ប្រតិកម្មមេតាប៉ូលីសដើរតួនាទីយ៉ាងសំខាន់ក្នុងការបម្លែងថាមពលទ្រទ្រង់រាងកាយ និងសុខុមាលភាពមនុស្ស។ មិនតែប៉ុណ្ណោះ នៅពេលដែល ប្រតិកម្មមេតាប៉ូលីស ដំណើរការបានល្អ ក៏ជាផ្នែកមួយដែលនាំឱ្យមានអាយុវែងទៀតផង។ មានកត្តាជាច្រើន ដែលមានឥទ្ធិពលទៅលើមេតាប៉ូលីស មានដូចជា ប្រវត្តិគ្រួសារ ហ្សែន របៀបរស់នៅ បរិស្ថាន និងរបបអាហារ ហើយអាហារមានឥទ្ធិពលយ៉ាងខ្លាំងទៅលើដំណើរការមេតាប៉ូលីស។ ហេតុផលនេះ ទើបតម្រូវឱ្យយើងត្រូវយកចិត្តទុកដាក់ខ្ពស់ទៅលើរបបអាហារ ដែលយើងទទួលទានរាល់ថ្ងៃ។ យោងតាមអ្នកជំនាញ មានអាហារ ៥ប្រភេទ ដែលអាចជួយសម្រួលមេតាប៉ូលីសរបស់អ្នកឱ្យមានភាពប្រសើរ៖

១. បន្លែបៃតង ៖ យោងតាមវេជ្ជបណ្ឌិត Casey Kelly ប្រធានផ្នែកវេជ្ជសាស្ត្រនៃ Case Integrative Health បានបង្ហាញថា បន្លែបៃតង មានសារៈសំខាន់ចំពោះមេតាប៉ូលីស ។ អាហារប្រភេទនេះ មានផ្ទុកនូវសារធាតុ ម៉ាញ៉េស្យូម និងជាតិដែក ដែលជាសារធាតុរ៉ែដ៏សំខាន់។ ម៉ាញ៉េស្យូម ត្រូវការជាចាំបាច់សម្រាប់ប្រតិកម្មគីមី ផលិតថាមពលក្នុងរាងកាយ។ ដោយឡែកជាតិដែក ជួយដឹកនាំអុកស៊ីហ្សែន ទៅកាន់កោសិកាទាំងអស់ក្នុងរាងកាយ។ បន្ទាប់មក កោសិកា នឹងប្រើប្រាស់អុកស៊ីហ្សែននេះ ដើម្បីផលិតថាមពល និងទ្រទ្រង់សរីរាង្គផ្សេងៗដូចជាខួរក្បាល និងបេះដូងផងដែរ។ ដើម្បីទទួលបានអត្ថប្រយោជន៍ពីបន្លែបៃតងកាន់តែច្រើន សូមញ៉ាំជាមួយអាហារសម្បូរវីតាមីន C ដូចជា ប៉េងប៉ោះ ក្រូចឆ្មា ឬដំឡូងជាដើម ហើយពួកវានឹងជួយបង្កើនប្រសិទ្ធភាពស្រូបយកជាតិដែក។

២. ផ្លែឈើ (ជាពិសេស ប្រភេទដែលសម្បូរវីតាមីន C)៖ ផ្លែឈើជាអាហារដ៏ល្អបំផុតមួយសម្រាប់ជំនួយដំណើរការមេតាប៉ូលីស ព្រោះវាសម្បូរទៅដោយសារធាតុប្រឆាំងអុកស៊ីតកម្ម ដែលជាម៉ូលេគុលបន្សាបរ៉ាឌីកាល់សេរី ដែលអាចបង្កើនហានិភ័យ នៃជំងឺរ៉ាំរ៉ៃ និងបន្ថយអាយុ ។ ការទទួលទានផ្លែក្រូច ក្រូចថ្លុង គីវី ស្រ្តប៊ីរី ម្នាស់ ស្វាយ ត្របែក ល្ហុង និងផ្លែឈើផ្សេងទៀត ដែលសម្បូរវីតាមីន C ជាជម្រើសដ៏ល្អ ប្រសិនបើអ្នកអ្នកចង់សម្រួលដំណើការមេតាប៉ូលីស។

