ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីសប្តាហ៍កន្លងទៅនេះ ក្រសួងអប់រំ យុវជន និងកីឡា បានដាក់ឱ្យប្រើប្រាស់ជាផ្លូវការ នូវប្រព័ន្ធផ្ញើសារស្វ័យប្រវត្តិតាមតេលេក្រាម ដែលមានឈ្មោះថា “ស្វ័យវិជ្ជាអក្ខរកម្មមេឌា” ។ លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ មានប្រសាសន៍ថា ប្រព័ន្ធផ្ញើសារ “ស្វ័យវិជ្ជាអក្ខរកម្មមេឌា” នេះ នឹងចូលរួមជំរុញការយល់ដឹងស្ដីពីអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មានក្នុងវិស័យអប់រំ។
លោកជំទាវ គឹម សេដ្ឋានី មានប្រសាសន៍ថា ប្រព័ន្ធផ្ញើសារស្វ័យប្រវត្តិ “ស្វ័យវិជ្ជាអក្ខរកម្មមេឌា” បានអភិវឌ្ឍឡើងដើម្បីលើកកម្ពស់ការយល់ដឹង ជំនួយដល់គ្រូបង្រៀន លើកកម្ពស់ការចូលរួមរបស់សិស្សក្នុងកម្មវិធីសិក្សា បង្កើតបរិយាកាសឌីជីថលនៅក្នុងថ្នាក់រៀន។ លើសពីនេះ ជំរុញកម្មវិធីស្វ័យសិក្សាដែលជួយសិស្ស និស្សិត សិក្សាស្រាវជ្រាវដោយខ្លួនឯង គ្រប់ពេលវេលា និងគ្រប់ទីកន្លែង ជំរុញការអប់រំបែបឌីជីថល ព្រមទាំងជួយកសាងជំនាញភាពជាពលរដ្ឋឌីជីថល។ កម្មវិធីនេះ ក៏បានផ្ដោតគោលដៅជាពិសេសចំពោះក្មេងស្រី និងក្រុមសហគមន៍ដែលងាយរងគ្រោះផងដែរ។
រដ្ឋលេខាធិការប្រចាំការក្រសួងអប់រំ បានផ្ដល់អនុសាសន៍មួយចំនួន រួមមាន ទី១. ដាក់បញ្ចូលកម្មវិធី “ស្វ័យវិជ្ជាអក្ខរកម្មមេឌា” ក្នុងកម្មវិធីសិក្សានៃគ្រឹះស្ថានបណ្ដុះបណ្ដាលគ្រូទាំងអស់ ទី២. ប្រើប្រាស់កម្មវិធី “ស្វ័យវិជ្ជាអក្ខរកម្មមេឌា” ក្នុងថ្នាក់រៀនប្រកបដោយប្រសិទ្ធភាព និងទាញយកជាប្រយោជន៍សម្រាប់ការរៀន និងបង្រៀនឱ្យអស់ពីលទ្ធភាព ទី៣. សហការយ៉ាងពេញទំហឹងជាមួយនាយកដ្ឋានបរិវត្តកម្មឌីជីថលក្រសួងអប់រំ យុវជន និងកីឡា ក្នុងការលើកកម្ពស់ការអប់រំស្ដីពីអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មាន និងទី៤. បន្តអភិវឌ្ឍសមត្ថភាពជាប្រចាំដើម្បីដើរឱ្យទាន់ដំណើរវិវត្តន៍ឥតឈប់ឈរនៃបច្ចេកវិទ្យាឌីជីថល។
លក្ខណៈពិសេសនៃប្រព័ន្ធផ្ញើសារស្វ័យប្រវត្តិតាមតេលេក្រាម “ស្វ័យវិជ្ជាអក្ខរកម្មមេឌា” នេះ មានមាតិកាជាច្រើនសម្រាប់អ្នកប្រើប្រាស់ដូចជា ខ្លឹមសារមេរៀនចំនួន១០ សទ្ទានុក្រម សំណួរចម្លើយ លំហាត់វាស់ស្ទង់សមត្ថភាព គន្លឹះសំខាន់ៗ រូបភាព វីដេអូ តំណភ្ជាប់ឯកសារ ពិសេសគឺក្រុមពិភាក្សា។ តាមរយៈប្រព័ន្ធផ្ញើសារស្វ័យប្រវត្តិតាមតេលេក្រាមនេះ អ្នកប្រើប្រាស់អាចធ្វើការស្រាវជ្រាវ និងស្វ័យសិក្សាដោយខ្លួនឯងគ្រប់ពេលវេលា និងគ្រប់ទីកន្លែង។
គួរជម្រាបជូនថា ប្រព័ន្ធផ្ញើសារស្វ័យប្រវត្តិតាមតេលេក្រាម “ស្វ័យវិជ្ជាអក្ខរកម្មមេឌា” បានអភិវឌ្ឍឡើង ដោយនាយកដ្ឋានបរិវត្តកម្មឌីជីថល ក្រសួងអប់រំ យុវជន និងកីឡា ក្រោមការគាំទ្រដោយអង្គការ DW Akademie ជាមជ្ឈមណ្ឌល Deutsche Welle សម្រាប់ការអភិវឌ្ឍប្រព័ន្ធផ្សព្វផ្សាយអន្តរជាតិ បណ្តុះបណ្តាលសារព័ត៌មាន និងការផ្ទេរចំណេះដឹង៕
