ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងការអប់រំមួយ យើងមិនអាចសង្កត់ធ្ងន់ទៅលើតែភាគីម្ខាងបាននោះទេ ពោលគឺយើងមិនអាចគិតថា សាលារៀនមួយមុខ កុមារអាចទទួលបានការរៀនសូត្រ ការអភិវឌ្ឍពេញលេញនោះឡើយ គឺមានតែការសហការគ្នារវាងឪពុកម្តាយ សាលារៀន ព្រមទាំងសហគមន៍ផងដែរ ដែលជារឿងសំខាន់ជួយឱ្យកុមារទទួលបានការអភិវឌ្ឍពេញលេញ ។
អ្នកស្រី អ៊ុក សូនីតា នាយិកាសិក្សាធិការ នៃបណ្តាញគ្រឹះស្ថានអប់រំ វេសឡាញ គ្រុប មានប្រសាសន៍ថា ការសហការគ្នារវាងសាលារៀន និងអាណាព្យាបាល គឺជាកត្តាសំខាន់ជួយឱ្យការអភិវឌ្ឍរបស់កុមារ និងយុវជន ទទួលបានភាពជោគជ័យ ក្នុងនោះបើតាមការសិក្សាស្រាវជ្រាវ នៅពេលមានការសហការ ក៏ដូចជាការជួយគាំទ្រទំនុកបម្រុងពីអាណាព្យាបាលចំពោះកូនៗនៅផ្ទះ ឃើញថា អត្រារៀនសូត្ររបស់កុមារ គឺទទួលបានខ្ពស់ជាងកុមារដែលមិនទទួលបានការទំនុកបម្រុង ការយកចិត្តទុកដាក់ពីឪពុកម្តាយនៅផ្ទះ។
នាយិកាសិក្សាធិការ នៃបណ្តាញគ្រឹះស្ថានអប់រំ វេសឡាញ គ្រុប មានប្រសាសន៍ថា ដើម្បីឱ្យសាលារៀន និងអាណាព្យាបាលអាចសហការគ្នាបានល្អក្នុងការជួយដល់ការសិក្សារបស់កូនៗ សាលារៀនគួរតែមានការអញ្ជើញអាណាព្យាបាលមកចូលរួមស្តាប់ និងបង្ហាញពីកម្មវិធីសិក្សាដែលកូនៗរបស់គាត់ត្រូវរៀន ប្រាប់ពីសម្ភារៈសិក្សាដែលត្រូវមាន អំពីកិច្ចការសាលាដែលត្រូវធ្វើ អំពីការប្រឡង ក៏ដូចជាពិន្ទុប្រឡងជាដើម ដើម្បីអាណាព្យាបាលមានភាពងាយស្រួលនៅក្នុងការជួយកូនៗរបស់គាត់នៅក្នុងការសិក្សា ។ ជាមួយគ្នានេះ សាលាក៏គួរតែមានការជូនដំណឹងដល់អាណាព្យាបាលពីកាលវិភាគសិក្សារបស់កូនៗផងដែរ។
បន្ថែមលើនេះ អ្នកអាណាព្យាបាល ក៏ត្រូវយល់ពីរបៀបចិញ្ចឹមកូន ការអភិវឌ្ឍរបស់កុមារ ឬយុវជនជាដើម ដែលវាជាបំណិនមួយក្នុងការអប់រំ ងាយស្រួលនៅក្នុងការជួយកូនៗ ។ នៅសាលារៀនវេស្ទឡាញន៍វិញ សាលាតែងរៀបចំជាសិក្ខាសាលាពីរបៀបចិញ្ចឹមកូននេះសម្រាប់អាណាព្យាបាល ថែមលើនេះ សាលាក៏តែងតែមានជាកម្មវិធីផ្សេងៗទៀតដើម្បីផ្តល់ភាពជិតស្និទ្ធរវាងឪពុកម្តាយ និងកូនៗ ដូចជា កម្មវិធី «អ្នកអានអនាមឹក» ដោយការអញ្ជើញឪពុកម្តាយមកអានសៀវភៅនៅក្នុងថ្នាក់របស់កូនគាត់ ឬអញ្ជើញឪពុកម្តាយមកចម្អិនម្ហូបអាហារជាមួយកូនៗនៅសាលាជាដើម ដែលសកម្មភាពទាំងនេះ វាជាការបញ្រ្ជាបមួយឱ្យអាណាព្យាបាលដឹងថា កុមារមានចំណាប់អារម្មណ៍នៅពេលដែលទទួលបានការចូលរួមពីឪពុកម្តាយ ធ្វើឱ្យពួកគេសប្បាយចិត្តនៅក្នុងការរៀន។
យ៉ាងណាក៏ដោយបើតាម អ្នកស្រី អ៊ុក សូនីតា ប្រសិនបើយើងចង់ឱ្យកុមារ ឬយុវជនមានឥរិយាបទល្អនៅក្នុងការរៀនសូត្រ ស្រឡាញ់ការរៀនសូត្រ គឺឪពុកម្តាយ ត្រូវធ្វើជាគំរូដ៏អស្ចារ្យមួយនៅផ្ទះ ហើយនៅសាលារៀន គឺមានលោកអ្នកគ្រូ ជាអ្នកណែនាំបន្ថែម ដូច្នេះភាគីទាំងពីរ ពោលគឺអាណាព្យាបាល និងសាលារៀន ត្រូវពួតដៃគ្នា នោះកុមារ និងយុវជន នឹងទទួលបានលទ្ធផលល្អប្រសើរ៕
