ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមរបាយការណ៍ថ្មីៗនេះរបស់អង្គការសុខភាពពិភពលោក (WHO) បានឱ្យដឹងថា មនុស្សពេញវ័យម្នាក់ក្នុងចំណោម ៥នាក់នៅតែញៀនថ្នាំជក់ និងមានអ្នកស្លាប់រៀងរាល់ឆ្នាំ ទោះបីជាអត្រាអ្នកជក់បារីមានការថយចុះក៏ដោយ។ នេះបើតាមការចុះផ្សាយរបស់សារព័ត៌មានតួកគី Anadolu agency (AA)។
ការប្រើប្រាស់ថ្នាំជក់បានធ្លាក់ចុះពី ១.៣៨ពាន់លាននាក់ក្នុងឆ្នាំ២០០០ មកត្រឹម ១.២ពាន់លាននាក់ក្នុងឆ្នាំ២០២៤។ ហើយចាប់តាំងពីឆ្នាំ២០១០ មនុស្សចំនួន១២០លាននាក់បានឈប់ជក់បារី តួលេខនេះធ្លាក់ចុះប្រហែល ២៧%។ ប៉ុន្តែមនុស្សរាប់លាននាក់នៅតែបន្តស្លាប់ជារៀងរាល់ឆ្នាំ ដោយសារជំងឺដែលអាចការពារបានទាក់ទងនឹងថ្នាំជក់។
អង្គការសុខភាពពិភពលោក (WHO) បានឱ្យដឹងថា យ៉ាងហោចណាស់មនុស្ស ១៥លាននាក់មានអាយុពី ១៣ ទៅ ១៥ឆ្នាំបានជក់បារីអេឡិចត្រូនិកនៅទូទាំងពិភពលោក ក្នុងនោះមនុស្សវ័យក្មេងកើនឡើងជាមធ្យម ៩ដង ច្រើនជាងមនុស្សពេញវ័យ នេះបើយោងតាមទិន្នន័យក្នុងប្រទេសជាច្រើន។
ផ្អែកតាមការប៉ាន់ប្រមាណជាសកលលើកដំបូង នៃការជក់បារីអេឡិចត្រូនិក, អង្គការ WHO បានបង្ហាញថា មានមនុស្សជាង ១០០លាននាក់ទូទាំងពិភពលោក ឥឡូវនេះកំពុងជក់បារី ក្នុងនោះមានមនុស្សពេញវ័យប្រហែល ៨៦លាននាក់ ដែលភាគច្រើនជាប្រជាជនប្រទេសមានប្រាក់ចំណូលខ្ពស់។ តួលេខនេះសបញ្ជាក់ថា មនុស្សលើពិភពលោកកំពុងងាកចេញពីការប្រើប្រាស់ថ្នាំជក់ប្រពៃណីទៅជក់បារីអេឡិចត្រូនិកវិញ។
ពាក់ព័ន្ធនឹងបញ្ហានេះ អគ្គនាយកអង្គការសុខភាពពិភពលោក លោក Tedros Adhanom Ghebreyesus បាននិយាយថា មនុស្សរាប់លាននាក់កំពុងឈប់ ឬមិនជក់ ដោយសារកិច្ចខិតខំប្រឹងប្រែងគ្រប់គ្រងថ្នាំជក់របស់ប្រទេសជុំវិញពិភពលោក។
លោកបន្ថែមថា ដើម្បីឆ្លើយតបទៅនឹងការរីកចម្រើនដ៏ខ្លាំងក្លានេះ ឧស្សាហកម្មថ្នាំជក់ត្រូវតែបង្កើនការប្រយុទ្ធប្រឆាំងនឹងផលិតផលជាតិនីកូទីនថ្មី ដោយដាក់គោលដៅតឹងរ៉ឹងបំផុតចំពោះយុវជន។ ទន្ទឹមគ្នានេះ រដ្ឋាភិបាលនានាក៏ត្រូវតែធ្វើសកម្មភាពឱ្យបានលឿន និងខ្លាំងក្លាជាងមុនផងដែរ នៅក្នុងការអនុវត្តគោលនយោបាយគ្រប់គ្រងថ្នាំជក់៕
ប្រភព ៖ Anadolu agency និង The Straits Times
ប្រែសម្រួល ៖ ឈឹម ទីណា
