យើងរស់នៅក្នុងពិភពលោកមួយ ដែលយុវជន ១នាក់ ក្នុងចំណោម ៥នាក់ មិនមានការងារធ្វើ មិនទទួលបានការអប់រំ និងបណ្ដុះបណ្ដាល។ ទិន្នន័យពីអង្គការពលកម្មអន្តរជាតិ (ILO) ក៏បានបង្ហាញដែរថា ពិភពលោកបច្ចុប្បន្ន គឺជាពិភពលោក ដែលកង្វះការវិនិយោគក្នុងការអប់រំ និងការបង្កើតឱកាសការងារសម្រាប់យុវជន ហើយបញ្ហានេះ អាចធ្វើឱ្យសេដ្ឋកិច្ចពិភពលោក ខាតបង់រហូតដល់ ៨៣ពាន់លានដុល្លារនៅឆ្នាំ២០៣០។

នៅចុងឆ្នាំ ២០២៣ YMCA សហការជាមួយនឹង ក្រុមហ៊ុន Deloitte Australia និង Service Now បានចាប់ផ្ដើម ធ្វើការស្ទង់មតិ ដោយបង្កើតការស្រាវជ្រាវមួយ ដែលដឹកនាំដោយមនុស្សវ័យក្មេង​ ដើម្បីមនុស្សវ័យក្មេង។ ការស្ទង់មតិបានធ្វើទៅលើមនុស្សវ័យក្មេងជាង ១ម៉ឺននាក់ ដែលមានអាយុចន្លោះពី ១៨ ដល់ ៣៥ឆ្នាំ នៅក្នុងប្រទេសជាង ១២០ ជុំវិញពិភពលោក។

ការស្រាវជ្រាវបង្ហាញថា យុវជន ៤នាក់ក្នុងចំណោម ១០នាក់មិនមានជំនាញ លក្ខណៈសម្បត្តិ ឬបទពិសោធន៍ត្រឹមត្រូវ ដើម្បីចូលធ្វើការ ឬចាប់ផ្ដើមអាជីវកម្មនោះទេ។ ការមិនស៊ីចង្វាក់គ្នារវាងជំនាញ ដែលក្រុមហ៊ុនត្រូវការ និងជំនាញដែលយុវជនកំពុងសិក្សានៅតែបន្ដមាន ហើយមូលហេតុចម្បងគឺដោយសារតែទិដ្ឋភាពការងារបន្តផ្លាស់ប្ដូរយ៉ាងឆាប់រហ័ស។ វេទិកាសេដ្ឋកិច្ចពិភពលោក បានប៉ានស្មានថា ស្ទើរតែពាក់កណ្ដាល នៃជំនាញសំខាន់ៗនាពេលបច្ចុប្បន្ន នឹងមានការផ្លាស់ប្ដូរក្នុងរយៈពេល ៥ឆ្នាំខាងមុន។

លក្ខណៈពិសេសដ៏គួរឱ្យចាប់អារម្មណ៍ នៃការស្រាវជ្រាវរបស់វេទិកាសេដ្ឋកិច្ចពិភពលោក គឺភាពស៊ីចង្វាក់គ្នានៃលទ្ធផលស្រាវជ្រាវទូទាំងពិភពលោក, លទ្ធផលនៃការធ្វើការស្ទង់មតិបានឱ្យដឹងថា យុវជនយល់ថា​ អាវុធដ៏សំខាន់បំផុតសម្រាប់ពួកគេ គឺជំនាញឌីជីថល។ ការស្រាវជ្រាវ ដោយក្រុមហ៊ុន Dell Technologies បានរកឃើញថា មានតែយុវជន ៤៤% ប៉ុណ្ណោះ ដែលបានរៀនជំនាញឌីជីថលមូលដ្ឋាន ខណៈដែល ១២ ភាគរយ មិនមានការបណ្ដុះបណ្ដាលទាល់តែសោះ។ លើសពីនេះ យុវជន ៣នាក់ ក្នុងចំណោម ១០នាក់ មិនមានឱកាសគ្រប់គ្រាន់ ដោយសារ ស្ថានភាពសង្គម និងសេដ្ឋកិច្ចមិនអំណោយផល។

លទ្ធផលនៃការស្ទង់មតិបង្ហាញថា ការងារ និងសុខុមាលភាពរបស់យុវជន នៅតែបន្តរងផលប៉ះពាល់ដោយសារជំងឺកូវីដ-១៩ ជម្លោះសកល ការប្រែប្រួលអាកាសធាតុ និងតម្លៃនៃការរស់នៅ។

ការស្រាវជ្រាវបង្ហាញយ៉ាងច្បាស់ថា កម្មវិធី និងវិធីសាស្រ្តបច្ចុប្បន្ន ក្នុងការដោះស្រាយបញ្ហាប្រឈមនៃភាពអត់ការងារធ្វើរបស់យុវជន គឺមិនគ្រប់គ្រាន់នោះទេ, វិធីសាស្ត្របច្ចុប្បន្ន នៅតែមិនអាចបំពេញតម្រូវការយុវជន និងធ្វើឱ្យពួកគេមិនអាចឈានដល់សក្តានុពលពិតប្រាកដរបស់ពួកគេ។ 

ចំណុចសំខាន់មួយទៀត ការស្រាវជ្រាវក៏បានបង្ហាញផងដែរថា យុវជនប្រាថ្នាចង់បានការងារ ដែលមានអត្ថន័យសម្រាប់ជីវិតពួកគេ។ ការងារដែលមានអត្ថន័យក្នុងន័យនេះ គឺជាការងារមួយ ដែលផ្ដល់នូវការការពារ និងពង្រឹងសមត្ថភាពពួកគេ ព្រមទាំងផ្ដល់នូវបទពិសោធការងារ ដែលសម្រួចជំនាញ និងអនាគតរបស់ពួកគេ។ ទន្ទឹមនឹងនេះ ការងារនោះក៏អនុញ្ញាតឱ្យយុវជន មានឱកាសរួមចំណែកអភិវឌ្ឍសង្គមផងដែរ។

យោងតាមការស្រាវជ្រាវរបស់វេទិកាសេដ្ឋកិច្ចពិភពលោក ការងារដែលមានអត្ថន័យ គឺជាការងារដែលមានសុច្ចរិតភាព និងធ្វើឱ្យមនុស្សមានសេចក្ដីពេញចិត្ត ហើយជះឥទ្ធិពលវិជ្ជមានដល់ការលូតលាស់ និងសុខុមាលភាពយុវជន និងសហគមន៍ពួកគេ។ លើសពីនេះ ធាតុផ្សំសំខាន់ៗសម្រាប់ការងារសមរម្យមានដូចជា ផ្ដល់នូវសុខុមាលភាពសម្រាប់បុគ្គលិក រង្វាន់ ក្រមសីលធម៌ ការការពារ បរិយាប័ន្ន ការលើកកម្ពស់ និងអភិវឌ្ឍបុគ្គលិក តុល្យភាព ផលិតភាព និរន្តរភាព គោលបំណង និងទំនាក់ទំនងល្អ៕