ភ្នំពេញ – ថ្លែងក្នុងពិធីបើកសិក្ខាសាលាស្ដីអំពីបារីអេឡិចត្រូនិច នៅមន្ទីរអប់រំ យុវជន និងកីឡារាជធានីភ្នំពេញ កាលពីព្រឹកថ្ងៃទី២២ ខែមីនាឆ្នាំ២០២៣ លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា បារីអេឡិចត្រូនិចមិនមែនជាផលិតផលផ្ដាច់បារីទេ ប៉ុន្តែជាផលិតផលជំរុញឱ្យប្រើប្រាស់គ្រឿងញៀន។

លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បន្ថែមថា កន្លងមកមានការផ្សព្វផ្សាយដល់យុវជនថា ការប្រើប្រាស់បារីអេឡិចត្រូនិចពិតជាអាចជួយផ្ដាច់បារី និងមិនផ្ដល់ផលប៉ះពាល់ដល់សុខភាព ប៉ុន្តែផ្ទុយទៅវិញការសិក្សាបានបង្ហាញថា ការប្រើប្រាស់បារីអេឡិចត្រូនិច មានហានិភ័យធ្ងន់ធ្ងរចំពោះយុវជនដែលមិនធ្លាប់ប្រើប្រាស់បារីធម្មតាពីមុនមក។ ដូច្នេះហាមដាច់ខាតយុវជនមិនត្រូវសាកល្បងប្រើប្រាស់បារីអេឡិចត្រូនិចឡើយពីព្រោះវាផ្ដល់ផលប៉ះពាល់ខ្លាំងជាងប្រើប្រាស់បារីធម្មតា។

លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា

“ប្រសិនយើងមិននាំគ្នាទប់ស្កាត់ការយល់ច្រឡំអំពីការប្រើប្រាស់បារីអេឡិចត្រូនិច ឬមិនទប់ស្កាត់ឱ្យមានប្រសិទ្ធភាពនៃការប្រើប្រាស់ទេ គឺយើងពិបាកទប់ស្កាត់ឆ្ពោះទៅលុបបំបាត់ការប្រើប្រាស់មិនត្រឹមតែបារីទេ គឺគ្រឿងញៀន ដែលបំផ្លាញដល់សុខភាពប្រជាពលរដ្ឋ”

រដ្ឋលេខាធិការក្រសួងអប់រំ ក៏បានណែនាំដល់គណៈគ្រប់គ្រងគ្រឹះស្ថានសិក្សាចំណេះទូទៅឱ្យបង្កើនការត្រួតពិនិត្យ ការហាមឃាត់ការប្រើប្រាស់ និងចែកចាយបារីអេឡិចត្រូនិក នៅក្នុងបរិវេណគ្រឹះស្ថានរបស់ខ្លួន ស្របតាមអនុសាសន៍ដែលបានលើកឡើងនៅក្នុងស្រាវជ្រាវស្តីពីការប្រើប្រាស់បារីអេឡិចត្រូនិក និងផលិតផល អេចឆិ៍ ធី ភី នៅតាមគ្រឹះស្ថានសិក្សា ដែលធ្វើឡើងដោយក្រសួងអប់រំ យុវជន និងកីឡា កាលពីពេលថ្មីនេះ។

លោកវេជ្ជបណ្ឌិត មុំ គង់ នាយកអង្គការចលនាដើម្បីសុខភាពកម្ពុជា មានប្រសាសន៍ថា ផលិតផលបារីអេឡិចត្រូនិចមិនមែនជាផលិតផលប្ដាច់បារីទេ ប៉ុន្តែជាផលិតផលជំរុញឱ្យប្រើប្រាស់បារី២ទៅ៣ដងខ្លាំងជាងបារីធម្មតា។ ទន្ទឹមគ្នានេះ ជាតិនីកូទីនដែលមាននៅក្នុងបារីអេឡិចត្រូនិកគឺធ្វើឱ្យញៀនខ្លាំង។ ចំពោះស្រ្តីដែលមានផ្ទៃពោះ វាធ្វើឱ្យមានបញ្ហាដល់គភ៌ដែលកំពុងលូតលាស់​ ហើយវាក៏បំផ្លាញការអភិវឌ្ឍសមត្ថភាពខួរក្បាលផងដែរ។ ចំពោះយុវជន វាធ្វើឱ្យប៉ះពាលដល់ការសិក្សា ការចងចាំ និងការផ្ចង់អារម្មណ៍។

លោកវេជ្ជបណ្ឌិត មុំ គង់ នាយកអង្គការចលនាដើម្បីសុខភាពកម្ពុជា

“បារីអេឡិចត្រូនិចជាអ្នកនាំផ្លូវឱ្យយុវជនក្លាយជាអ្នកជក់បារីធម្មតា និងឈានទៅរកការប្រើប្រាស់គ្រឿងញៀនផ្សេងទៀតនាពេលអនាគត”

លោកវេជ្ជបណ្ឌិត មុំ គង់ បន្ថែមថា បើយោងតាមមជ្ឍមណ្ឌល CDC នៃសហរដ្ឋអាមេរិក ដែលបានធ្វើការសិក្សាស្រាវជ្រាវប្រមូលទិន្នន័យចាប់ពីខែសីហា ឆ្នាំ២០១៩ ដល់ខែកុម្ភៈ ឆ្នាំ២០២០ បានបង្ហាញថា មានប្រជាជនអាមេរិកចំនួន ២៨០៧នាក់ ឈឺ និង ៦៨នាក់ បានស្លាប់ដោយសារតែជំងឺសួត ដែលបណ្ដាលមកពីការប្រើប្រាស់បារីអេឡិចត្រូនិក។ លោកបន្តថា នៅលើពិភពលោកមានប្រទេសចំនួន៤៧ បានហាមឃាត់ការចែកចាយ និងប្រើប្រាស់បារីអេឡិចត្រូនិក។ ក្នុងនោះ នៅតំបន់អាស៊ានមានប្រទេសចំនួន៥ រួមមាន ប្រទេសកម្ពុជា (ENDs, HTPs) ប្រទេសប៊្រុយណេ (ENDs, HTPs) ប្រទេសឡាវ (ENDs) ប្រទេសថៃ (ENDs, HTPs) និង ប្រទេសសិង្ហបុរី (ENDs, HTPs)។

