ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាឱកាសល្អសម្រាប់អ្នកមានចំណូលចិត្តផ្នែកតែងនិពន្ធ បានបង្ហាញស្នាដៃ និងដូចជាចូលរួមលើកស្ទួយវិស័យអំណានជាភាសាខ្មែរនៅកម្ពុជា, ពេលនេះ អង្គការស៊ីប៉ា បានជ្រើសរើសបេក្ខជនចូលរួមប្រកួតស្នាដៃប្រលោមលោក លើកទី១ ពានរង្វាន់ឡាដាវ៉ាន់ ឆ្នាំ២០២៥ ក្រោមប្រធានបទ «ជីវិត និងក្ដីសង្ឃឹម»។
លោក ហុក សុទ្ធិ នាយកអង្គការស៊ីប៉ា ប្រសាសន៍ថា ពានរង្វាន់ឡាដាវ៉ាន់ គឺជាការយកឈ្មោះតាមអ្នកស្រី ប៉ែន ឡាដាវ៉ាន់ (ឡាដា វ៉ាឡង់តាំង ឌុយឡាក់) ដែលជាជនភៀសខ្លួនខ្មែរម្នាក់ទៅរស់នៅប្រទេសបារាំងក្នុងឆ្នាំ១៩៧៩។ លោក សុទ្ធិ បន្តថា នៅឆ្នាំ២០២០ ស៊ីប៉ាបានបោះពុម្ពផ្សាយសៀវភៅប្រលោមលោកដែលអ្នកស្រី ឡាដាវ៉ាន់ ជាអ្នកតែងនិពន្ធ ក្រោមចំណងជើងថា «ឡាដាវ៉ាន់ ផ្កាអរគីដេព្រៃ» រម្លឹករឿងរ៉ាវកើតឡើងជាច្រើនដំណាក់កាលដែលអ្នកស្រី និងប្រជាជនខ្មែរធ្លាប់ឆ្លងកាត់ ទាំងជីវិតនៅជនបទ ជីវិតក្នុងសង្គ្រាម ការជួបជុំ និងការព្រាត់ប្រាសគ្នាក្រោយសង្គ្រាម។
ដោយសហការជាមួយលោក Christophe Vallantin Dulac ដែលជាស្វាមីរបស់អ្នកស្រី ឡាដាវ៉ាន់ ស៊ីប៉ាក៏បង្កើតពានរង្វាន់ឡាដាវ៉ាន់នេះឡើង ហើយនៅឆ្នាំ២០២៥នេះ បានជ្រើសរើសប្រធានបទ «ជីវិត និងក្ដីសង្ឃឹម» គឺក្នុងគោលបំណង ទី១. រម្លឹកដល់ជីវិតតស៊ូរបស់អ្នកស្រី ឡាដាវ៉ាន់ ដែលទោះជាស្ថានភាពលំបាកយ៉ាងណា អ្នកស្រីនៅតែមានស្នាមញញឹម និងក្ដីសង្ឃឹម, ទី២. ផ្ដល់ឱកាសឱ្យអ្នកនិពន្ធខ្មែរ ឬអ្នកចូលចិត្តតែងនិពន្ធបង្ហាញស្នាដៃរបស់ខ្លួន និង ទី៣. ចូលរួមលើកស្ទួយវិស័យអំណានជាភាសាខ្មែរនៅកម្ពុជា។
លោក ហុក សុទ្ធិ បន្ថែមថា ប្រធានបទ «ជីវិត និងក្ដីសង្ឃឹម» គឺសំដៅលើ ជីវិត និងក្ដីសង្ឃឹមជាពន្លឺមួយដែលនាំផ្លូវមនុស្សទាំងឡាយ។ ជីវិត ជាការធ្វើដំណើរមួយដែលមានទាំងភាពរីករាយ និងវិញ្ញាសានានាដែលអនុញ្ញាតឱ្យយើងធំធាត់។ ឯក្ដីសង្ឃឹមជាកម្លាំងពិសេសមួយធ្វើឱ្យយើងជឿថា នឹងមានអនាគតល្អប្រសើរ ទោះបីជួបបញ្ហាលំបាកយ៉ាងណា។ “វាធ្វើឱ្យយើងស្រមើស្រមៃ តស៊ូ និងមើលឃើញសោភ័ណរបស់ពិភពដែលយើងរស់នៅ ទោះបីពិភពនោះមិនល្អឥតខ្ចោះក្ដី”។
