរូបភាពបង្កើនសំណល់បច្ចេកវិទ្យា៕