៣. តែ ៖ វេជ្ជបណ្ឌិត Kelly លើកឡើងថា ទឹកតែមានសារធាតុប្រឆាំងអុកស៊ីតកម្ម ដែលមានឈ្មោះថា Catechins ។ ក្រៅពីការបំបាត់ស្ត្រេសអុកស៊ីតកម្ម ការខូចខាតកោសិកា និងសម្រួលការរំលាយអាហារ អ្នកជំនាញបន្ថែមថា Catechins ជួយគ្រប់គ្រងគ្រាប់ឈាម ជំរុញការរំលាយអាហារ និងបំបែកខ្លាញ់។ លើសពីនេះ ជាតិកាហ្វេអ៊ីននៅក្នុងតែ នឹងបង្កើនថាមពល ដែលអាចឱ្យអ្នកដុតកាឡូរីបានច្រើនក្នុងមួយថ្ងៃ។

៤. អាហារមានជាតិសរសៃ ៖ ការទទួលទានជាតិសរសៃរអាចពង្រឹងការដំណើរការមេតាប៉ូលីស ។ អ្នកជំនាញលើកឡើងថា អាហារដែលមានជាតិសរសៃរច្រើនដូចជា ប្រូខូលី ប៉ោម និងគ្រាប់ធញ្ញជាតិ ត្រូវការពេលយូរ ដើម្បីទំពារ ប៉ុន្តែជួយឱ្យឆ្អែតបានយូរ។ អាហារប្រភេទនេះ អាចជួយកាត់បន្ថយការញ៉ាំច្រើន ដែលអាចបណ្ដាលឱ្យរលាក និងពិបាករក្សាទម្ងន់។ លើសពីនេះ រាងកាយមនុស្សត្រូវការវា សម្រាប់ការគ្រប់គ្រងកម្រិតកូឡេស្ដូរ៉ល ជាតិស្ករក្នុងឈាម និងសុខភាពពោះវៀន ដែលទាំងអស់នេះអាចជួយដល់ការរំលាយអាហារ។

៥. ទឹក ៖ រាងកាយរបស់មនុស្សផ្សំឡើងដោយទឹកប្រមាណ ៦០ភាគរយ ហើយ H₂0 មានតួនាទីចាំបាច់ខ្លាំង សម្រាប់ទ្រទ្រង់រាងកាយ ព្រមទាំងមានមុខងារជាច្រើន រួមទាំងការបញ្ជូនអុកស៊ីសែនទៅកាន់កោសិកា ការយកកាកសំណល់ចេញ និងគ្រប់គ្រងស៊ីតុណ្ហភាពរាងកាយជាដើម។ ដូច្នេះ រាងកាយត្រូវការជាតិទឹកក្នុងបរិមាណជាក់លាក់ជារៀងរាល់ថ្ងៃ ដើម្បីដំណើរការរាងកាយ និងជួយដល់ការរំលាយអាហារ។

ជាមួយគ្នានេះ វេជ្ជបណ្ឌិត Casey Kelly ប្រធានផ្នែកវេជ្ជសាស្ត្រ នៃ Case Integrative Health បានបញ្ជាក់ថា ប្រសិនបើបុគ្គលម្នាក់មានមេតាប៉ូលីសល្អ មានន័យថា រាងកាយរបស់គេអាចរំលាយអាហារ និងស្រូបយកសារធាតុចិញ្ចឹមបានល្អ ។ វាអាចជួយឱ្យគេជៀសផុតពីជំងឺកាចសាហាវដូចជា ទឹកនោមផ្អែម ដាច់សរសៃរឈាមខួរក្បាល និងបេះដូងផងដែរ៕