ក្រៅពីមានជំនាញផ្ទាល់ខ្លួនហើយ តើត្រូវការអ្វីបន្ថែមទៀត ដើម្បីដើរឱ្យទាន់សម័យកាលដែលមានភាពប្រែប្រួលយ៉ាងលឿនរហ័សនាពេលបច្ចុប្បន្ននេះ? តាមរយៈគេហទំព័រ Chevening បានបង្ហាញជំនាញប្រាំដែលបានរួមចំណែកក្នុងការពន្លឿនភាពលូតលាស់ ភាពធន់ ការសម្របខ្លួន ក៏ដូចជាការរួមចំណែក ជាផលជះវិជ្ជមានទៅកាន់កន្លែងដែលខ្លួនរស់នៅតាមរយៈ​ការអភិវឌ្ឍវិជ្ជាជីវៈ​អាជីពផ្ទាល់ខ្លួន។

១. ការសិក្សាឈ្វេងយល់បន្ថែម ៖ ទម្លាប់នៃការចង់ដឹងចង់ឮ ទាក់ទងនឹងពិភពលោកខាងក្រៅ និងទស្សនៈមនុស្សដែលមកពីប្រភពផ្ទុយគ្នា គឺជាឱកាសក្នុងការបង្ហាញទិសដៅក្នុងការអភិវឌ្ឍខ្លួនផង និងវិជ្ជាជីវៈផង! ដូច្នេះការបណ្តុះថ្នាលឱ្យខ្លួនឯងមានទម្លាប់សិក្សាឈ្វេងយល់បន្ថែមជានិច្ច អំពីបរិយាកាស និងទីកន្លែងដែលខ្លួនកំពុងរស់នៅមានសារៈសំខាន់ក្នុងការផ្សារភ្ជាប់ទំនាក់ទំនងជាមួយមនុស្សជុំវិញខ្លួន រួមទាំងការប្រាស្រ័យទាក់ទងគ្នា ការសន្ទនាគ្នា និងការលើកទឹកចិត្តឱ្យមានសហគមន៍ដែលមានគំនិតចម្រុះប្លែកៗគ្នា ជាងនេះទៅទៀត ការមានទម្លាប់សិក្សាឈ្វេងយល់បន្ថែមដើរតួនាទីយ៉ាងសំខាន់ ដើម្បីជំរុញឱ្យយើងបានរៀនសូត្រអំពីគ្នាទៅវិញទៅមក និងការរកឱ្យឃើញនៃឬសគល់រាល់បញ្ហារួម និងសមត្ថភាពក្នុងការរកដំណាះស្រាយរួមគ្នាផងដែរ។

២. សម្របខ្លួននិងពង្រឹងភាពធន់ ៖ ភាពជោគជ័យលើដំណើរនៃការសិក្សា និងអាជីពវិជ្ជាជីវៈតែងមានភាពផ្លាស់ប្តូរ គ្រាន់តែតិច ឬច្រើន ទៅតាមស្ថានភាពនៃកន្លែងរស់នៅ។ ដូច្នេះការទម្លាប់ខ្លួននឹងការផ្លាស់ប្តូរ គឺជាជំនាញមួយដែលមិនអាចខ្វះបាន។ ហើយការបន្សំាខ្លួនឱ្យមានភាពធន់នេះទៀតសោត បានជះឥទ្ធិពលទៅកាន់ការដោះស្រាយបញ្ហាប្រឈម ស្ថានភាពមិនប្រាកដប្រជា និងការប្រែប្រួលនានា។ សម្របខ្លួននិងពង្រឹងភាពធន់ បានបណ្តុះផ្នត់គំនិតឱ្យក្រែប្រែបញ្ហាទៅជាឱកាសដើម្បីរៀនសូត្រ អភិវឌ្ឍន៍ខ្លួន និងការកសាងរបៀបគិតឱ្យមានភាពវិជ្ជមានជាងមុន។

៣. ភាពច្បាស់លាស់ក្នុងការសន្ទនា ៖ ការសន្ទនាគ្នាត្រូវការភាពជាក់លាក់ និងច្បាស់ៗ ហើយប្រើប្រាស់ពាក្យសាមញ្ញៗ ដើម្បីកាត់បន្ថយការយល់ច្រឡំ កាត់បន្ថយជម្លោះ និងធ្វើឱ្យភាគីម្ខាងទៀតងាយស្រួលយល់ និងផ្តល់ការឆ្លើយតបស្របតាមតម្រូវការផងដែរ។

៤. កិច្ចសហការគ្នា ៖ គ្មានភាពភាពជោគជ័យណា ដែលមិនត្រូវការមនុស្សក្នុងការសហការគ្នាទេ ជាពិសេសក្នុងដំណើរការប្រកបវិជ្ជាជីវៈ និងការសិក្សា។ ជំនាញនៃការសហការ បានជំរុញនូវការបង្កើតថ្មី ក៏ដូចជាការរួមគ្នាបង្កើតសមិទ្ធផលធំៗ តួយ៉ាងដូចជា ការធ្វើគម្រោងសិក្សាស្រាវជ្រាវ ត្រូវការឱ្យមនុស្សចាំបាច់ត្រូវចេះធ្វើការជាក្រុម មានវិន័យក្នុងការកំណត់ពេលវេលា ការចែករំលែកគំនិត និងពង្រឹងការកសាងក្រុមជាដើម។

៥. ជំរុញផលជះជាវិជ្ជមានក្នុងសង្គម ៖ ការចង់ដឹងចង់ឮបន្ថែម ការចេះសហការ ការសម្របខ្លួន និងការទំនាក់ទំនងជាកត្តាសំខាន់រួមចំណែកដល់ការសម្រួច​វិជ្ជាជីវៈ​អាជីពផ្ទាល់ខ្លួន ប៉ុន្តែដើម្បីរក្សាដំណើរមួយនេះឱ្យមានរយៈពេលយូរទៅបាន ត្រូវការឱ្យគិតលើសពីប្រយោជន៍ផ្ទាល់ខ្លួន។ លើសពីការគិតចំពោះសមិទ្ធផលផ្ទាល់ខ្លួន ចង់បានន័យថា បន្ថែមការគិតគូរអំពីប្រយោជន៍ក្នុងសង្គម ជាការគិតមួយដែលផ្តល់ផលជះវិជ្ជមានទៅកាន់សហគមន៍ដែលខ្លួនរស់នៅ ការគិតបែបនេះជាការផ្សារភ្ជាប់ស្មារតីខ្លួនឯងជាមួយនិងសង្គម ក្នុងការសម្រេចឱ្យបាននូវការអភិវឌ្ឍប្រកបដោយនិរន្តរភាពទាំងខ្លួនឯង និងសង្គមជាតិ៕