ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅអាយុត្រឹមតែ១៦ឆ្នាំប៉ុណ្ណោះ ប៉ុន្តែយុវជន Yevin Goonatilake បានទទួលទាំងបរិញ្ញាបត្រ និងបរិញ្ញាបត្រជាន់ខ្ពស់ ផ្នែកវិទ្យាសាស្ត្រកុំព្យូទ័រពីសាកលវិទ្យាល័យ George Mason ដោយទទួលបាន GPA ៤.០ លើសញ្ញាបត្រទាំងពីរ។
ជាជនជាតិដើមភាគតិច Leesburg មកពីរដ្ឋ Virginia សហរដ្ឋអាម៉េរិក Yevin បានបង្កើតប្រវត្តិសាស្ត្រ នៅកម្រិតមហាវិទ្យាល័យ កាលពីខែឧសភាកន្លងទៅ នៅពេលដែលគាត់បានក្លាយជាមនុស្សវ័យក្មេងបំផុត ដែលទទួលបានសញ្ញាបត្រកម្រិតអនុបណ្ឌិតពី GMU ។ ខណៈកាលពីដើមឆ្នាំកន្លងទៅ គាត់បានធ្វើឱ្យមហាវិទ្យាល័យ និងមិត្តភក្ដិរបស់គាត់ មានការភ្ញាក់ផ្អើលជាខ្លាំង ដោយរូបគេបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់, នេះបើយោងតាមទស្សនាវដ្ដី Northern Virginia បានរាយការណ៍។
Yevin បាននិយាយថា «ការធ្វើអ្វីៗបានមុនអ្នកដទៃ គឺជាអ្វីដែលខ្ញុំបានធ្វើពេញមួយជីវិតរបស់ខ្ញុំ ហើយយើងក៏មិនចាំបាច់ត្រូវធ្វើតាមអ្វីដែលមនុស្សជាច្រើនកំពុងធ្វើដែរ។»
GMU បានជាប់ចំណាត់ថ្នាក់ក្នុងចំណោមសាកលវិទ្យាល័យសាធារណៈកំពូលទាំង ៦០ នៅសហរដ្ឋអាម៉េរិក, នេះបើផ្អែកតាម U.S. News & World Report។
ឪពុកម្ដាយរបស់ Yevin សុទ្ធតែជាវិស្វករវិទ្យាសាស្ត្រកុំព្យូទ័រ ហើយពួកគាត់បានកត់សម្គាល់ឃើញសមត្ថភាពពិសេសរបស់ Yevin តាំងពីគាត់មានអាយុត្រឹម ៣ឆ្នាំមកម្ល៉េះ។ នៅអាយុត្រឹម ១១ឆ្នាំ Yevin បានទទួលក្រេឌីតសិក្សាគ្រប់គ្រាន់ ដើម្បីចុះឈ្មោះចូលរៀននៅ Northern Virginia Community College (NOVA) ជាកន្លែងដែលគាត់បានបញ្ចប់បរិញ្ញាបត្ររងនៅឆ្នាំ២០២៣ មុនពេលផ្លាស់ប្តូរទៅសិក្សាក្នុងកម្មវិធីថ្នាក់បរិញ្ញាបត្រជាន់ខ្ពស់របស់ GMU។
វគ្គសិក្សាភាគច្រើនរបស់គាត់ បានធ្វើឡើងតាមប្រព័ន្ធអ៊ីនធឺណិត ហើយដោយសារបញ្ហាជំងឺរាតត្បាត Covid-១៩ បានអនុញ្ញាតឱ្យ Yevin អភិវឌ្ឍសមត្ថភាព យ៉ាងស្ងប់ស្ងាត់ និងមិនបង្ហាញអាយុរបស់ខ្លួនឯង។
ក្រៅពីមានទេពកោសល្យខ្ពស់ក្នុងការសិក្សា Yevin ក៏ជាអ្នកលេងកីឡា Cricket អាជីពមួយរូបផងដែរ ដោយរូបគេអាចរក្សាតុល្យភាពបានយ៉ាងល្អ រវាងការហ្វឹកហាត់ និងការប្រកួត រួមជាមួយនឹងបន្ទុកនៃការសិក្សារបស់គេ។ អ្នកប្រាជ្ញវ័យជំទង់រូបនេះ បាននិយាយថា រូបគេត្រូវការទាំងកីឡា និងការសិក្សា ព្រោះការលេងកីឡា Cricket អាចជួយពង្រឹងសមត្ថភាពក្នុងការទំនាក់ទំនង និងជួយឱ្យរាងកាយរបស់គេរឹងមាំ។
សម្រាប់កិច្ចការបន្ទាប់ Yevin កំពុងពិចារណាបន្តការសិក្សាថ្នាក់បណ្ឌិត ដើម្បីអាចបង្រៀន និងធ្វើការស្រាវជ្រាវ។ យ៉ាងណាក៏ដោយ គាត់នៅតែបើកចំហរឱកាសផ្សេងទៀត សម្រាប់ខ្លួនឯង៕
