ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងសន្និសីទ និងពិព័រណ៍បច្ចេកវិទ្យាអប់រំកម្ពុជា លើកទី១ ក្រោមប្រធានបទ “មាគ៌ាកម្ពុជាឆ្ពោះទៅកាន់ការអប់រំឌីជីថល” នាថ្ងៃទី១៧ ខែកុម្ភៈ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានស្នើឱ្យគណៈគ្រប់គ្រងសាលាទាំងអស់ដាក់បញ្ចូលបញ្ញាសិប្បនិម្មិត (AI) ទៅតាមសាលារៀន និងសាលាបណ្ដុះបណ្ដាលគ្រូ ដើម្បីជាជំនួយដល់ការរៀន និងបង្រៀន។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា បញ្ញាសិប្បនិម្មិត (AI) នឹងក្លាយជាឧបករណ៍មួយមានលក្ខណៈស្វ័យប្រវត្តិ ជំនាញខ្លះត្រូវបាត់បង់ និងជំនួសដោយបច្ចេកវិទ្យា។ ដូច្នេះ ប្រសិនបើយុវជនមិនបានត្រៀមខ្លួនចាប់យកបច្ចេកវិទ្យា នឹងដើរមិនទាន់គេនោះទេ។
រដ្ឋមន្រ្តីក្រសួងអប់រំ បន្ថែមថា កន្លងមកក្រសួងបានដាក់ឱ្យសាកល្បងការរៀន និងបង្រៀនបញ្ញាសិប្បនិម្មិត (AI) ដើម្បីឱ្យគរុសិស្ស និងសាលាជំនាន់ថ្មី ប្រើប្រាស់។ បន្ទាប់ពីបានដាក់សាកល្បងរួច ឃើញថា គ្រូបង្រៀនចេះប្រើប្រាស់បញ្ញាសប្បនិម្មិត (AI) និង Chart GPT រៀបចំខ្លឹមសារមេរៀនបានលឿន មានប្រសិទ្ធភាព ចំណាយពេលតិច និងកាត់បន្ថយបន្ទុកគ្រូ។ សម្រាប់សិស្សវិញ នៅពេលមិនយល់ចំណុចណាមួយ ពួកគេអាចសួរបញ្ញាសិប្បនិម្មិត (AI) ទាំងមុខវិជ្ជាគណិតវិទ្យា វិទ្យាសាស្រ្ត ដោយនឹងទទួលបានចម្លើយភ្លាមៗ។
ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ក្រសួងអប់រំ បានរៀបចំជាក្របខណ្ឌបញ្ញាសិប្បនិម្មិត (AI) មួយ ដើម្បីបញ្រ្ជាបទៅសាលាផ្សេងទៀត ដោយបង្កើតជាសាលាឌីជីថលមួយផ្សារភ្ជាប់ទៅនឹងសាលារៀនជំនាន់ថ្មី និងគ្រឹះស្ថានបណ្ដុះបណ្ដាលគ្រូ ក៏ដូចជាសាលាផ្សេងទៀតដែលចង់ប្រើប្រាស់បញ្ញាសិប្បនិម្មិត (AI) ជំនួយក្នុងការរៀន និងបង្រៀន។
បើតាម ឯកឧត្តមបណ្ឌិតសភាចារ្យ ចំពោះបញ្ហាប្រឈមរបស់សាលានៅតំបន់ដាច់ស្រយាល ដែលពុំមានប្រព័ន្ធអ៊ីធឺណិតគ្រប់គ្រាន់ ហើយដើម្បីអាចប្រើប្រាស់បញ្ញាសប្បនិម្មិត (AI) ក្នុងការរៀន និងបង្រៀនបាន ក្រសួងអប់រំ លើកទឹកចិត្តឱ្យសាលានីមួយៗភ្ជាប់ទំនាក់ទំនងជាមួយក្រសួងប្រៃសណីយ៍ និងទូរគមនាគមន៍ បង្កើតជាមជ្ឈមណ្ឌលឌីជីថល, បង្កើតជាសាលាធនធានដើម្បីបំពាក់ប្រព័ន្ធអ៊ីធឺណិត និងលើកទឹមចិត្តឱ្យប្រើប្រាស់ទូរស័ព្ទដៃ។
អ្នកស្រី អាង សុគន្ធារី នាយកប្រតិបត្តិក្រុមហ៊ុន Hybrid Learning Ocean Co., Ltd ផ្ដោតលើការប្រើប្រាស់បញ្ញាសិប្បនិម្មិត (AI) ជំនួយដល់ការរៀន និងបង្រៀន មានប្រសាសន៍ថា បច្ចុប្បន្ននេះ ជាពេលវេលាត្រឹមត្រូវក្នុងការណែនាំអំពីបញ្ញាសប្បនិម្មិត (AI) ឱ្យអ្នកសិក្សាបានយល់ ពោលគឺ ទី១ ជួយពន្លឿនសមត្ថភាពអ្នកសិក្សាដើរទាន់តម្រូវការទីផ្សារការងារ និងពិភពលោក ទី២ អាចស្រាវជ្រាវប្រភពព័ត៌មានបានច្រើន។
នាយកប្រតិបត្តិក្រុមហ៊ុន Hybrid Learning Ocean Co., Ltd បញ្ជាក់បន្ថែមថា បើទោះបីជាបញ្ញាសប្បនិម្មិត (AI) ផ្ដល់ភាពងាយស្រួលក្នុងការផ្ដល់ចម្លើយ ប៉ុន្តែក៏ទាមទារឱ្យអ្នកប្រើប្រាស់មានចំណេះដឹងមូលដ្ឋានគ្រឹះ ព្រោះមិនមែនគ្រប់សំណួរសុទ្ធតែអាចសួរបញ្ញាសប្បនិម្មិត (AI) បានឡើយ។
អ្នកស្រី អាង សុគន្ធារី បន្ថែមថា ការយល់ដឹងអំពីបច្ចេកវិទ្យាអប់រំ គឺជារឿងចាំបាច់សម្រាប់អ្នកសិក្សា អ្នកអប់រំ ក៏ដូចជាលោកគ្រូ អ្នកគ្រូ។ ដូច្នេះអ្នកស្រី អាង សុគន្ធារី សង្ឃឹមថា បញ្ញាសប្បនិម្មិត (AI) នឹងបានប្រើប្រាស់ទៅដល់សាលារៀននៅតំបន់ឆ្ងាយៗ ជាពិសេសនៅតំបន់ដាច់ស្រយាល៕
