ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅចុងខែកញ្ញាខាងមុខនេះ រាជបណ្ឌិត្យសភាកម្ពុជា នឹងធ្វើជាម្ចាស់ផ្ទះ នៃសន្និសីទអន្តរជាតិលើកទី១៣ ដែលមានការចូលរួមពីអ្នកសិក្សាស្រាវជ្រាវពី៤ប្រទេស គឺកម្ពុជា ឡាវ វៀតណាម និងកូរ៉េ។ សម្រាប់សន្និសីទនេះ រាជបណ្ឌិតសភាកម្ពុជា នឹងបើកទូលាយសម្រាប់ការចូលរួមរបស់បញ្ញាវន្ត និងអ្នកស្រាវជ្រាវខ្មែរទាំងអស់ ដែលចង់បង្ហាញស្នាដៃស្រាវជ្រាវរបស់ខ្លួន។
លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា មានប្រសាសន៍ថា សន្និសីទអន្តរជាតិលើកទី១៣ គ្រោងនឹងប្រារព្ធធ្វើនៅថ្ងៃទី២៩-៣០ ខែកញ្ញា ឆ្នាំ២០២៥ខាងមុខ ដែលជាសន្និសីទអន្តរជាតិរវាងបណ្ឌិត្យសភានៃប្រទេសទាំង៤ គឺ កម្ពុជា ឡាវ វៀតណាម និងវិទ្យាស្ថានបរិស្ថានកូរ៉េ ដែលរាជបណ្ឌិត្យសភាកម្ពុជា តែងតែបានផ្លាស់វេនទទួលធ្វើជាម្ចាស់ផ្ទះរៀបចំ និងចូលរួមជាមួយបណ្ឌិត្យសភាវិទ្យាសាស្ត្រសង្គមឡាវ និងបណ្ឌិត្យសភាវិទ្យាសាស្ត្រសង្គមវៀតណាម ជារៀងរាល់ឆ្នាំ។
អគ្គលេខាធិការរាជបណ្ឌិត្យសភាកម្ពុជាបន្ថែមថា កន្លងមក វាគ្មិនដែលចូលរួមតំណាងឱ្យអ្នកសិក្សាស្រាវជ្រាវកម្ពុជា សុទ្ធសឹងតែជាមន្ត្រីស្រាវជ្រាវនៃរាជបណ្ឌិត្យសភាកម្ពុជា ប៉ុន្តែនៅក្នុងឆ្នាំ២០២៥នេះ ថ្នាក់ដឹកនាំរាជបណ្ឌិត្យសភាកម្ពុជា បានបើកចំហរចំពោះចូលរួមពីសំណាក់អ្នកសិក្សាស្រាវជ្រាវពីស្ថាប័នខាងក្រៅនៅក្នុងប្រទេសកម្ពុជា ដើម្បីជំរុញវិស័យសិក្សាស្រាវជ្រាវវិទ្យាសាស្ត្រ និងផ្ដល់ធាតុចូលជូនដល់ក្រសួង ស្ថាប័ន និងរដ្ឋាភិបាល ក្នុងគោលបំណងចូលរួមចំណែកនៅក្នុងការអភិវឌ្ឍសង្គមនិងសេដ្ឋកិច្ច។
គួរជម្រាបជូនថា សន្និសីទអន្តរជាតិលើកទី១៣ នឹងធ្វើឡើងនៅថ្ងៃទី២៩-៣០ ខែកញ្ញា ឆ្នាំ២០២៥ ក្រោមប្រធានបទ “សុខដុមនីយកម្មសង្គម សេដ្ឋកិច្ច និងវប្បធម៌នៅកម្ពុជា ឡាវ និងវៀតណាម” និងប្រធានបទ “ការផ្លាស់ប្ដូរបៃតងនៅកម្ពុជា ឡាវ និងវៀតណាម ផ្អែកលើមេរៀនដែលបានរៀនពីបទពិសោធន៍និងទស្សនៈរបស់ប្រទេសកូរ៉េ”។
យ៉ាងណាក៏ដោយសម្រាប់អត្ថបទ ឬលទ្ធផលស្រាវជ្រាវរបស់បេក្ខជនដែលមានបំណងចង់ដាក់បង្ហាញ គឺត្រូវប្រគល់យ៉ាងយូរបំផុតនៅត្រឹមខែសីហា ឆ្នាំ២០២៥ខាងមុខនេះ៕
