ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – វិស័យអប់រំ និងវិស័យសុខាភិបាល ត្រូវបានរាជរដ្ឋាភិបាលកម្ពុជា ចាត់ទុកជាវិស័យដែលទទួលបានអាទិភាពខ្ពស់ជាងគេ ដោយក្នុងនោះ បើនិយាយពីថវិកាជាតិឆ្នាំ២០២៣ គឺបានផ្តោតទៅលើការអភិវឌ្ឍមនុស្ស។ នេះបើតាមប្រសាសន៍លើកឡើងរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសអញ្ជើញចុះពិនិត្យដំណើរការសាងសង់មន្ទីរពេទ្យជាតិ «តេជោសន្តិភាព» នៅព្រឹកថ្ងៃទី១៩ ខែមករា ឆ្នាំ២០២៣។
សម្តេចតេជោនាយករដ្ឋមន្រ្តីបានលើកឡើងថា នៅក្នុងសង្គមដែលមានការជឿនលឿន គឺចាំបាច់ត្រូវមានតម្រូវការផ្នែកវិស័យអប់រំ សង្គមកិច្ច និងសុខាភិបាល ពោលគឺវាទាក់ទងទៅនឹងការវិនិយោគមនុស្ស ការពារជីវិតមនុស្ស។
សម្តេចតេជោនាយករដ្ឋមន្រ្តី
“សង្គមដែលមានការជឿនលឿន គឺតម្រូវការផ្នែកវិស័យអប់រំ សង្គមកិច្ច សុខាភិបាល កាលណាវាកើនអាហ្នឹង គឺវាល្អវិញទេ សម្រាប់ប្រទេសមួយ”
សម្តេចតេជោបន្តថា ថវិកាឆ្នាំ២០២៣នេះ គឺជាថវិកាបម្រើឱ្យមនុស្ស ហើយចាប់ពីនេះទៅ វិស័យអប់រំ និងវិស័យសុខាភិបាល ជាវិស័យដែលទទួលបានអាទិភាពខ្ពស់ជាងគេ។
សម្តេចតេជោនាយករដ្ឋមន្រ្តី
” ក្រសួងនានាគឺកាត់បន្ថយនៃការជ្រើសរើសបុគ្គលិក ជួនកាលចូលនិវត្ត៥នាក់ ឱ្យរើសមកវិញតែ២នាក់ ឬ៣នាក់ទេ ប៉ុន្តែគ្រូពេទ្យរបស់យើងឆ្នាំកន្លងទៅខ្ញុំឱ្យ៣ពាន់ ប៉ុន្តែវាមិនគ្រប់ទេ…”
បើយោងតាមច្បាប់ថវិកាជាតិឆ្នាំ២០២៣ បានបង្ហាញថា កម្ពុជាគ្រោងចំណាយថវិកាចំនួន ៣៩ ២០៦ ២០៥លានរៀល ស្មើប្រមាណ ៩.៦ពាន់លានដុល្លារសម្រាប់ចំណាយនៅក្នុងឆ្នាំ២០២៣នេះ ដោយក្នុងនោះផ្តោតសំខាន់លើក្រសួងអប់រំ ក្រសួងសុខាភិបាល និងបន្ទាប់មកក្រសួងស្ថាប័នសំខាន់ៗមួយចំនួនទៀត។
គួរបញ្ជាក់ថា តាមយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា បានកំណត់យកវិស័យអាទិភាពចំនួន៤ជាសំខាន់ គឺមនុស្ស, ផ្លូវ, ភ្លើង និងទឹក ក្នុងនោះ មនុស្ស ដែលស្ថិតនៅក្នុងចតុកោណទី១ គឺផ្តោតទៅលើការអភិវឌ្ឍធនធានមនុស្ស រួមមានការពង្រឹងគុណភាពវិស័យអប់រំ វិទ្យាសាស្រ្ត និងបច្ចេកទេស, ការបណ្តុះបណ្តាលជំនាញបច្ចេកទេស, ការលើកកម្ពស់សេវាសុខភាពសាធារណៈ និងអាហារូបត្ថម្ភ និងការពង្រឹងសមភាពយេនឌ័រ និងការគាំពារសង្គម៕