ជាមួយគ្នានេះ លោក សួន លីលាប មន្រ្តីនាយកដ្ឋានសុខភាពសិក្សានៃក្រសួងអប់រំ​ យុវជន និងកីឡា មានប្រសាសន៍ថា ការសិក្សាស្រាវជ្រាវអំពីការប្រើប្រាស់បារីអេឡិចត្រូនិក និងផលិតផល អេចឆិ៍ ធី ភី នៅតាមគ្រឹះស្ថានសិក្សារកឃើញថា សិស្សភាគច្រើនបានដឹងនិងស្គាល់ពីបារីអេឡិចត្រូនិក និងច្រើនជាង៥០% និងបានស្គាល់តាមរយៈបណ្ដាញព័ត៌មានសង្គម ដូចជាហ្វេសប៊ុក និងទិកតុក ជាដើម។ ទន្ទឹមនឹងនេះ មានគ្រូនិងសិស្សជាង៦០% បានបញ្ជាក់ថា មិនបានយល់ដឹងពីផលប៉ះពាល់នៃបារីអេឡិចត្រូនិកឡើយ។ ពួកគាត់យល់ថាអ្នកដែលបាននិងកំពុងប្រើបារីអេឡិចត្រូនិកនោះគឺដោយសារតែជឿតាមការឃោសនារបស់អ្នកលក់ថាជាម៉ាស៊ីនផ្ដាច់បារីនិងមានសុវត្ថិភាព។

លោក សួន ភីលាប បន្ថែមថា ការស្រាវជ្រាវនេះបានបង្ហាញថា ការហាមឃាត់ការប្រើប្រាស់និងការចែកចាយបារីអេឡិចត្រូនិកនិងផលិតផលអេចឈ៍ ធី ភី(HTPs) នៅគ្រឹះស្ថានសិក្សាសាធារណៈនិងឯកជនកន្លងមកគឺមានប្រសិទ្ធភាពល្អ ។ ប៉ុន្តែទន្ទឹមគ្នានេះ ការអប់រំផ្សព្វផ្សាយពីផលប៉ះពាល់អវិជ្ជមានទៅលើសុខភាពនិងសុខុមាលភាពធនធានមនុស្សកម្ពុជា ដែលបង្កដោយការសេពបារីអេឡិចត្រូនិក និងផលិតផល អេចឈ៍ ធី ភី ហាក់នៅមានកម្រិត និងមិនទាន់ឆ្លើយតបទៅនឹងគោលដៅគោលនយោបាយលើកកម្ពស់សុខភាពសិក្សានៅឡើយ។

លោក សួន ភីលា ក៏បានសំណូមពរបន្ថែមដល់ក្រសួង/ស្ថាប័នមានសមត្ថកិច្ច គប្បីចាត់វិធានការតាមច្បាប់ ចំពោះការចែកចាយបារីអេឡិចត្រូនិក ពិសេសការផ្សព្វផ្សាយលក់តាមបណ្តាញព័ត៌មានសង្គម ជាអាទិ៍ ហ្វេសប៊ុក (Facebook) តិកតុក (Tik Tok) អ៊ីនស្តាក្រាម(Instagram)។ល។ ដែលជាប្រភពចម្បងនៃការចែកចាយបារីអេឡិចត្រូនិកដល់កុមារ និងយុវជនវ័យក្មេង។ ជាងនេះទៀត ក្រសួងស្ថាប័នមានសមត្ថកិច្ចទទួលបន្ទុក គប្បីពិនិត្យលទ្ធភាពគ្រប់គ្រង ហាមឃាត់ការនាំចូលបារីអេឡិចត្រូនិក និងផលិតផលអេចឈ៍ ធី ភី គ្រប់ប្រភេទ ក្នុងគោលបំណងបង្ការធនធានយុវជន និងកុមារ ពីការបំផ្លាញសុខភាពនិងអនាគតដោយផលិតផលនេះ។

គួរបញ្ជាក់ផងដែរថា កន្លងមកអាជ្ញាធរជាតិប្រយុទ្ធប្រឆាំងគ្រឿងញៀន បានចេញលេខក្ដីណែនាំលេខ ០០១/១៤ ស.ណ.ន ចុះថ្ងៃទី២៥ ខែកុម្ភៈ ឆ្នាំ២០១៤ ស្ដីពីការចាត់វិធានការ បង្ការ បញ្ឈប់ការប្រើប្រាស់ ការធ្វើអាជីវកម្ម និងការនាំចូលផលិតផលស៊ីហ្សា(SISHA) និងបារីអេឡិចត្រូនិច(E-Cigarette) នៅព្រះរាជាណាចក្រកម្ពុជា។ លុះដល់ឆ្នាំ២០២១ កម្ពុជាបានហាមឃាត់បន្ថែមទៀតលើការនាំចូល ការជួញដូរ ការធ្វើអាជីវកម្ម និងការប្រើប្រាស់ផលិតផលអេចឈ៍ ធី ភី (HTPs) បន្ថែមទៀត៕