មហាសមុទ្រអាក់ទិកអាចនឹងគ្មានទឹកកកក្នុងរដូវក្ដៅនៅឆ្នាំ២០៣០ខាងមុខ បើទោះជាមនុស្សធ្វើការបានល្អក្នុងការកាត់បន្ថយការបំភាយឧស្ម័នចាប់ពីពេលនេះទៅក៏ដោយ។ នេះគឺជាការសន្និដ្ឋាន ដែលគួរឱ្យបារម្ភ នៃការសិក្សាថ្មីមួយរបស់ស្ថាប័ន Nature Communications អាមេរិក។

តែយ៉ាងណាបើយោងតាម We Forum ការព្យាករណ៍ដែលបានលើកឡើងថា មហាសមុទ្រអាក់ទិកនឹងក្លាយជាមហាសមុទ្រដែលគ្មានទឹកកក គឺមានប្រវត្តិវែងឆ្ងាយ និងស្មុគស្មាញសម្រាប់អ្នកវិទ្យាសាស្ត្រ។ ប្រសិនបើរឿងនេះ កើតឡើងនៅទសវត្សន៍ឆ្នាំ២០៣០ មានន័យថា វាលឿនជាងការព្យាករណ៍របស់អ្នកវិទ្យាសាស្ត្រធ្លាប់បានគិតកាលពីមុន ដែលគេរំពឹងថា ព្រឹត្តិការណ៍នេះនឹងកើតឡើងនៅពាក់កណ្ដាលសតវត្សរ៍ទី២១។ ប៉ុន្តែអ្វីដែលយើងដឹងច្បាស់នោះគឺ អវត្តមាននៃមហាសមុទ្រទឹកកកនៅលើផែនដីជាសញ្ញានៃការផ្លាស់ប្ដូរដ៏គួរឱ្យបារម្ភនៃអាកាសធាតុ ដែលនឹងបង្កឱ្យមានគ្រោះថ្នាក់ និងផលវិបាកជាសកល។

តាមរយៈការសង្កេតរបស់ក្រុមអ្នកស្រាវជ្រាវ គេឃើញថា ការលាតសន្ធឹងនៃផ្ទៃទឹកកកនឹងថយចុះ រហូតដល់កម្រិតអប្បរមានៅត្រឹមខែកញ្ញា រៀងរាល់ឆ្នាំ។ ទឹកកក ដែលនៅសេសសល់នៅចុងរដូវក្ដៅ ត្រូវបានគេហៅថា Multiyear Sea Ice ដែលមានកម្រាស់ក្រាស់ជាងផ្នែកដទៃទៀតនៃផ្ទាំងទឹកកកនៅតំបន់។ វាដើរតួរជាឧបសគ្គដល់ការផ្ទេរសំណើម និងកម្ដៅរវាងមហាសមុទ្រ និងបរិយាកាស។ យ៉ាងណាមិញ ក្នុងរយៈពេលជាង ៤០ឆ្នាំកន្លងមកនេះ Multiyear Sea Ice បានធ្លាក់ចុះពីប្រហែល ៧លានគីឡូម៉ែត្រការ៉េទៅ ៤លានគីឡូម៉ែត្រការ៉េ។ ទំហំនៃការបាត់បង់នេះស្មើទៅនឹងផ្ទៃដីប្រទេសឥណ្ឌាទាំងមូល ឬ១២ដង នៃផ្ទៃដីចក្រភពអង់គ្លេស។ នេះជាសញ្ញាដ៏ធំមួយដែលបង្ហាញថា មូលដ្ឋានប្រព័ន្ធអាកាសពិភពលោក នឹងរងផលប៉ះពាល់ខ្លាំងឡើង។

នៅពេលដែលមហាសមុទ្រអាក់ទិកក្លាយជាដែនគ្មានទឹកកកនៅរដូវក្ដៅ ត្រូវបានអ្នកវិទ្យាសាស្ត្រឱ្យឈ្មោះព្រឹត្តិការណ៍នេះថា «ព្រឹត្តការណ៍មហាសមុទ្រខៀវ-Blue Océan Event»។ នៅពេលនោះ ផ្ទៃទឹកកករបស់មហាសមុទ្រអាក់ទិកនឹងធ្លាក់ចុះនៅត្រឹម ១លានម៉ែត្រការ៉េ។ ចំណែកផ្ទែទឹកកក ដែលនៅក្នុងផ្នែកខ្លះនៃប្រទេសកាណាដា និងភាគខាងជើង Greenland ត្រូវបានគេរំពឹងថានឹងបន្តនៅមានវត្តមានយូរទៀត បន្ទាប់ពីទឹកកកនៅមហាសមុទ្រអាក់ទិករលាយអស់។ អ្នកវិទ្យាសាស្ត្រមិនទាន់អាចកំណត់បាននៅឡើយថាពេលណា ដែលទឹកកកនៅក្នុងផែនដីរលាយអស់ (Last Blue Océan Event) ប៉ុន្តែនៅក្នុងអនាគតដ៏ខ្លីខាងមុខនេះ ផ្លូវទឹកនៅប៉ូលខាងជើងនឹងបើកជាលើកដំបូង។

ព្រឹត្តិការណ៍នេះប្រហែលជាមានអត្ថប្រយោជន៍ខ្លះដែរ បើតាមលោក Mike Pompeo អតីតរដ្ឋមន្ត្រីការបរទេសសហរដ្ឋអាមេរិក ធ្លាប់បានប្រកាសថា នៅពេលមហាសមុទ្រអាក់ទិកគ្មានទឹកកក មានន័យថា នាវាមកពីអាស៊ីអាចធ្វើដំណើរជិតជាងមុនរហូតដល់ 3,000 miles ទៅកាន់កំពង់ផែអឺរ៉ុបនារដូវក្ដៅ។ ប៉ុន្តែ យើងត្រូវដឹងថា ទឹកកកសមុទ្រអាក់ទិកជាធាតុផ្សំដ៏សំខាន់នៃប្រព័ន្ធអាកាសធាតុ។ វាចូលរួមចំណែកយ៉ាងសកម្មក្នុងការកាត់បន្ថយបរិមាណនៃពន្លឺព្រះអាទិត្យ ដែលជះកម្ដៅមកលើផែនដី។ អវត្តមានទឹកកកនៃមហាសមុទ្រនេះ នឹងពន្លឿនការកើនឡើងកម្ដៅបន្ថែមទៀត ហើយការកើនឡើងកម្ដៅនឹងធ្វើឱ្យផ្ទាំងទឹកកក Greenland រលាយលឿនជាងមុន ដែលនឹងធ្វើឱ្យកម្រិតទឹកសមុទ្រហក់ឡើងខ្ពស់។

សូមបញ្ជាក់ថា ការបាត់បង់ទឹកកកសមុទ្រនៅរដូវក្ដៅក៏ជាហេតុផលមួយ ដែលជំរុញឱ្យមានការផ្លាស់ប្ដូរចរន្តបរិយាកាស ផ្លូវព្យុះ និងសកម្មភាពជីវសាស្ត្រមហាសមុទ្រផងដែរ៕