កីឡាវាយសីមិន​ត្រឹម​តែជា​ប្រភេទកីឡា​ដែលងាយស្រួលលេង ជួយបង្កើនសកម្មភាពសប្បាយៗក្នុងសហគមន៍ប៉ុណ្ណោះទេ តែកីឡាប្រភេទនេះ ក៏​បានផ្តល់​អត្ថប្រយោជន៍​ជា​ច្រើន​ទៅ​កាន់​រាងកាយផងដែរ។ គេហទំព័រ healthfitnessrevolution បានបង្ហាញ​ពីអត្ថប្រយោជន៍ ៥ចំណុច អំពីកីឡាវាយសី។

១. ពង្រឹងកាយសម្បទា ៖ កីឡាវាយសីមានចលនាដូចជា រត់តិចៗ ជើងទប់លំនឹង និងប្រើកម្លាំងដៃដើម្បីវាយគ្រាប់សីត្រឡប់ទៅវិញទៅមក ដែលសកម្មភាពទាំងនោះហើយ ជាកត្តានាំឱ្យដុតខ្លាញ់នៅលើរាងកាយ ហើយអាចសម្រកទម្ងន់បានខ្លះ។ លេងវាយសីត្រឹមតែមួយម៉ោងប៉ុណ្ណោះ អាចដុតកាឡូរីរហូតទៅដល់៤៥០ ដោយមិនដឹងខ្លួន ព្រោះវាជាសកម្មភាពដែលកម្សាន្តៗ។

២. អភិវឌ្ឍសមត្ថភាពដើម្បីទៅលេងកីឡាផ្សេងៗទៀត ៖ កីឡាវាយសីជាប្រភេទកីឡាដែលតម្រូវឱ្យអ្នកលេងមានភាពលឿនរហ័ស ទាំងរាងកាយ និងស្មារតី ដូច្នេះហើយត្រូវការយកចិត្តទុកដាក់ខ្ពស់ និងមានថាមពលគ្រប់ពេល ដែលជាហេតុនាំឱ្យរាងកាយ អាចអភិវឌ្ឍល្បឿន មានភាពបត់បែន និងផលិតភាព។ ក្រៅពីនោះវាបានជំរុញឱ្យមនុស្សមានភាពវៃឆ្លាត ដោយសារអ្នកលេង ត្រូវតែដឹងអំពីរបៀបបង្វែរដានគូប្រកួត និងកុំឱ្យដៃគូស្មានដឹងពីកម្លាំងដែលបញ្ជូនគ្រាប់សី នេះបើនិយាយក្នុងលក្ខខណ្ឌប្រកួត។ ជារួម មិនថាលេងដើម្បីប្រកួត ឬកម្សាន្ត កីឡាវាយសី នឹងជួយអភិវឌ្ឍភាពរហ័សរហួន និងពង្រឹងភាពឈ្លាសវៃ ហើយវាក៏ល្អសម្រាប់ពង្រឹងសាច់ដុំជើងផងដែរ។

៣. ពង្រឹងសុខភាពផ្លូវចិត្ត ៖ ដោយសារតែកីឡាវាយសី អាចជំរុញឱ្យសុខភាពផ្លូវកាយមានភាពរឹងមាំ ដូច្នេះវាក៏អាចធ្វើឱ្យយើងកាត់បន្ថយការបាក់ទឹកចិត្ត និងភាពតានតឹង។ លំហាត់ប្រាណ បានបង្កើនអរម៉ូនអង់ដូហ្វីន ដែលអាចធ្វើឱ្យអារម្មណ៍ល្អជាងមុន មួយវិញទៀតវាអាចធ្វើឱ្យការគេងមានភាពស្ងប់ជាងមុន។ កីឡាវាយសី ជំរុញឱ្យខួរក្បាលស្រស់ស្រាយល្អ ពីព្រោះវាជាសកម្មភាពមួយដែលលេងបានគ្រប់កន្លែងក្នុងសង្គម។

៤.ទំនាក់ទំនងក្នុងសង្គម ៖ ដើម្បីដំណើរការ កីឡាវាយសីបាន អ្នកប្រាកដជាត្រូវការដៃគូដើម្បីលេង ឬប្រកួតប្រជែង យ៉ាងហោចណាស់ក៏ម្នាក់ដែរ ។ យ៉ាងណាមិញ អ្នកក៏ត្រូវការក្រុមមកលេងដែរ ដើម្បីជំរុញទឹកចិត្តក្នុងការបន្តសកម្មភាព។ ការធ្វើទំនាក់ទនងតាមរយៈកីឡាវាយសី ជាវិធីមួយធ្វើឱ្យគ្រប់ភាគីមានអារម្មណ៍ល្អនឹងគ្នា ដែលវាតែងតែផ្តល់ផលវិជ្ជមានរៀងរាល់ពេលដែលសម្រាកពីការលេង ឬប្រកួត។ ទន្ទឹមគ្នានោះ អ្នកនឹងក្លាយជាផ្នែកមួយនៅក្នុងសហគមន៍ ហើយអ្នកក៏អាចចូលរួមលេងក្នុងរយៈពេលវែង ប្រសិនបើអ្នកពិតជាមានចំណូលចិត្តខ្លាំងទៅលើកីឡាប្រភេទនេះ។

៥. ល្អសម្រាប់សុខភាពគ្រប់ផ្នែក ៖ តាមរយៈការបញ្ចេញថាមពលរាល់គ្រប់ទម្រង់នៃរាងកាយ កីឡាវាយសីអាចកាត់បន្ថយ ឬក៏លុបបំបាត់ហានិភ័យបញ្ហាសុខភាពនានា ដូចជាសម្ពាធឈាមឡើងខ្ពស់ ជំងឺទឹកនោមផ្អែម និងការលើសទម្ងន់ជាដើម៕