នាយកអង្គការស៊ីប៉ា ក៏បានលើកទឹកចិត្តឱ្យអ្នកនិពន្ធ អ្នកស្រឡាញ់ការសរសេរ ចូលរួមដាក់ស្នាដៃប្រកួតក្នុងកម្មវិធីនេះឱ្យបានច្រើន។
សម្រាប់លក្ខខណ្ឌចូលរួម ៖ បេក្ខជនត្រូវតែជាជនជាតិខ្មែរ, អត្ថបទត្រូវសរសេរជាភាសាខ្មែរ ដោយភ្ជាប់មកជាមួយនូវប្រវត្តិរូបសង្ខេប និងចំណាប់អារម្មណ៍ផ្ទាល់ខ្លួនចំពោះការដាក់បេក្ខភាពចូលរួមក្នុងការប្រកួតនេះ (១ទំព័រច្រើនបំផុត)។ ទន្ទឹមគ្នានេះ ស្នាដៃដែលដាក់ចូលរួមប្រកួត ត្រូវតែគោរពតាមប្រធានបទ «ជីវិត និងក្តីសង្ឃឹម» ហើយត្រូវផ្តោតសំខាន់សម្រាប់អ្នកអានដែលមានអាយុចាប់ពី១៥ឆ្នាំឡើង។ បេក្ខជនម្នាក់អាចដាក់ស្នាដៃប្រកួតបានតែ១គត់ ហើយត្រូវតែជាស្នាដៃដែលមិនធ្លាប់ទទួលបានចំណាត់ថ្នាក់ ពានរង្វាន់ណាមួយពីមុនមក ឬមិនធ្លាប់បោះពុម្ពផ្សាយរួច។ ជាពិសេស ស្នាដៃត្រូវវាយជាអត្ថបទដោយប្រើយូនីកូដខ្មែរ ទំហំអក្សរ១២ ពុម្ពអក្សរ Khmer OS Battambang ខ្នាត A4 ប្រមាណពី ៧០ ទៅ ១០០ ទំព័រ ហើយពាក្យពេចន៍ត្រូវគោរពតាមវចនានុក្រមសម្ដេចព្រះសង្ឃរាជ្យ ជួន ណាត។
ជ័យលាភីនឹងទទួលបានរង្វាន់ រួមមាន ជ័យលាភីលេខ១ ទទួលបានពាន វិញ្ញាបនបត្រ និងថវិកា ២លានរៀល, ជ័យលាភីលេខ២ ទទួលបានពាន វិញ្ញាបនបត្រ និងថវិកា ១លាន៥សែនរៀល, និងជ័យលាភីលេខ៣ ទទួលបានពាន វិញ្ញាបនបត្រ និងថវិកា ១លានរៀល។
ទទួលស្នាដៃចាប់ពីថ្ងៃផ្សាយដំណឹងនេះ រហូតដល់ថ្ងៃទី១ ខែសីហា ឆ្នាំ២០២៥ វេលាម៉ោង៥ល្ងាចជាកំហិត។ ការប្រកាសជ័យលាភី និងការប្រគល់រង្វាន់នឹងប្រព្រឹត្តទៅក្នុងពិធីសម្ពោធពិព័រណ៍សៀវភៅកម្ពុជាលើកទី១២ នាដើមខែធ្នូ ឆ្នាំ២០២៥។
គួរជំរាបជូនថា អ្នកឈ្នះក្នុងការប្រកួតនឹងមានឱកាសបោះពុម្ពស្នាដៃ ដោយមានការដឹកនាំ និងសំណើកែលម្អពីស៊ីប៉ា៕
