ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
របាយការណ៍ថ្មីមួយបានបង្ហាញថា ប្រទេសចិនបានកំពុងនាំមុខសហរដ្ឋអាម៉េរិកក្នុងការស្រាវជ្រាវបច្ចេកវិទ្យាបន្ទះឈីប (semiconductor) ដោយបានបោះពុម្ពអត្ថបទស្រាវជ្រាវអំពីបច្ចេកវិទ្យានេះ ច្រើនជាងអាម៉េរិក ២ដង ក្នុងរយៈពេល ៥ឆ្នាំចុងក្រោយ។
ពីឆ្នាំ២០១៨ ដល់ឆ្នាំ២០២៣ ចិនបានបោះពុម្ពផ្សាយ ឯកសារស្រាវជ្រាវអំពីបច្ចេកវិទ្យាឈីបចំនួន ១៦០,០០០ ឯកសារ ដែលស្មើនឹង ៣៤ភាគរយ នៃការស្រាវជ្រាវសាកលក្នុងវិស័យនេះ, នេះបើតាមរបាយការណ៍របស់ Emerging Technology Observatory (ETO) នៃសាកលវិទ្យាល័យ Georgetown។ តាមការប្រៀបធៀប សហរដ្ឋអាម៉េរិក បានបោះពុម្ពផ្សាយការសិក្សាប្រហែល ៧១,០០០ ឯកសារ ដែលតំណាងឱ្យ ១៥ភាគរយ នៃទិន្នន័យសកល។
ស្ថាប័នចំនួន ៩ ក្នុងចំណោម ១០ ដែលបោះពុម្ពផ្សាយឯកសារស្រាវជ្រាវជាភាសាអង់គ្លេស អំពីបច្ចេកវិទ្យាបន្ទះឈីប មានមូលដ្ឋាននៅក្នុងប្រទេសចិន។ សារព័ត៌មាន South China Morning Post បានរាយការណ៍ថា ក្នុងចំណោមស្ថាប័នទាំង ៩នោះ ស្ថាប័នដែលលេចធ្លោបំផុត គឺ បណ្ឌិត្យសភាវិទ្យាសាស្ត្រចិន (CAS) សាកលវិទ្យាល័យបណ្ឌិត្យសភាវិទ្យាសាស្ត្រចិន (UCAS) និងសាកលវិទ្យាល័យស៊ីងហួ។
CAS តែមួយបានផលិតឯកសារស្រាវជ្រាវជាង ១៤, ៣០០ ដែលក្នុងចំណោមឯកសារទាំងនោះ មានច្រើនជាង ៣៤០០ ត្រូវបានអ្នកសិក្សាស្រាវជ្រាវបន្តទូទាំងពិភពលោក។ UCAS ជាប់ចំណាត់ថ្នាក់លេខ ២ ក្នុងប្រទេសចិន ជាមួយនឹងឯកសារសិក្សាជិត ៧, ៨៥០ ត្រូវបានបោះពុម្ពផ្សាយ។
លោក Zachary Arnold អ្នកវិភាគនៅ ETO បានសង្កត់ធ្ងន់ថា ខណៈពេលដែលចំនួននៃការបោះពុម្ព និងដកស្រង់សម្រាប់ការស្រាវជ្រាវ និងសិក្សាបន្ត មិនអាចបង្ហាញដោយផ្ទាល់អំពី ភាពលេចធ្លោនៃឧស្សាហកម្មបន្ទះឈីបរបស់ចិន ប៉ុន្តែវាបានបង្ហាញយ៉ាងច្បាស់អំពីការរីកចម្រើនយ៉ាងឆាប់រហ័សនៃសមត្ថភាពស្រាវជ្រាវ បច្ចេកវិទ្យាបន្ទះឈីបរបស់ចិន។
ការស្រាវជ្រាវអំពីបច្ចេកវិទ្យាបន្ទះឈីប នៅតែមានការប្រកួតប្រជែងរវាងចិន និងអាម៉េរិក ដែលជំរុញដោយការប្រកួតប្រជែងផ្នែកសេដ្ឋកិច្ច និងផលប្រយោជន៍ជាយុទ្ធសាស្ត្រ ដោយគូសបញ្ជាក់ពីតួនាទីសំខាន់របស់វិស័យនេះក្នុងការដឹកនាំផ្នែកបច្ចេកវិទ្យា និងភូមិសាស្ត្រនយោបាយ៕
