យុវជន ថុន ដាវ៉ាន់ មានវ័យ២០ឆ្នាំ បច្ចុប្បន្ន​ជានិស្សិតឆ្នាំទីពីរ នៃវិទ្យាស្ថានបច្ចេកទេសឧស្សាហកម្ម ជំនាញវិស្វកម្មអគ្គីសនី។ ការចាប់យកជំនាញ វិស្វកម្មអគ្គិសនីនេះ គឺក្រោយ​ពី ដាវ៉ាន់ បានសង្កេតឃើញថា ខ្លួនមានចំណង់ចំណូចចិត្តតាំងពីក្មេង ហើយជាមួយ​គ្នានេះ ខ្លួន​ក៏​មើលឃើញពីតម្រូវការទីផ្សារ នៃជំនាញមួយ​នេះផងដែរ។

ដាវ៉ាន់ និយាយថា ខណៈប្រទេសកម្ពុជាកំពុងមានការអភិវឌ្ឍ តម្រូវការនៃអ្នកបច្ចេកទេសក៏មានសន្ទុះកើនឡើងផងដែរ ដែលជាហេតុធ្វើឱ្យខ្លួនយល់ថា ជំនាញដែលលោកស្រឡាញ់ក៏វាពាក់ព័ន្ធនឹងតម្រូវការទីផ្សារការងារនាពេលបច្ចុប្បន្ននេះផងដែរ។ បន្ថែមពីនោះជំនាញវិស្វកម្មអគ្គីសនី ក៏ឆ្លើយតបនឹងក្ដីស្រមៃពេលអនាគត ដែល ដាវ៉ាន់ ចង់មានជំនាញមួយដែលមានភាពនឹងធឹង។

យុវជន ថុន ដាវ៉ាន់

“ទន្ទឹមគ្នានឹងចំណូលចិត្ត ខ្ញុំចង់ឱ្យជំនាញដែលខ្ញុំសិក្សាវាស្របជាមួយទីផ្សារ និងការមានជំនាញច្បាស់មួយ”

តើជំនាញវិស្វកម្មអគ្គិសនី គេសិក្សា​ទៅលើអ្វីខ្លះ ?

បើតាម យុវជន ថុន ដាវ៉ាន់ នៅក្នុងជំនាញវិស្វកម្មអគ្គសនីនេះ មានជំនាញច្រើនដែលត្រូវសិក្សា ដូចជា មូលដ្ឋានគ្រឹះអេឡិចត្រូនិច បណ្តាញនៅក្នុងអាគារ ដែនអាកាស និងគំនូសបច្ចេកទេសជាច្រើនទៀត។ តែអ្វីដែល ដាវ៉ាន់ ចូលចិត្តជាងគេក្នុងការសិក្សានោះ គឺ បណ្តាញនៅក្នុងអាគារ ដោយសារតែខ្លួនជួបច្រើននៅក្នុងជីវភាពរស់នៅប្រចាំថ្ងៃ។

នៅក្នុងការសិក្សា​ជំនាញវិស្វកម្មអគ្គិសនី នៅឆ្នាំទី១ ដាវ៉ាន់ បានចូលរួម​ធ្វើ​គម្រោងចាប់ចម្ងាយ ដោយប្រើស៊ែនស័រ, នៅ​ឆ្នាំទីពីរ ដាវ៉ាន់ បានចូលរួមបង្កើត​គម្រោងមួយទៀត គឺ ប្រព័ន្ធបញ្ជាម៉ូទ័រអូតូមេទិច ឬក៏អាទែអេស ដោយ​គម្រោងនេះគឺផ្តល់ភាពងាយស្រួលនៅពេលដែលភ្លើងរដ្ឋដាច់ ឬក៏ដាច់ចរន្តអគ្គសនី នោះម៉ាស៊ីនភ្លើងនឹងដំណើរការធ្វើឱ្យចរន្តអគ្គិសនីនៅក្នុងអគារមានជាធម្មតា។

យុវជន ថុន ដាវ៉ាន់

“ខ្ញុំគិតថា ជំនាញនេះ វាជួយដល់សង្គមយើងច្រើនដែរ ហើយវាជួយឱ្យខ្ញុំមានជំនាញពិតមួយ ហើយអាចធ្វើឱ្យខ្ញុំរកប្រាក់បានពីជំនាញមួយហ្នឹង”

យ៉ាងណាក៏ដោយ​សម្រាប់យុវជនដែលមានបំណងចង់សិក្សាជំនាញវិស្វកម្មអគ្គិសនីនេះ ដាវ៉ាន់ បានផ្តល់ដំបូន្មានថា យុវជនគួរត្រូវសិក្សាស្វែងយល់ពីមូលដ្ឋានគ្រឹះរបស់វាឱ្យបានខ្លះៗជាមុនសិន ហើយយកចិត្តទុកដាក់ទៅលើភាសាអង់គ្លេស គណិតវិទ្យា រូបវិទ្យា ទើបអាចជួយ​សម្រួលដល់ការរៀនជំនាញមួយនេះបាន។

យុវជន ថុន ដាវ៉ាន់

“សម្រាប់ខ្ញុំ បើសិនជាសិស្សជំនាន់ក្រោយ គាត់ចង់មកសិក្សានៅជំនាញនេះ ខ្ញុំលើកទឹកចិត្តគាត់ថា បើសិនជាគាត់ខ្លាចឆក់ ប្រាប់គាត់ថាមិនបាច់ខ្លាចទេ ដោយសារតែ ទៅដល់សាលាហ្នឹង គេមានបង្រៀនពីសុវត្ថិភាពការងារហើយ”

សម្រាប់ ដាវ៉ាន់ នៅថ្ងៃអនាគត បន្ទាប់ពីររៀនចប់បួនឆ្នាំនេះហើយ លោកចង់ក្លាយជាវិស្វករអគ្គីសនីដ៏ចំណានមួយ​រូប និង​រំពឹងថា នឹងក្លាយជាចំណែកមួយ​ក្នុងចូលរួមជួយ​អភិវឌ្ឍកម្ពុជា៕