បច្ចេកវិទ្យាបញ្ញាសិប្បនិម្មិត (AI) កំពុងដើរតួនាទីយ៉ាងសំខាន់ក្នុងការគាំទ្រ និងជំរុញកំណើនសេដ្ឋកិច្ច និងកសាងសង្គមឌីជីថលនៅក្នុងបរិបទប្រទេសកម្ពុជាបច្ចុប្បន្ន។ ទោះជាយ៉ាងនេះក្តី បច្ចេកវិទ្យាមួយនេះ ស្ថិតនៅក្នុងដំណាក់កាលអភិវឌ្ឍន៍ដំបូង និងទាមទារឱ្យបន្តការអភិវឌ្ឍ ដើម្បីឱ្យវានៅតែអាចមានសមត្ថភាពជំរុញការអប់រំទំនើប (នវានុវត្តន៍)។

ខាងក្រោមនេះ ជាសមិទ្ធិផល និងភាពរីកចម្រើននៃការស្រាវជ្រាវលើបច្ចេកវិទ្យាបញ្ញាសិប្បនិម្មិត (AI) បង្កើតដោយកូនខ្មែរដែលអាចប្រើប្រាស់ក្នុងការអប់រំឌីជីថល ៖

ទី១. កម្មវិធីបកប្រែភាសាខ្មែរប្រៃយ៍ ៖ ជាបច្ចេកវិទ្យាដែលប្រើប្រាស់បញ្ញាសិប្បនិម្មិតដើម្បីបកប្រែពីភាសាខ្មែរ ទៅភាសាខ្មែរប្រៃយ៍ ហើយត្រូវបានបង្កើតឡើងជាពិសេសដើម្បីផ្ដល់ភាពងាយស្រួលដល់គ្រូបង្រៀនក្នុងការរៀបចំឯកសារអានជាអក្សរខ្មែរប្រៃយ៍ជូនដល់កុមារ និងសិស្សានុសិស្សដែលពិការភ្នែក ឬខ្សោយគំហើញឱ្យកាន់តែបានលឿននិងមានប្រសិទ្ធភាពខ្ពស់។ កម្មវិធីនេះ បង្កើតឡើងដោយបណ្ឌិត្យសភាបច្ចេកវិទ្យាឌីជីថលកម្ពុជា (CADT) ក្រោមការសហការជាមួយវិទ្យាស្ថានជាតិអប់រំពិសេស។

ទី២. បណ្ណាល័យឌីជីថលសាស្ត្រាស្លឹករឹតខ្មែរ ៖ ប្រើប្រាស់បញ្ញាសិប្បនិម្មិត (AI) អភិវឌ្ឍដោយក្រុមអ្នកស្រាវជ្រាវនៃវិទ្យាស្ថានបច្ចេកវិទ្យាកម្ពុជាដែលអាចមានសមត្ថភាពក្នុងការអាន និងស្វែងយល់ពីអក្សរខ្មែរដែលសរសេរនៅលើស្លឹករឹត។ បណ្ណាល័យឌីជីថលនេះ ក៏អាចទាញយកដោយស្វ័យប្រវត្តិនូវព័ត៌មានសំខាន់ៗពីសាស្ត្រាស្លឹករឹត ដូចជា ឈ្មោះ កាលបរិច្ឆេទ និងពាក្យគន្លឹះផ្សេងៗ។

