ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្រូយ ចំណាន បច្ចុប្បន្នជានិស្សិតឆ្នាំទី៣ នៃវិទ្យាស្ថានបច្ចេកទេសឧស្សាហកម្ម (ITI) ជំនាញព័ត៌មានវិទ្យា ឬហៅកាត់ថា IT ។ ការចាប់យកជំនាញនេះ សម្រាប់ ចំណាន គឺក្នុងគោលបំណងបង្កើនឱកាសការងារ ពង្រឹងជំនាញឱ្យមានភាពច្បាស់លាល់ និងចាប់យកនូវអ្វីដែលរូបគេរំពឹងចង់បាននៅពេលខាងមុខ។
ងាកទៅបរិយាយអំពីប្រវត្តិ នៃការសិក្សា ក្រោយបញ្ចប់មធ្យមសិក្សាទុតិយភូមិ ចំណាន បានចូលរៀននៅសាលាដុនបូស្កូលើជំនាញអគ្គិសនី ។ ហើយដើមទងដែលជំរុញចិត្ត ឱ្យយុវជនរូបនេះ សម្រេចចិត្តបន្តរៀនជំនាញព័ត៌មានវិទ្យាបន្ថែម នៅសាលា ITI គឺដោយសារតែរូបគេសម្លឹងឃើញថា ទីផ្សារនៅក្នុងសង្គមបច្ចុប្បន្ន កំពុងមានតម្រូវការខ្ពស់ទៅលើជំនាញព័ត៌មានវិទ្យា។ មិនត្រឹមតែប៉ុណ្ណោះ ចំណាន ក៏សង្កេតឃើញខ្លួនឯងថា ហាក់មាននិស្ស័យស្រឡាញ់ជាប់ចិត្តនឹងជំនាញនេះដែរ បន្ទាប់មកក៏បានដាក់ពាក្យចូលរៀនជំនាញព័ត៌មានវិទ្យាតែម្តង។
រៀនជំនាញព័ត៌មានវិទ្យាដំបូងឡើយ ដោយសារតែ គិតថាទីផ្សាររបស់យើងទៅថ្ងៃមុខអាចកើនឡើងខ្លាំងបំផុត គឺខាងបច្ចេកវិទ្យា និងព័ត៌មានវិទ្យា។ ដូចនេះខ្ញុំគិតថា វាពាក់ព័ន្ធគ្នាជាមួយអគ្គិសនី។ អាចថាជំនាញទាំងពីរនេះមានភាពប្រទាក់ក្រឡាគ្នា បើចេះទាំងពីរទៅក៏ល្អដែរ
ស្រូយ ចំណាន
តាមរយៈការចូលរៀនជំនាញ IT នៅកំឡុងពេលឆ្នាំសិក្សាមូលដ្ឋាន ចំណានបានសិក្សាលម្អិតបន្ថែមអំពី កម្មវិធីមួយចំនួនដូចជា ទំនាក់ទំនងផ្នែកទិន្នន័យ (Data communication) ជួសជុលកុំព្យូទ័រផ្នែកដែលប៉ះបាន (Hardware Repair) និងការសិក្សាអំពីប្រភេទនៃកម្មវិធីរបស់កុំព្យូទ័រ (Software computer)។ ទន្ទឹមគ្នានោះ ក៏មានផ្តោតអំពីពាក្យបច្ចេកទេសជាភាសាអង់គ្លេស និងការគណនាគណិតវិទ្យាដែលពាក់ព័ន្ធជាមួយនឹងព័ត៌មានវិទ្យាជាដើម។ ហើយជំនាញចុងក្រោយដែល ចំណាន បានក្រេបយកពីឆ្នាំទីមួយនោះក៏មានរួបបញ្ចូលនៅជំនាញទន់( Soft skill ) ដែលបកស្រាយអំពីការប្រាស្រ័យទាក់ទង ក៏ដូចជាកិច្ចសហការ និងសង្រួបសង្រួមសាមគ្គីគ្នាជាដើម។
ខ្ញុំគិតថា ដើម្បីរៀនបាន ចំពោះជំនាញព័ត៌មានវិទ្យា បច្ចេកវិទ្យាគឺ ត្រូវការទាំងពីរ មានន័យថា ទ្រឹស្ដី និងអនុវត្តន៍។ ហើយបើអត់អនុវត្តន៍ទេ គឺអត់កើតទេ
ស្រូយ ចំណាន
ត្បិតថា ចំណាន ទទួលបានការគាំទ្រ ជាកម្លាំងចិត្តពីអ្នកជុំវិញខ្លួនច្រើនក៏ពិតមែន និងមានភាពចាស់ទុំក្នុងការជ្រើសជំនាញរបស់ខ្លួនក៏ដោយ ប៉ុន្តែដំណើរការសិក្សានៅតែមានបញ្ហាប្រឈមដូចសិស្សដទៃទូទៅដែរ។ ភាសាអង់គ្លេសជាចំណុចប្រឈមមួយ សម្រាប់លោក ប៉ុន្តែចំណាននៅតែអាចស្វែងរកច្រកចេញពីឧបសគ្គទាំងនេះបាន ដោយខិតខំប្រឹងប្រែងបន្ថែម ទៅលើការរៀនភាសាអង់គ្លេស ដោយស្រាវជ្រាវរៀនដោយខ្លួនឯងជាចម្បង ស្វែងរកឯកសារគាំទ្រ និងរៀនចុះរៀនឡើង ត្រឡប់ទៅត្រឡប់មក រហូតទាល់តែមានទំនុកចិត្តទៅលើខ្លួនឯងប្រសើរជាងមុន។
ដើម្បីពង្រឹងជំនាញបន្ថែម ក្រៅតែពីការសិក្សា ចំណាន ក៏បានបង្កើតគម្រោងពីរ ដែលមានដូចជា Smart Home និង Smart City ដែលបង្ហាញអំពីភាពជឿនលឿន នៃការប្រើប្រាស់អាគារ ដែលមានភ្លើងបិទបើកដោយស្វ័យប្រវត្ត និងមានសកម្មភាពជាច្រើនទៀតនៅក្នុងនោះ។ ហើយនៅថ្ងៃអនាគត លោកមានបំណងអភិវឌ្ឍលើជំនាញទាំងនេះបន្ថែមទៀត។
លោក ចំណាន បានផ្តល់ជាយោបល់ថា សម្រាប់អ្នកដែលមានបំណងចង់សិក្សាជំនាញជំនាញព័ត៌មានវិទ្យា(IT) ត្រូវមានការតាំងចិត្តឱ្យបានខ្ពស់ ហើយការសម្រេចចិត្តចូលរៀនទៀតសោធន គឺត្រូវមានភាពឯករាជ្យ ដោយមិនសម្រេចចិត្តតាមឥទ្ធិពលរបស់អ្នកដទៃនោះទេ៕
