ម៉ាច ប៉ារីស ជាកូនអ្នកជនបទរស់នៅភូមិក្រូច ឃុំសែនសុខ ស្រុកក្រឡាញ់ ខេត្តសៀមរាប, កុមារារូបនេះ ត្រូវ​បានជ្រើសរើស​ជាតំណាងកុមារវ័យក្មេងបំផុតក្នុង​សហគមន៍ ចូលរួមវេទិកាតំបន់អាស៊ីប៉ាស៊ីហ្វិកលើកទី១២ ក្រោមប្រធានបទ “កុំទុកកុមារណាម្នាក់ចោល ៖​ កុមារជាស្នូលនៃអភិវឌ្ឍន៍ប្រកបដោយចីរភាព” នៅសន្និសីទអង្គការសហប្រជាជាតិ ក្នុងទីក្រុងបាងកក ប្រទេសថៃ កាលពីពេលថ្មីៗនេះ។

ប៉ារីស ជាកុមារាអាយុ១៥ឆ្នាំ ដ៏មានសមត្ថភាព ក្នុងនាមជាអ្នកដឹកនាំកុមារ អ្នកស្រាវជ្រាវវ័យក្មេង និងអ្នកសម្របសម្រួលជំរុំអំណានសហគមន៍។ ជាផ្នែកមួយ នៃការចូលរួមរបស់គាត់ក្នុងយុទ្ធនាការគ្រប់គ្រាន់ “ENOUGH” ប៉ារីស កំពុងដឹកនាំគម្រោងស្រាវជ្រាវដឹកនាំដោយកុមារ/យុវជន ដែលមានគោលបំណងដោះស្រាយបញ្ហាអាហារូបត្ថម្ភកុមារនៅកម្ពុជា។

ក្នុងអំឡុងវេទិកាអាស៊ីប៉ាស៊ីហ្វិកលើកទី១២ ស្តីពីការអភិវឌ្ឍន៍ប្រកបដោយចីរភាព (APFSD) ប៉ារីស បានធ្វើបទបង្ហាញប្រកបដោយមោទនភាពដែលជាតំណាងសំឡេងរបស់កុមារ និងយុវជនពីប្រទេសកម្ពុជា និងទូទាំងអាស៊ី។ ប៉ារីស ក៏បានចូលរួមក្នុងកិច្ចប្រជុំដោយឡែកចំនួនពីរ ដោយទីមួយ ក្រោម​ប្រធានបទ “ផ្សារភ្ជាប់អ្នកដែលងាយរងគ្រោះ៖ ដំណោះស្រាយបញ្ហាសុខភាពកុមារ និងអាហារូបត្ថម្ភនៅអាស៊ី និងប៉ាស៊ីហ្វិក” ដែលបានផ្តោតលើការកែលម្អសុខភាពកុមារទូទាំងតំបន់ ខណៈកិច្ចប្រជុំទីពីរ “កុំទុកកុមារណាម្នាក់ចោលឡើយ៖ កុមារជាស្នូលនៃគោលដៅអភិវឌ្ឍន៍ប្រកបដោយចីរភាព”។ ក្នុងសម័យប្រជុំទាំងនេះ ប៉ារីស បានពិភាក្សាអំពីបទពិសោធន៍របស់គេ លទ្ធផលនៃការស្រាវជ្រាវដឹកនាំដោយកុមាររបស់គេ និងផ្តល់នូវសំណើរសំខាន់ៗ។

បន្ថែមពីការចូលរួមនិយាយទាំងនេះ ប៉ារីសបានឱកាសភ្ជាប់ទំនាក់ទំនងជាមួយថ្នាក់ដឹកនាំកម្រិតខ្ពស់ និងដៃគូនៅក្នុងបន្ទប់ព័ត៌មានអ្នកវ័យក្មេងនៅស្តង់មួយដែលបានរៀបចំឡើងដោយអង្គការទស្សនៈពិភពលោកនៃវេទិកា APFSD។ តាមរយៈការសម្ភាសន៍ ប៉ារីសបានចូលរួមក្នុងការពិភាក្សាដ៏មានន័យ និងសមស្របសម្រាប់កុមារជាមួយមនុស្សសំខាន់ៗដូចជា Rachael Beaven នាយកផ្នែកស្ថិតិរបស់អង្គការសហប្រជាជាតិ ESCAP, Terry Ferrari ថ្នាក់ដឹកនាំតំបន់នៃ អង្គការទស្សនៈពិភពលោក ប្រចាំតំបន់អាស៊ីខាងកើត និង Alexandra Bonnie អ្នកជំនាញអភិវឌ្ឍន៍ប្រកបដោយចីរភាពតំបន់សម្រាប់អង្គការសហប្រជាជាតិ IOM។ ការពិភាក្សាទាំងនេះបានផ្តោតពីរបៀបដែលយុវជនអាចរួមចំណែកក្នុងការសម្រេចគោលដៅអភិវឌ្ឍន៍ប្រកបដោយចីរភាព (SDGs) ដែលបានផ្តល់ឱកាសឲ្យប៉ារីសបង្ហាញពីតួនាទីសំខាន់ដែលកុមារ និងយុវជនមានក្នុងការបង្កើតអនាគតប្រកបដោយចីរភាព។

