ក្រសួងអប់រំ យុវជន និងកីឡា ដោយ​សហការ​ជាមួយ​សាកលវិទ្យាល័យពាណិជ្ជសាស្រ្ត​អេស៊ីលីដា គ្រោងនឹងរៀបចំ​កម្មវិធីសិក្សា​ជំនាញគណនេយ្យ ទៅ​ក្នុងការ​អនុវត្ត​សាកល្បង​ក្នុងគន្លងអប់រំថ្មី សម្រាប់ឆ្នាំ​សិក្សា​២០២៥-២០២៦។

បើតាមសេចក្តីប្រកាស​របស់ក្រសួងអប់រំ យុវជន និងកីឡា ក្រុមការងាររបស់ក្រសួង ដឹកនាំដោយ ឯកឧត្ដម អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា បានជួបប្រជុំ​ជាមួយតំណាងសាកលវិទ្យាល័យពាណិជ្ជសាស្រ្ត​អេស៊ីលីដា ដើម្បីពិនិត្យលើសេចក្តីព្រាងកម្មវិធីសិក្សាជំនាញគណណេយ្យ ដែលក្រុមការងារបច្ចេកទេសបានរៀបចំ ដោយផ្តោតលើចំនួនមុខវិជ្ជាសិក្សា ចំនួនមេរៀនគាំទ្រ និងចំនួនម៉ោងសិក្សា។

ឯកឧត្ដម អ៊ុង បូរាត មានប្រសាសន៍ថា កិច្ចពិភាក្សានេះបានធ្វើយ៉ាងល្អិតល្អន់ និងធ្វើទំនើប​កម្មកម្មវិធីសិក្សា​ជំនាញគណនេយ្យ​ស្របតាមអនុសាសន៍របស់ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងការកំណត់ឱ្យបានច្បាស់នូវសមត្ថភាពជំនាញ សម្រាប់ឆ្នាំទី១ និងឆ្នាំបន្តបន្ទាប់ ដើម្បីធ្វើយ៉ាងណាឱ្យកម្មវិធីនេះ ក្លាយជាកម្មវិធីមួយដែលប្រកបដោយភាពសមស្រប គ្រប់គ្រាន់ គ្រប់ជ្រុងជ្រោយ និងប្រសិទ្ធភាពអាច​ឆ្លើយតប​តម្រូវការរបស់អ្នកសិក្សា ផ្តល់នូវចំណេះដឹង ជំនាញបច្ចេកទេសនិងវិជ្ជាជីវៈ និងជំនាញទន់ ដល់សិស្ស យុវជន ស្របតាមបរិបទ​តម្រូវការ​ទីផ្សារការងារ ការអភិវឌ្ឍបៃតង និងឌីជីថលូបនីយកម្ម សម្រាប់ធ្វើឱ្យសិស្ស​មានមូលដ្ឋានគ្រឹះ​ដ៏រឹងមាំ​សម្រាប់បន្តការសិក្សាថ្នាក់ឧត្តមសិក្សា សមត្ថភាពសមស្របក្នុងការចូលបម្រើការងារក្នុងវិស័យឯកជន និងបើកអាជីវកម្មខ្នាតតូច ឬមធ្យមបាន។

ឯកឧត្ដម អ៊ុង បូរាត និងក្រុមការងារ បានសម្តែងនូវការប្តេជ្ញាចិត្ត​ខ្ពស់ក្នុងការចូលរួមចំណែក​ក្នុងការអភិវឌ្ឍ​ការអប់រំបច្ចេកទេស ការអនុវត្តគន្លងអប់រំ និងការពង្រឹងការដឹកនាំនិងគ្រប់គ្រងការងារផ្នែកអប់រំបច្ចេកទេស និងការអនុវត្តគន្លងអប់រំ តាមរយៈការរិះរកយុទ្ធសាស្ត្រ យុទ្ធសាស្ត្ររង ផែនការសកម្មភាពគោល និងយន្តការការកែលម្អការអនុវត្តរបស់សាលារៀន ការគាំទ្រនិងសម្របសម្រួលដល់សាលារៀន សំដៅលើកកម្ពស់ការផ្តល់សេវាអប់រំដែលល្អ ប្រកបដោយគុណភាព ប្រសិទ្ធភាព និងប្រសិទ្ធផល ដើម្បីរួមចំណែកអភិវឌ្ឍសមត្ថភាពយុវជន ដែលចូលមកទទួលយកសេវាផ្នែកអប់រំបច្ចេកទេស និងគន្លងវិជ្ជាជីវៈ ឱ្យមានសមត្ថភាពពេញលេញ ក្លាយជាមូលធនមនុស្យ សំដៅរួមចំណែកសម្រេចចក្ខុវិស័យកម្ពុជា ឆ្នាំ២០៣០ និងឆ្នាំ២០៥០។

នៅក្នុងឆ្នាំសិក្សា​២០២៥-២០២៦នេះ ក្រសួងអប់រំ យុវជន និងកីឡា នឹង​ដាក់​ឱ្យ​អនុវត្តគន្លងអប់រំថ្មី​នៅ​តាម​គ្រឹះស្ថាន​សិក្សាចំនួន៤៩ ដែលជា​វិទ្យាល័យ​ធនធាន​, វិទ្យាល័យ​នៅ​តំបន់សេដ្ឋកិច្ច​ពិសេស, វិទ្យាល័យ​អនុវត្ត​ជំនាញ​សិល្បៈ​ និងវិទ្យាល័យ​ដែលមាន​មជ្ឈមណ្ឌល​បច្ចេកវិទ្យា​សហគមន៍​។ ក្នុងនោះជំនាញដែលគ្រោងនឹងបណ្តុះបណ្តាល​ដល់សិស្ស​រួមមាន អគ្គិសនី, អេឡិចត្រូនិក, បសុវប្បកម្ម, ក្សេត្រសាស្ត្រ, មេកានិក, ការិយាល័យជួរមុខ, បច្ចេកវិទ្យាកុំព្យូទ័រ, គណនេយ្យ, កែច្នៃអាហារ, ឌីជីថលមេឌៀឌីហ្សាញ, អភិវឌ្ឍកសិកម្ម, និង ជំនាញកសិកម្មវៃឆ្លាត៕