ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រទេសបារាំងបានដាក់ចេញច្បាប់ហាមប្រាមប្រើស្មាតហ្វូន និងឧបករណ៍អេឡិចត្រូនិកផ្សេងទៀតក្នុងសាលា ចំពោះសិស្សដែលមានអាយុ ១៥ឆ្នាំចុះក្រោម, ក្នុងនោះមានសាលាមធ្យមសិក្សា ចំនួន ២០០ ទូទាំងប្រទេសបានអនុវត្តច្បាប់។ នេះបើតាមការចេញផ្សាយរបស់ Euro News ។
ក្នុងយុគ្គសម័យឌីជីថល ការចំណាយពេលជាមួយអេក្រង់ច្រើនហួសកម្រិត អាចបង្កជាបញ្ហាសុខភាពមួយដ៏គួរឱ្យបារម្ភ ជាពិសេសក្នុងចំណោមកុមារ និងក្មេងជំទង់។ ការចំណាយពេលជាមួយអេក្រង់ច្រើន អាចរំខានដល់ការលូតលាស់រាងកាយ ស្ថេរភាពផ្លូវចិត្ត និងពេលវេលា ដែលពួកគេអាចចំណាយនៅខាងក្រៅ។ នាយកដ្ឋានអប់រំ និងរដ្ឋាភិបាលទូទាំងពិភពលោក កំពុងស្វែងរកវិធី ដើម្បីដោះស្រាយបញ្ហាសកលនេះ។
យោងតាមការចេញផ្សាយដោយរដ្ឋាភិបាលបារាំង បានឱ្យដឹងថា ការហាមឃាត់នេះ គឺដាក់បម្រាមមិនឱ្យប្រើប្រាស់ទូរស័ព្ទដៃ និងឧបករណ៍អេឡិចត្រូនិចផ្សេងទៀត ដូចជា ថេប្លេត និងនាឡិកាឆ្លាតវៃ នៅក្នុងសាលារៀន និងមហាវិទ្យាល័យ។ ច្បាប់នេះអនុញ្ញាតឱ្យក្រុមប្រឹក្សាភិបាលសាលា ណែនាំ និងបង្កើតបទបញ្ញាត្តផ្ទៃក្នុង ហាមឃាត់ការប្រើប្រាស់ ឧបករណ៍អេឡិចត្រូនិកឆ្លាតវៃនៅក្នុងសាលារៀន។ ការហាមប្រាមនេះ មានសុពលភាព ទាំងអំឡុងពេល និងក្រៅម៉ោងសិក្សា។
ទោះជាយ៉ាងណាក៏ដោយ ច្បាប់នេះក៏មានករណីលើកលែងមួយចំនួនដែរ។ សិស្សដែលមានពិការភាព ឬស្ថានភាពសុខភាព ដែលតម្រូវឱ្យប្រើឧបករណ៍វេជ្ជសាស្ត្រ ភ្ជាប់ជាមួយឧបករណ៍អេឡិចត្រូនិច ក្នុងគោលបំណងថែ និងព្យាបាលស្ថានភាពសុខភាព និងជំងឺរបស់ខ្លួន គឺត្រូវបានអនុញ្ញាតឱ្យប្រើប្រាស់។
ទាក់ទងនឹងការហាមឃាត់តាមលក្ខខណ្ឌ ច្បាប់ក៏បានកំណត់កាលៈទេសៈដែលលើកលែងសម្រាប់ការប្រើប្រាស់ផងដែរ។ ជាពិសេសគឺការប្រើប្រាស់ក្នុងគោលបំណងសិក្សា និងស្រាវជ្រាវ ឬប្រើនៅទីកន្លែង ដែលបទបញ្ញាត្តិផ្ទៃក្នុង បានអនុញ្ញាតឱ្យសិស្សប្រើប្រាស់ឧបករណ៍អេឡិចត្រូនិក៕
