ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីដើមសប្តាហ៍នេះ ថ្នាក់ដឹកនាំបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប (WEG) បានធ្វើដំណើរទស្សនកិច្ចទៅគ្រឹះស្ថានឧត្តមសិក្សាចំនួន ៥នៅក្នុងប្រទេសថៃ ដែលរួមមាន ៖ Panyapiwat Institute of Management, Global Academy at Siam University, Khon Kaen University, Assumption University, និង University of Thai Chamber of Commerce-International School of Management ដើម្បីបង្កើនកិច្ចសហការ ពង្រីកឱកាសអាហារូបករណ៍ ការត្រៀមខ្លួនទៅសិក្សា កម្មវិធីផ្លាស់ប្តូរបទពិសោធន៍ និងកម្មវិធីពង្រឹងសមត្ថភាពបុគ្គលិក។
សូមបញ្ជាក់ថា និស្សិតដែលសិក្សានៅតាមបណ្តាគ្រឹះស្ថានឧត្តមសិក្សាខាងលើ មានឱកាសទទួលបានសញ្ញាបត្រដែលមានតម្លៃស្មើជាគ្រឹះស្ថានអប់រំដៃគូសហការនៅអូស្ត្រាលី កាណាដា ជប៉ុន ចិនផងដែរ។
ក្នុងអំឡុងទស្សនកិច្ចនេះ ឧកញ៉ា ប៉ិច បូឡែន អគ្គនាយក WEG បានជួបសំណេះសំណាលជាមួយថ្នាក់ដឹកនាំសាកលវិទ្យាល័យ និងសាស្រ្តាចារ្យ ដើម្បីពិភាក្សា ផ្លាស់ប្តូរគំនិតអំពីកម្មវិធីសិក្សាអន្តរជាតិរបស់សាកលវិទ្យាល័យ លក្ខខណ្ឌចុះឈ្មោះសិក្សា ឱកាសអាហារូបករណ៍ ការស្នាក់នៅសម្រាប់និស្សិត កម្មវិធីបោះជំរំសម្រាប់សិស្សនៅប្រទេសថៃ។
លោកឧកញ៉ាបានបញ្ជាក់ថា ទស្សនកិច្ចនេះជាផ្នែកមួយនៃការប្តេជ្ញាចិត្តរបស់ស្ថាប័នក្នុងការជំរុញកិច្ចសហការជាតិ និងអន្តរជាតិ ដើម្បីបង្កើតឱកាសថ្មីៗសម្រាប់សិស្សានុសិស្សរបស់ខ្លួន។
នៅ Panyapiwat Institute of Management (PIM) កិច្ចពិភាក្សាផ្ដោតលើ ការឈ្វេងយល់ពីកម្មវិធីសិក្សាតាមបែប Work based ដោយផ្តល់ឱកាសដល់និស្សិតទទួលបានបទពិសោធកាងារក្នុងអំឡុងពេលសិក្សា និង ការចុះកិច្ចសហការបញ្ជូនសិស្សទៅសិក្សានៅវិទ្យាស្ថាននេះ។
នៅ Global Academy ប្រចាំនៅ Siam University, ក្រុមហ៊ុនវេសឡាញ បានចុះអនុស្សរណៈយោគយល់ជាមួយគ្រឹះស្ថាននេះ ដើម្បីផ្តល់អាហារូបករណ៍ដល់សិស្សានុសិស្សរបស់ក្រុមហ៊ុនវេសឡាញ ការរៀបចំកម្មវីធីដំណើរទស្សនកិច្ច។
នៅ Khon Kaen University ឧកញ៉ា ប៉ិច បូឡែន បានជួបពិភាក្សាជាមួយព្រឹទ្ធបុរសមហាវិទ្យាល័យអន្តរជាតិ មហាវិទ្យាល័យអប់រំ និងទស្សនាសាលាអន្តរជាតិអនុវត្តន៍របស់ Khon Kaen University។ កិច្ចពិភាក្សាទាំងពីរបានពិភាក្សានិងបង្ហាញការប្តេជ្ញាសហការលើការផ្លាស់ប្តូរបទពិសោធន៍បុគ្គលិកអប់រំ គ្រូបង្រៀន និងការស្រាវជ្រាវលើផ្នែកអប់រំផងដែរ។
នៅ Assumption University(AU), ក្រុមហ៊ុនវេសឡាញបានពិភាក្សាស្វែងរកឱកាសផ្តល់អាហារូបករណ៍ និងការសហការរៀបចំនូវសិក្ខាសាលាប្រឹក្សាជ្រើសរើសជំនាញសម្រាប់សិស្សានុសិស្សនៅកម្ពុជា។ ដៃគូទាំងពីរបានបង្ហាញជំហរជាវិជ្ជមានក្នុងការចាប់ដៃគូសហការជិតស្និទ្ធនាពេលខាងមុខនេះដែរ។
នៅ University of Thai Chamber of Commerce (UTCC), ឧកញ៉ា ប៉ិច បូឡែន បានជួបពិភាក្សាជាមួយសាកលវិទ្យាធិការរងទទួលបន្ទុកទំនាក់ទំនងអន្តរជាតិ ដើម្បីធ្វើបច្ចុប្បន្នភាពកិច្ចការអប់រំរបស់ស្ថាប័នទាំង២ក្នុងភាពជាដៃគូដែលមានស្រាប់ និងឈ្វេងយល់ពីឱកាសផ្លាស់បទពិសោធន៍សិស្សតាមរយៈកម្មវិធីបោះជំរំសម្រាប់សិស្សប្រចាំឆ្នាំ។
សូមជម្រាបថា ដំណើរទស្សនកិច្ចនេះគឺជាការផ្សារភ្ជាប់កិច្ចសហការ និងផ្តល់ឱកាសថ្មីដល់សិស្សកម្ពុជា ពីសេសបណ្តាញអប់រំ និងបណ្តុះបណ្តាលវេសឡាញ ឱ្យអាចចូលរួមយ៉ាងសកម្មក្នុងការសិក្សា-អនុវត្តស្របតាមតម្រូវការរបស់សង្គមនិងសេដ្ឋកិច្ចកម្ពុជា។ វេសឡាញនឹងបន្តសហការជាមួយសាកលវិទ្យាល័យទាំងនេះដើម្បីបង្កើតកម្មវិធីសិក្សាដែលអាចឆ្លើយតបទៅនឹងតម្រូវការអាជីវកម្ម និងទីផ្សារការងារ៕
