កម្មវិធីប្រកួតរត់របស់ក្រុមរត់នាគដើម្បីអនាគតរបស់កុមារ (Neak Run For Children’s Future) បានប្រព្រឹត្តទៅ​កាលពីថ្ងៃទី១៥ ខែកុម្ភៈ ឆ្នាំ២០២៥ចុងសប្តាហ៍កន្លងទៅនេះ នៅបុរីប៉េងហួតបឹងស្នោរ ដោយមានអ្នកចូលរួមប្រមាណ៦០០នាក់ ដើម្បីលើកកម្ពស់ការយល់ដឹងក៏ដូចរៃអង្គាសជាទឹកប្រាក់ដើម្បីបរិច្ចាកនិងជួយឧបត្ថម្ភដល់កម្មវិធីអប់រំរបស់ អង្គការផ្កាយសមុទ្រ (ISF CAMBODIA)។

លោក Christopher ដែលជាស្ថាបនិកក្រុមរត់នាគ (Neak Running Club) ដែលជាអ្នកស្រលាញ់ការរត់ បានលើកឡើងថា នៅក្នុងកំឡុងពេលដែលលោករត់តាមដងទន្លេ ជារឿយៗលោកតែងតែបានឃើញក្មេងៗមួយចំនួនកំពុងតែលក់ផ្កា ឬក៏ពេលខ្លះកំពុងតែគេងតាមច្រាំងទន្លេដោយសារពួកគេគ្មានផ្ទះសម្បែង ខណៈពេលដែលលោកគិតថា ក្មេងៗគឺគួរតែនៅក្នុងសាលារៀន និងមានពេលវេលាគ្រប់គ្រាន់ដើម្បីផ្ដោតទៅលើការសិក្សា។ ដោយមានអារម្មណ៍ខ្លោចចិត្តនិងអាណិតអាសូរចំពោះទិដ្ឋភាពជាក់ស្ដែងមួយនោះ ទើបបានធ្វើឱ្យ​លោកមានជំនឿមួយថា បើទោះបីជាមនុស្សម្នាក់មិនអាចផ្លាស់ប្ដូរពិភពលោកម្នាក់ឯងបានក៏ពិតមែន ក៏ប៉ុន្តែប្រសិនបើពួកយើងរួមគ្នាធ្វើជាសហគមន៍ដែលប្រកបទៅដោយភាពសាមគ្គីជាធ្លុងមួយ នោះគឺអាចធ្វើអោយយើងសម្រេចវាបាន។

យោងទៅតាមអង្គការ យូនីសេហ្វ (UNICEF, 2023) កុមារនៅក្នុងប្រទេសកម្ពុជាជិតបីលាននាក់រស់នៅក្នុងភាពក្រីក្រ ហើយ 10% នៃចំនួននោះគឺមិនទទួលបានការអប់រំនៅក្នុងសាលារៀនឡើយ បើយោងតាម Hamanarium (Hamanarium, 2024)។ ស្ថិតិទាំងអស់នេះបានក្រើនរំលឹកឱ្យ​យើងដឹងអំពីផលវិបាកដែលកុមារកម្ពុជាកំពុងនឹងជួបប្រទះ ហើយកម្មវិធីរត់របស់នាគមួយនេះគឺមិនត្រឹមតែជាព្រឹត្តិការណ៍សាមញ្ញមួយនោះទេ តែវាក៏ជាយុទ្ធនាការដ៏មានឥទ្ធិពលមួយដែលអាចរៃអង្គាសថវិកាដើម្បីជួយទៅដល់ការផ្គត់ផ្គង់ការអប់រំសម្រាប់កុមារដែលកំពុងតែខ្វះខាតនេះ។ កម្មវិធីមួយនេះជាកម្មវិធីដែលបានលក់សំបុត្រអស់ជាមួយនឹងអ្នករត់ប្រមាណជា 600 នាក់ដែលលើសពីការរំពឹងទុក។ នេះមិនត្រឹមតែបានបង្ហាញឱ្យ​ឃើញច្បាស់អំពីឆន្ទះមោះមុតរបស់កីឡាករប៉ុណ្ណោះទេ វាក៏បានបង្ហាញអំពីការប្ដេជ្ញាចិត្តដើម្បីធានាបានទៅលើការផ្លាស់ប្ដូរដ៏យូរអង្វែងសម្រាប់កុមារទាំងអស់នេះផងដែរ។