ទី៣. ប្រព័ន្ធបញ្ញាសិប្បនិម្មិត (AI) ដើម្បីបង្កើនប្រសិទ្ធភាពក្នុងការរៀន និងបង្រៀនសរសេរអក្សរខ្មែរ ៖ ជាកម្មវិធីបង្កើនប្រសិទ្ធភាពក្នុងការរៀន និងបង្រៀនសរសេរអក្សរខ្មែរ ដោយមន្ទីរពិសោធន៍ ViLa Lab នៃវិទ្យាស្ថានបច្ចេកវិទ្យាកម្ពុជា (សាលាតិចណូ)។ ប្រព័ន្ធនេះ អាចជួយឱ្យការសរសេរអក្សរខ្មែរកាន់តែត្រឹមត្រូវតាមក្បួនខ្នាត ដោយប្រើប្រាស់បញ្ញាសិប្បនិម្មិតក្នុងការវិភាគ និងវាយតម្លៃអក្សរដែលសរសេររួចដោយស្វ័យប្រវត្តិ។ កម្មវិធីនេះ អាចធ្វើឱ្យការរៀនភាសាខ្មែរកាន់តែងាយស្រួល ជាពិសេសសម្រាប់ថ្នាក់មតេ្តយ្យ និងបឋម ហើយក៏អាចជំរុញការផ្សព្វផ្សាយភាសាខ្មែរទៅកាន់ជនបរទេសដែលចង់រៀនភាសាខ្មែរ។

ទី៤. កម្មវិធីពង្រឹងសមត្ថភាពអំណាន Akhara – អក្ខរា ៖ កម្មវិធីនេះ​បង្កើតដោយមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយនៃក្រសួងអប់រំ យុវជន និងកីឡា។ ជាកម្មវិធីទូរស័ព្ទបច្ចេកវិទ្យាអប់រំដំបូងបំផុតដែលប្រើប្រាស់បញ្ញាសិប្បនិម្មិត ដើម្បីគាំទ្រដល់សមត្ថភាពអំណានជាខេមរភាសា ជាពិសេសចំពោះសិស្សនៅកម្រិតមធ្យមសិក្សា ដែលមានបញ្ហាផ្នែកអំណាន។ កម្មវិធីទូរស័ព្ទ «អក្ខរា» មានមុខងារចំនួន៧ ដូចជា កម្រិតភាពលំបាកនៃអត្ថបទ ការស្គាល់ពាក្យនិងអត្ថន័យពាក្យ ការស្តាប់សូរ ការអនុវត្តសំណួរ ការហាត់សរសេរអត្ថបទ ការហាត់អាន និងការអានត្រូវសូរនិងល្បឿន។ កម្មវិធីពង្រឹងអំណាន «អក្ខរា» ក៏អាចទាញយកតាមរយៈ https://onelink.to/pkxxsb  ។

ទី៥. កម្មវិធីត្រួតពិនិត្យ និងគ្រប់គ្រងការចម្លងស្នាដៃនិពន្ធជាភាសាខ្មែរ ៖ ជាកម្មវិធីកុំព្យូទ័រថ្មីមួយទៀត ដែលប្រើប្រាស់បច្ចេកវិទ្យាបញ្ញាសិប្បនិម្មិត ដើម្បីត្រួតពិនិត្យការចម្លងស្នាដៃនិពន្ធ នៃសៀវភៅ ឬអត្ថបទនិពន្ធ ជាលក្ខណៈឃ្លា កថាខណ្ឌ ឬទំព័រ។ កម្មវិធីនេះ មានស្នាដៃសៀវភៅដែលទើបនិពន្ធថ្មី សម្រាប់ការរៀននិងបង្រៀននៅកម្រិតឧត្តមសិក្សាប្រមាណ១០០០ចំណងជើង ហើយរាល់ស្នាដៃនិពន្ធថ្មីៗដែលប្រើប្រាស់ថវិកាគាំទ្ររបស់មូលនិធិសម្រាប់ការស្រាវជ្រាវ គំនិតច្នៃប្រឌិត និងនវានុវត្តន៍ នៃក្រសួងអប់រំ យុវជន និងកីឡា នឹងត្រូវត្រួតពិនិត្យដោយកម្មវិធីនេះ ដើម្បីបង្ការការចម្លង។ កម្មវិធីនេះបង្កើតដោយមូលនិធិសម្រាប់ការស្រាវជ្រាវ គំនិតច្នៃប្រឌិត និងនវានុវត្តន៍ នៃក្រសួងអប់រំ យុវជន និងកីឡា៕