ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីចូលរួមចំណែកជាមួយរាជរដ្ឋាភិបា ក្នុងការកសាង និងអភិវឌ្ឍមូលធនមនុស្ស ក៏ដូចជាចូលរួមសម្រាលបន្ទុកហិរញ្ញវត្ថុក្នុងគ្រួសារវីរយុទ្ធជន ដែលបានពលីជីវិតក្នុងសមរភូមិប្រយុទ្ធនៅព្រំដែនកម្ពុជា-ថៃ អំឡុងថ្ងៃទី២៤-២៨ ខែកក្កដា ឆ្នាំ២០២៥ សាកលវិទ្យាល័យភូមិន្ទវិចិត្រសិល្បៈ សម្រេចផ្តល់ជូនអាហារូបករណ៍សិក្សាឥតបង់ថ្លៃ ១០០% រយៈពេល៤ និង៥ឆ្នាំ ក្នុងកម្រិតសិក្សាថ្នាក់បរិញ្ញាបត្រ គ្រប់ជំនាញសិក្សាទាំង៥មហាវិទ្យាល័យ ជូនដល់កូនៗរបស់វីរៈយុទ្ធជនដែលបានពលីជីវិតក្នុងបុព្វហេតុការពារជាតិមាតុភូមិនាពេលកន្លងមកនេះ។
តាមរយៈការប្រកាសផ្តល់អាហារូបករណ៍នេះ សាកលវិទ្យាល័យភូមិន្ទវិចិត្រសិល្បៈ ក៏បានចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារ វីរយុទ្ធជន ដែលបានបូជាជីវិតយ៉ាងអង់អាចក្លាហាន ការពារបូរណភាពទឹកដី លះបង់ដាច់ស្រស់ ឈាមស្រស់ ក្នុងស្មារតីស្នេហាជាតិ និងបុព្វហេតុការពារជាតិមាតុភូមិដ៏បវរនៃយើង។
សូមបញ្ជាក់ថា សាកលវិទ្យាល័យភូមិន្ទវិចិត្រសិល្បៈ មានមហាវិទ្យាល័យធំៗចំនួន៥ រួមមាន មហាវិទ្យាល័យបុរាណវិទ្យា ដែលធ្វើការបណ្តុះបណ្តាលធនធានមនុស្សថ្នាក់បរិញ្ញាបត្រ ឱ្យយល់ដឹងស៊ីជម្រៅទៅលើវិស័យវប្បធម៌ ដូចជា ៖ បុរេប្រវត្តិ, ប្រវត្តិសាស្ត្រ, សិលាចារឹក, នរវិទ្យា (ទំនៀមទម្លាប់), ភាសាវិទ្យា, ប្រាសាទនិងចម្លាក់បុរាណ, ការងារអភិរក្ស ជួសជុលប្រាសាទនិងវត្ថុបុរាណ, មគ្គទេសក៍បេតិកភណ្ឌ។ល។
មហាវិទ្យាល័យស្ថាបត្យកម្ម និងនគរោបនីយវិទ្យា ដែលផ្តោតលើវិស័យស្ថាបត្យកម្មនិងនគរោបនីយវិទ្យានៅកម្ពុជា, មហាវិទ្យាល័យសិល្ប់សូនរូប ដែលបណ្តុះបណ្តាលកុលបុត្រខែ្មរឱ្យក្លាយជា វិចិត្រករ អ្នកចម្លាក់ អ្នកគំនូរ អ្នកតុបតែងលំអ អ្នកឌីហ្សាញ អ្នករចនាម៉ូត ។ល។
មហាវិទ្យាល៧យតូរ្យតន្រ្តី ដែលផ្តោតសំខាន់ទៅលើការបណ្តុះបណ្តាលឧបករណ៍តន្ត្រីបុរាណខ្មែរ ឧបករណ៍តន្ត្រីបស្ចិមប្រទេស ចម្រៀងបុរាណចម្រៀងជាពួក ចម្រៀងអូប៉េរ៉ា និពន្ធតន្ត្រី បញ្ជាវង់ភ្លេង និងជាតិពន្ធុតន្ត្រីវិទ្យា ។ល។ និង មហាវិទ្យាល័យសិល្បៈនាដសាស្រ្ត ដែលបណ្តុះបណ្តាលនិស្សិតថ្នាក់ កម្រិតឧត្តម ឱ្យក្លាយទៅជាអ្នកមានទេពកោសល្យ ក្នុងការច្នៃប្រឌិត ការបង្កើតស្នាដៃសិល្បៈ ទស្សនីយភាពគ្រប់ទម្រង់ប្រកបដោយគុណភាព សមត្ថភាព និងប្រសិទ្ធភាពស្របតាមចរន្ត នៃសាកលភាវូបនីយកម្មទាំងក្នុងតំបន់ និងអន្តរជាតិ៕