ជាលទ្ធផលបានពីកម្មវិធីនេះ ថវិការៃអង្គាសទាំងអស់ដែលត្រូវបានប្រមូលឡើងនៅក្នុងកម្មវិធីរត់នាគមួយនេះ គឺនឹងរួមចំណែកដល់ការផ្លាស់ប្តូរជាវិជ្ជមានសម្រាប់សង្គម ដោយគ្រប់អ្នករត់ អ្នកឧបត្ថម្ភ និងអ្នកជួយគាំទ្រទាំងអស់គឺសុទ្ធតែបានចូលរួមចំណែកជួយទៅដល់កុមារដែលខ្វះខាតឱកាសឱ្យ​ទទួលបាននូវការអប់រំមួយដែលសមរម្យ។ កម្មវិធី អប់រំពន្លឿន (Catch-up Education) របស់ អង្គការផ្កាយសមុទ្រ នឹងត្រូវទទួលបានផលប្រយោជន៍ពីប្រាក់រៃអង្គាសនៃកម្មវិធីរត់មួយនេះ ក្នុងគោលដៅគាំទ្រដល់កុមារដែលបានបោះបង់ចោលការសិក្សារ ឬកំពុងតែងាយរងគ្រោះ ឱ្យ​បានចូលរៀន និងតាមទាន់កុមារដទៃទៀតដែលមានវ័យប្រហាក់ប្រហែលគ្នា និងដើម្បីអាចកសាងអនាគតដល់ត្រចះត្រចង់មួយ ដែលនឹងជួយបំបែកនៅវដ្តនៃភាពក្រីក្រ នៅកម្ពុជាផងដែរ។

លោក Christopher អ្នកផ្តួចផ្ដើមក្រុមរត់នាគបាននិយាយថា ព្រឹត្តិការណ៍រត់មួយនេះ មិនត្រឹមតែជាការរត់ប្រណាំងប៉ុណ្ណោះទេ តែវាគឺជាការរត់ដើម្បីក្តីសង្ឃឹម និងជាការរត់ដើម្បីអនាគតមួយដែលក្មេងៗទាំងអស់អាចទទួលបាននូវការអប់រំ។ លោកបានបន្តថា ការគាំទ្រដ៏ច្រើនក្រៃលេងអំពីសំណាក់អ្នកចូលរួម ក៏ដូចជាដៃគូសហការទាំងអស់បានបង្ហាញនូវកម្លាំងដ៏មានឥទ្ធិពលមួយនៃការរូបរួមគ្នាជាសហគមន៍។

“ពួកយើងអាចផ្លាស់ប្ដូរជោគវាសនាជូនដល់កុមារកម្ពុជាដ៏ល្អមួយបាន”

លោកស្រី ជួប វិច្ឆិកា នាយិកាប្រតិបត្តិអង្គការផ្កាយសមុទ្រក៏បានថ្លែងគាំទ្រពីសំខាន់នៃស្មារតី “កីឡាដើម្បីភាពវិជ្ជមានសង្គម” ដោយលើកឡើងថា “កីឡាមានថាមពលអាចផ្លាស់ប្តូរទាំងក្នុងជីវិតបុគ្គល និងសង្គម ហើយព្រឹត្តិការណ៍រត់ថ្ងៃនេះ គឺជាភស្តុតាងជាក់ស្តែងស្រាប់។ នាងខ្ញុំពិតមានសេចក្ដីរំភើបយ៉ាងខ្លាំង ដែលបានឃើញបងប្អូនជាច្រើនបានទទួលយកនូវស្មារតី ‘កីឡាដើម្បីភាពវិជ្ជមានសង្គម’ ដោយប្រើប្រាស់ចំណង់ចំណូលចិត្តរបស់ពួកគេក្នុងការរត់ ដើម្បីជួយជ្រោមជ្រែងកុមារដែលខ្វះឱកាសនៅកម្ពុជា។ ខ្ញុំសូមថ្លែងអំណរគុណអស់ពីចិត្ត ដល់ក្លឹបរត់ នាគ និងអ្នកគាំទ្រទាំងអស់ដែលបានធ្វើឲ្យព្រឹត្តិការណ៍នេះអាចកើតឡើងបាន—អ្នកគ្រប់គ្នាគឺជាអ្នកបង្កើតការផ្លាស់ប្តូរ”៕