ឱកាសទទួលបានអាហារូបករណ៍៥០% សិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៅសាកលវិទ្យាល័យធនធានមនុស្សសម្រាប់ឆ្នាំសិក្សា២០២៣-២០២៤។ អាហារូបករណ៍ផ្ដល់ជូនពីសហភាពសហព័ន្ធយុវជនកម្ពុជា រាជធានីភ្នំពេញសម្រាប់និស្សិត យុវជន និងមន្ត្រីរាជការកម្ពុជាគ្រប់រូប។

ជំនាញដែលអាហារូបករណ៍ផ្ដល់ជូនសម្រាប់ថ្នាក់បរិញ្ញាបត្រជាន់ខ្ពស់រួមមាន គ្រប់គ្រងធុរកិច្ច, វិទ្យាសាស្ត្រនយោបាយ, នីតិសាស្ត្រ, គណនេយ្យនិងហិរញ្ញវត្ថុ , សវនកម្ម, សេដ្ឋកិច្ច, គ្រប់គ្រងធនធានមនុស្ស, រដ្ឋបាលសាធារណៈ, បង្រៀនភាសាអង់គ្លេស, គ្រប់គ្រងការអប់រំ និងភាពជាអ្នកដឹកនាំ ធនាគារនិងហិរញ្ញវត្ថុ។ ជំនាញសម្រាប់ថ្នាក់បណ្ឌិតរួមមាន វិទ្យាសាស្ត្រនយោបាយ នីតិសាស្ត្រ សេដ្ឋកិច្ច គ្រប់គ្រងពាណិជ្ជកម្ម ហិរញ្ញវត្ថុ រដ្ឋបាលសាធារណៈ ទំនាក់ទំនងអន្តរជាតិ វិទ្យាសាស្ត្រអប់រំ និងជំនាញគោលនយោបាយសាធារណៈ។

លក្ខខណ្ឌជ្រើសរើស បេក្ខជនត្រូវមានសញ្ញាបត្របរិញ្ញាបត្រ ឬឯកសារបញ្ជាក់មានតម្លៃស្មើសម្រាប់បេក្ខជនសិក្សាថ្នាក់បរិញ្ញាបត្រជាន់ខ្ពស់។ បេក្ខជនត្រូវមានសញ្ញាបត្របរិញ្ញាបត្រជាន់ខ្ពស់ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់បណ្ឌិត។ ជាមួយគ្នានេះបេក្ខជនត្រូវឆ្លងកាត់ការប្រឡងប្រជែងជ្រើសរើសដែលរៀបចំដោយក្រុមការងារកម្មវិធីសាបព្រោះគ្រាប់ពូជ នៃសហភាពសហព័ន្ធយុវជនកម្ពុជារាជធានីភ្នំពេញ និងត្រូវទទួលបន្ទុកចំណាយផ្សេងៗ និងគោរពតាមលក្ខខណ្ឌរបស់សាកលវិទ្យាល័យនៅពេលចុះឈ្មោះចូលរៀន។

ឯកសារចាំបាច់ដែលបេក្ខជនត្រូវភ្ជាប់ក្នុងការស្នើសុំអាហារូបករណ៍រួមមាន ពាក្យសុំអាហារូបករណ៍១ច្បាប់ បង្កាន់ដៃទទួលពាក្យសុំអាហារូបករណ៍១ច្បាប់ ជីវប្រវត្តិសង្ខេបដែលមានបិតរូបថតថ្មី (៤x៦) ១ច្បាប់ សញ្ញាបត្របរិញ្ញាបត្រ ឬឯកសារបញ្ជាក់មានតម្លៃស្មើ១ច្បាប់ (សម្រាប់ថ្នាក់បរិញ្ញាបត្រជាន់ខ្ពស់) និងសញ្ញាបត្របរិញ្ញាបត្រជាន់ខ្ពស់ ឬឯកសារបញ្ជាក់ដែលមានតម្លៃស្មើ១ច្បាប់ (សម្រាប់ថ្នាក់បណ្ឌិត)។ ជាមួយគ្នានេះ បេក្ខជនត្រូវភ្ជាប់ជាមួយ ថតចម្លងអត្តសញ្ញាណប័ណ្ណ ឬសេចក្ដីចម្លងសំបុត្របញ្ជាក់កំណើត១ច្បាប់ និងរូបថតថ្មីៗទំហំ៤x៦ស.ម ថតពីមុខគ្មានវ៉ែនតា និងមានផ្ទៃខាងក្រោយពណ៌ស។

បេក្ខជនដែលមានចំណាប់អារម្មណ៍ក្នុងការដាក់ពាក្យសូមធ្វើការទាញយកពាក្យស្នើសុំអាហារូបករណ៍របស់ ស.ស.យ.ក រាជធានីភ្នំពេញតាមរយៈតំណភ្ជាប់ https://bit.ly/46737uV ដើម្បីបំពេញ។ បេក្ខជនក៏អាចទំនាក់ទំនងដាក់ពាក្យផ្ទាល់ និងសាកសួរព័ត៌មានបន្ថែមជាមួយក្រុមការងារកម្មវិធីសាបព្រោះគ្រាប់ពូជតាមរយៈលេខទូរស័ព្ទ ០១៦ ៨៣១ ៣៨៧។

ចាប់ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី២៤ ខែមករា ឆ្នាំ២០២៤៕