ព្រឹត្តិការណ៍នេះ គឺជាទីកន្លែងមានន័យសម្រាប់ការចូលរួមរបស់កុមារ ហើយ ប៉ារីស ជាតំណាងសំឡេងរបស់កុមារផ្សេងទៀតនៅក្នុងសហគមន៍របស់គេក្នុងការបង្កើតអនាគតប្រកបដោយចីរភាព។ ប៉ារីស និយាយថា ខ្លួននឹងចែករំលែកបទពិសោធន៏នៃការចូលរួមទៅកាន់តមិត្តភ័ក្រដើម្បីលើកទឹកចិត្តឱ្យ​ពួកគេមានភាពក្លាហានក្នុងការចូលរួម កាន់តែប្រសើរជាងមុន ហើយ​លើសពីនេះ ប៉ារីស ក៏នឹងបន្ដអភិវឌ្ឍន៏ខ្លួន ដើម្បីត្រៀមខ្លួនចូលរួម ក្នុងការសម្រេចចិត្តនានានៅពេលខាងមុខ បន្ដដឹកនាំអនុវត្តគម្រោងស្រាវជ្រាវដឹកនាំដោយកុមារបន្ថែមទៀតដើម្បីជាប្រយោជន៏ដល់ការមានភស្ដុតាងជាក់លាក់ក្នុងការផ្ដល់យោបល់លើការសម្រេចចិត្តរបស់អ្នកពាក់ពន្ធ័អោយកាន់តែប្រសើរឡើង។ ប៉ារីស ក៏​នឹងផ្សព្វផ្សាយបន្ថែម ពីគុណតម្លៃនៃការចូលរួមរបស់កុមារ ដោយពួកគេមិនគួរត្រូវបានមើលឃើញថា ត្រឹមតែជាអ្នកទទួលផលនោះទេ ពោលពួកគេក៏ជាអ្នកចូលរួមធ្វើអ្វីបានដើម្បីអភិវឌ្ឍន៏សហគមន៏ឱ្យ​រីកចំរើន។

លោកស្រី Teresa (Terry) Ferrari ថ្នាក់ដឹកនាំតំបន់ នៃអង្គការទស្សនៈពិភពលោក ប្រចាំតំបន់អាស៊ីខាងកើតមានប្រសាសន៍ដោយជឿជាក់ថា កុមារ និងយុវជនអាចផ្តល់នូវការរួមចំណែកដ៏ល្អឥតខ្ចោះរបស់ពួកគេតាមរយៈការចូលរួមក្នុងការកសាង ភស្តុតាង និងការបង្កើតគោលនយោបាយ។

“កុមារមានតួនាទីសំខាន់ មិនត្រឹមតែជាអ្នកទទួលផលប៉ុណ្ណោះទេ ប៉ុន្តែជាអ្នកដឹកនាំក្នុងការរកដំណោះស្រាយ”

គួរ​ជំរាបជូនថា កិច្ចប្រជុំដោយឡែក នៃវេទិកាអាស៊ីប៉ាស៊ីហ្វិកលើកទី១២ ស្តីពីការអភិវឌ្ឍន៍ប្រកបដោយចីរភាព មានគោលបំណងលើកកម្ពស់ការចូលរួមរបស់កុមារ ក្នុងនោះកុមារដែលបានចូលរួមក្នុងវេទិកានេះ រួម​មានកុមារពីប្រទេសកម្ពុជា ឥណ្ឌូណេស៊ី ម៉ុងហ្គោលី ស្រីលង្កា ភូមា និងវៀតណាម៕