ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រូតេអ៊ីន មានសារៈសំខាន់ខ្លាំងសម្រាប់ការលូតលាស់ និងការអភិវឌ្ឍ បញ្ញា និងរាងកាយទារក។ សារធាតុនេះ មានឥទ្ធិពលទៅលើមុខងារសំខាន់ៗទាំងអស់របស់រាងកាយទារក ។ បើទោះជាទឹកដោះម្ដាយមានផ្ទុកនូវសារធាតុចិញ្ចឹមនេះយ៉ាងច្រើនក៏ដោយ អ្នកអាចផ្ដល់អាហារ ដែលសម្បូរប្រូតេអ៊ីនដល់កូនរបស់អ្នកបន្ថែមទៀត នៅពេលគេអាចញ៉ាំអាហាររឹងបាន ដើម្បីជំរុញការលូតលាស់ និងភាពមាំមួន។
បណ្ឌិតសភាកុមារអាមេរិក (AAP) បានណែនាំឱ្យកុមារអាចញ៉ាំអាហារបានចាប់ពីអាយុ ៦ខែឡើងទៅ ហើយអាហារនោះគួរតែរួមបញ្ចូលនូវជាតិដែក និងសង្ក័សី និងវីតាមីនសំខាន់ៗមួយចំនួនទៀត។ យោងតាមគោលការណ៍ ណែនាំរបបអាហាររបស់ USDA បានបង្ហាញថា ទារកនៅអាយុចាប់ពី ៦ខែ ទៅ១១ខែ គួរតែទទួលបានប្រូតេអ៊ីនចំនួន ១១ក្រាមរៀងរាល់ថ្ងៃ ដោយមានការរួមបញ្ចូលនូវទឹកដោះ និងចំណីអាហារ។ ម្ដាយឪពុកអាចផ្ដល់អាហារ ដែលសម្បូរប្រូតេអ៊ីន ៥ប្រភេទដល់កូន ដើម្បីជំរុញការលូតលាស់របស់គេឱ្យកាន់តែប្រសើរ៖
១. សាច់គោ ៖ សាច់គោ គឺជាអាហារដែលសម្បូរជាតិដែក ស័ង្កសី និងប្រូតេអ៊ីនខ្ពស់ ហើយជាអាហារដំបូងដ៏អស្ចារ្យសម្រាប់កុមារ។ ដើម្បីឱ្យកុមារអាចញ៉ាំអាហារប្រភេទនេះ អ្នកត្រូវអនុវត្តជំហានមួយចំនួនដូចជា៖
- ចម្អិនសាច់ឱ្យបានឆ្អិនល្អ
- ក្រឡុកសាច់ដែលចម្អិនរួចជាមួយទឹកឆ្អិន ឬទឹកបរិសុទ្ធ
- ក្រឡុកជាមួយបន្លែមួយចំនួន ដូចជា ដំឡូងជ្វា ផ្កាខាត់ណា ឬប្រូខូលី។
២. សាច់មាន់ ៖ ក្រៅពីជាប្រភពប្រូតេអ៊ីនដ៏ល្អ សាច់មាន់ក៏មានវីតាមីន B និងសារធាតុរ៉ែសំខាន់ៗដូចជា ស័ង្កសី និងជាតិដែកផងដែរ។ ការកែច្នៃសាច់មាន់សម្រាប់ទារក ត្រូវអនុវត្តតាមជំហានដូចជា៖
- បំបែកសាច់ទ្រូង ជាបំណែកតូច
- ចម្អិនសាច់នោះឱ្យបានឆ្អិនល្អ
- ក្រឡុកសាច់ជាមួយផ្លែប័រ ឬផ្លែប៉ោម។
៣. ត្រី៖ សាច់ត្រី គឺជាអាហារសុខភាពដ៏ល្អបំផុតសម្រាប់ទារក ដែលសម្បូរទៅដោយជាតិខ្លាញ់អូមេហ្គា៣ និងប្រូតេអ៊ីន ល្អសម្រាប់ខួរក្បាល។ ការចម្អិនសម្រាប់ទារក អ្នកគ្រាន់តែអាំងវាឱ្យឆ្អិនល្អ និងបេះសាច់តូចៗ ដែលសមល្មមសម្រាប់ទារកអាចញ៉ាំបាន។ នៅពេលជ្រើសរើសត្រីសម្រាប់កូនតូចរបស់អ្នក ជៀសវាងការញ៉ាំអាហារដែលមានជាតិហិរសម្រាប់ពួកគេ។
៤. តៅហ៊ូ ៖ មិនគ្រាន់តែមានប្រូតេអ៊ីនច្រើនប៉ុណ្ណោះទេ តៅហ៊ូមានជាតិសរសៃរ និងជាតិខ្លាញ់ដែលល្អសម្រាប់សុខភាព។ តៅហ៊ូ គឺជាការបន្ថែមអាហារដ៏ឆ្លាតវៃ សម្រាប់ទារក មិនថាគ្រួសារអ្នកជាអ្នកបួស ឬក៏អត់នោះទេ។
៥. យ៉ាអួ (Yogurt)៖ ក្រៅពីប្រភពអាហារ ដែលមានប្រូតេអ៊ីនខ្ពស់សម្រាប់ទារក យ៉ាអួក៏ជាប្រភពនៃកាលស្យូម និងវីតាមីន D ដ៏ល្អផងដែរ។ ខណៈពេលទារកមិនអាចផឹកទឹកដោះគោស្រស់រហូតដល់អាយុ ១ឆ្នាំ យ៉ាងតិច ការញ៉ាំយ៉ាអួរគឺល្អបំផុតសម្រាប់ពួកគេ។ ទន្ទឹមនឹងនេះ យ៉ាអួក្រិក (Greek yogurt) ត្រូវបានអ្នកជំនាញណែនាំឱ្យញ៉ាំ ព្រោះវាសម្បូរប្រូតេអ៊ីន និងមានភាពស្អិតនឹងស្លាបព្រា ដែលងាយបញ្ចុកទារក៕
