ភ្នំពេញ – ពិព័រណ៌ជាតិ និងអន្តរជាតិ ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ បានប្រព្រឹត្តទៅរយៈពេលបីថ្ងៃ គិតចាប់ពីថ្ងៃទី២៦ ដល់ថ្ងៃទី២៨ ខែមីនា ឆ្នាំ២០២៣ នៅសាលសន្និបាតកោះពេជ្រ រាជធានីភ្នំពេញ ។ ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកត់កម្គាល់ថា រយៈពេល ៣ឆ្នាំចុងក្រោយ វិស័យបច្ចេកវិទ្យា និងនវានុវត្តន៍នៅកម្ពុជាកំពុងវិវឌ្ឍន៍លឿនរហ័ស បម្រើដល់ការសិក្សា និងការរស់នៅរបស់មនុស្ស ។

ឯកឧត្តមទេសរដ្ឋមន្ត្រី បានបញ្ជាក់ថា វិស័យវិទ្យាសាស្ត្រ បច្ចេកវិទ្យា និងនវានុវត្តន៍នៅកម្ពុជាកំពុងរីកចម្រើនគួរឱ្យកត់សម្គាល់ទាំងនៅក្នុងផ្នែករដ្ឋ និងឯកជន មានដូចជា ការអភិវឌ្ឍន៍បច្ចេកវិទ្យាផ្តល់សេវាសាធារណៈជូនប្រជាពលរដ្ឋឱ្យកាន់លឿនរហ័ស និងទំនើបកម្មនៃកម្មវិធីបច្ចេកវិទ្យានានាសម្រាប់អាជីវកម្មជាដើម ។ នាពេលបច្ចុប្បន្ន វិស័យវិទ្យាសាស្ត្រ បច្ចេកវិទ្យា និងនវានុវត្តន៍ជាធាតុដ៏ចាំបាច់សម្រាប់ការរស់នៅរបស់មនុស្សជាតិ ។

ឯកឧត្តមទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម បច្ចេកវិទ្យា និងនវានុវត្តន៍ មានប្រសាសន៍បន្ថែមថា “ពិព័រណ៌វិទ្យាសាស្ត្រ បច្ចេកវិទ្យា និងនវានុវត្តន៍ បង្កើតជាព្រឹត្តិការណ៍មួយឱ្យប្រជាជនកម្ពុជាស្គាល់ ថាតើវិទ្យាសាស្ត្រ បច្ចេកវិទ្យា និងនវានុវត្តន៍ជាអ្វី? ហើយប្រទេសយើងបានឈានដើរដល់កម្រិតណាហើយ? និងប្រៀបធៀបជាមួយពិភពលោកយ៉ាងដូចម្តេច ដើម្បីឱ្យថ្ងៃក្រោយសិស្សានុសិស្ស និងយុវជនចាប់យកមុខវិជ្ជាវិទ្យាសាស្ត្រ បច្ចេកវិទ្យា និងនវានុវត្តន៍ឱ្យបានច្រើន ឆ្លើយតបទៅនឹងតម្រូវការប្រទេសយើង និងឈានទៅកសាងបដិវត្តន៍ឧស្សាហកម្មជំនាន់ទី៤” ។

ស្របគ្នានេះដែរ ឯកឧត្តមទេសរដ្ឋមន្ត្រី ក៏បានលើកឡើងដែរថា វិទ្យាសាស្ត្រ បច្ចេកវិទ្យា និងនវានុវត្តន៍កំពុងវិវឌ្ឍន៍កាន់តែលឿនរហ័ស ដែលទាមទារឱ្យមានរៀបចំតម្រង់ទិសបណ្តុះបណ្តាលកុមារចាប់តាំងពីថ្នាក់មត្តេយ្យឡើងទៅ ។ ឯកឧត្តមបានបន្តថា កូនខ្មែរមានភាពវ័យឆ្លាត ការច្នៃប្រតិដ្ឋមិនចាញ់ជាតិសាសន៍ដទៃនោះឡើយ គ្រាន់តែមិនទាន់មានការដុសខាត ។

សូមជម្រាបថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្កើតឡើងនៅឆ្នាំ២០២០ មានគោលដៅពង្រឹងបន្ថែមលើការសិក្សាស្រាវជ្រាវការងារវិទ្យាសាស្ត្រ បច្ចេកវិទ្យា និងនវានុវត្តន៍ ។ ក្រសួងជឿជាក់ថា ប្រសិនបើយុវជនកម្ពុជាបានរៀនមុខវិជ្ជាវិទ្យាសាស្ត្រ បច្ចេកវិទ្យា និងនវានុវត្តន៍បានច្រើន នោះកម្ពុជាបង្កើតកម្លាំងពលកម្មបានច្រើន ហើយការវិនិយោគពីក្រៅប្រទេសលើផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ក៏កាន់តែច្រើន ពេលនោះកម្ពុជានឹងស្មើមុខមាត់ជាមួយប្រទេសអភិវឌ្ឍន៍នៅឆ្នាំ២០៣០ ៕