ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងមហាផ្ទៃកាលពីពេលថ្មីៗនេះបានប្រកាសដល់សាធារណជន ក៏ដូចជាសិស្ស និស្សិត ដែលមានបំណងក្លាយជានាយនគរបាល និងនាយនគរបាលរងបន្តវេន ក្នុងក្របខ័ណ្ឌមន្រ្តីនគរបាលជាតិ សូមត្រៀមខ្លួនក្នុងការដាក់ពាក្យប្រឡងប្រជែងទទួលយកអាហារូបករណ៍នៅបណ្ឌិត្យសភានរគបាលកម្ពុជា ចំនួន៤០០កន្លែង ដែលរួមមានថ្នាក់បរិញ្ញាបត្រវិទ្យាសាស្រ្តនគរបាល សិក្សារយៈពេល៤ឆ្នាំ ចំនួន២០០កន្លែង, ថ្នាក់សញ្ញាបត្រមធ្យមឯកទេសនរគបាល សិក្សារយៈពេល២ឆ្នាំ ចំនួន១០០កន្លែង និង ថ្នាក់វិញ្ញាបនបត្រជាន់ខ្ពស់ជំនាញនគរបាលសិក្សារយៈពេល ១ឆ្នាំ ចំនួន ១០០កន្លែង។
លក្ខខណ្ឌ នៃការជ្រើសរើស ៖ បេក្ខជនទាំងពីរភេទ ត្រូវមានសញ្ជាតិខ្មែរ, មានទីលំនៅអចិន្រ្តៃយ៍ច្បាស់លាស់, មានជីវប្រវត្តិច្បាស់លាស់ មានកិរិយាមារយាទល្អ និងពុំធ្លាប់មានពិរុទ្ធភាពកន្លងមក, សុខភាពល្អ និងមាំមួន កាយសម្បទាគ្រប់គ្រាន់ និងឆ្លងកាត់ការត្រួតពិនិត្យកាយសម្បទាមុននឹងផ្តល់ពាក្យសុំប្រឡង (ពិនិត្យអវយវៈ ការនិយាយស្តី ការស្តាប់ ការមើល ដំណើរ ស្លាកស្នាមសាក់លើដងខ្លួន និងតេស្តរកសារធាតុញៀន), បុរសមានកម្ពស់ ១,៧០ម៉ែត្រឡើងទៅ នារីមានកម្ពស់ ១,៦៥ម៉ែត្រឡើង និងមានទម្ងន់សមាមាត្រនឹងកម្ពស់, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើ, មានអាយុគិតត្រឹមថ្ងៃប្រឡងយ៉ាងច្រើន ២៥ឆ្នាំ និងយ៉ាងតិច ១៦ឆ្នាំ សម្រាប់ថ្នាក់បរិញ្ញាបត្រ និងថ្នាក់សញ្ញាបត្រមធ្យមសិក្សាឯកទេសនគរបាល ហើយយ៉ាងតិច ១៧ឆ្នាំ សម្រាប់ថ្នាក់វិញ្ញាបនបត្រជាន់ខ្ពស់ជំនាញនគរបាល, នៅលីវ (ចាប់ពីពេលដាក់ពាក្យប្រឡង រហូតដល់ពេលបញ្ចប់ការសិក្សា)។
កន្លែងផ្តល់ពាក្យ និងទទួលពាក្យ ៖ នៅបណ្ឌិត្យសភានគរបាលកម្ពុជា ស្ថិតនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល ផ្លូវជាតិលេខ១ ចម្ងាយ ២៦គីឡូម៉ែត្រ ពីរាជធានីភ្នំពេញ។ ការផ្តល់ពាក្យចាប់ពីថ្ងៃទី២៥ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០២៤។
ជំនាញដែលត្រូវជ្រើសរើស ៖ ថ្នាក់បរិញ្ញាបត្រវិទ្យាសាស្រ្តនគរបាល ជំនាញប្រតិបត្តិការកិច្ចការនគរបាលភាសាអង់គ្លេស ជំនាញសន្តិសុខ ជំនាញសណ្តាប់ធ្នាប់សាធារណៈ និងជំនាញស៊ើបអង្កេតព្រហ្មទណ្ឌ, សញ្ញាបត្រមធ្យមឯកទេសនគរបាល ជំនាញសណ្តាប់ធ្នាប់សាធារណៈ និងជំនាញស៊ើបអង្កេតព្រហ្មទណ្ឌ, ថ្នាក់វិញ្ញាបនបត្រជាន់ខ្ពស់ជំនាញនគរបាល។
សម្រាប់វិញ្ញាសាប្រឡងរួមមាន ៖ ចំណេះដឹងទូទៅ, ចំណេះដឹងទូទៅទាក់ទងនឹងកិច្ចការនគរបាល។
ឯកសារដែលត្រូវភ្ជាប់មកជាមួយ ៖ នៅពេលបេក្ខជនម្នាក់ៗមកទទួលពាក្យប្រឡងប្រជែងចូលសិក្សានៅបណ្ឌិត្យសភានគរបាលកម្ពុជាត្រូវភ្ជាប់មកជាមួយនូវឯកសារដូចជា ៖ បង្កាន់ដៃស្នើសុំពាក្យប្រឡងប្រជែង ដែលបានស្នើសុំតាមប្រព័ន្ធអនឡាញ (https://reg.pac.edu.kh) ១ច្បាប់, សញ្ញាបត្រ ឬលិខិតបញ្ជាក់ការសិក្សា (ច្បាប់ដើម) ១ច្បាប់, សេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត ១ច្បាប់, អត្តសញ្ញាណប័ណ្ណសញ្ជាតិខ្មែរ (ច្បាប់ដើម) ១ច្បាប់, សៀវភៅស្នាក់នៅ ឬសៀវភៅគ្រួសារ (ច្បាប់ដើម) ១ច្បាប់, លិខិតថ្កោលទោស (ផ្តល់ជូនក្រោយពេលប្រឡង) ១ច្បាប់។ បេក្ខជនដែលទើបប្រឡងមធ្យមសិក្សាទុតិយភូមិឆ្នាំ២០២៤ ត្រូវថតចម្លងលទ្ធផលដែលបានប្រឡងជាប់មកប្រគល់ជូនក្រុមការងារផ្តល់ពាក្យ និងពេលមកដាក់ពាក្យ បេក្ខជនត្រូវយកវិញ្ញាបនបត្របណ្ដោះអាសន្ន១ច្បាប់ ប្រគល់ជូនក្រុមការងារទទួលពាក្យ។
កាលបរិច្ឆេទប្រឡង នឹងប្រព្រឹត្តទៅនៅថ្ងៃទី២៨ ខែធ្នូ ឆ្នាំ២០២៤ នៅបណ្ឌិត្យសភានគរបាលកម្ពុជា៕
