អ្នកបង្កើតមាតិកាវ័យក្មេង លោក ឈាន់ ប៉ហេង ដែលក៏ជាអតីតសិស្សនិទ្ទេស A ឆ្នាំ២០១៧ នៃវិទ្យាល័យចំណេះដឹងទូទៅ និងបច្ចេកទេស ព្រះបាទនរោត្តមសីហមុន្នី ខេត្តកំពង់ឆ្នាំង បានប្រើចំណូលចិត្តច្រៀងតាមចង្វាក់ភ្លេងរបស់ខ្លួនធ្វើ​ការ​ចែករំលែកចំណេះដឹងតាមបណ្ដាញសង្គម ដោយបច្ចុប្បន្ន​កំពុងទទួលការ​គាំទ្រ​យ៉ាងខ្លាំងពីសំណាក់យុវវ័យ។

លោក ឈាន់ ប៉ហេង បានឱ្យដឹងថា ការបង្កើតមាតិកាតាមបណ្ដាញសង្គមនេះ ដំបូងឡើងគឺលោកធ្វើឡើងដោយការបង្រៀនប្រយោគជាភាសាថៃ ព្រោះយល់ឃើញថា មានយុវជនខ្មែរជាច្រើនចូលរៀនភាសាថៃ ហើយខ្លួនចេះភាសាថៃពីមុនមកដែរ ដូច្នេះក៏យកចំណេះដឹងនេះមកចែករំលែកបន្តនៅលើបណ្ដាញសង្គម។ ប៉ហេង បន្តថា ក្រោយមកនៅពេលអ្នកគាំទ្រដឹងថា ខ្លួនធ្លាប់ជាអតីតសិស្សនិទ្ទេស A ក៏ស្នើសុំឱ្យចែកវីដេអូចែករំលែកគន្លឹះ ដើម្បីទទួលបាននិទ្ទេសA។ ដោយប៉ុន្មានឆ្នាំចុងក្រោយនេះ សិស្សម្នាក់ៗចង់ទទួលបាននិទ្ទេស A ដែលជារឿងល្អមួយ ហើយការបង្កើតមាតិកាអប់រំបែបនេះ អាចជំរុញឱ្យក្មេងៗជំនាន់ក្រោយមានគំនិតចង់រៀន ចង់ធ្វើអ្វីដែលថ្មី និងអាចជួយសង្គមបាន។ ចាប់ពីពេលនោះមក ប៉ហេង ក៏ប្ដូរពីការបង្រៀនភាសាថៃ មកបង្កើតមាតិកាចែករំលែកចំណេះដឹងអំពីការសិក្សា។

អ្នកបង្កើតមាតិកាចែលរំលែកចំណេះដឹងតាមបណ្ដាញសង្គមរូបនេះ បន្ថែមថា តាមការសង្កេតរបស់ខ្លួននៅពេលឮគេនិយាយដល់ការអប់រំ គេច្រើនធ្វើឱ្យជាលក្ខណៈផ្លូវការ សុភាពរម្យទម ប៉ុន្តែ ប៉ហេង វិញគិតថា បើបញ្ចូលការអប់រំតាមចរិករបស់ខ្លួនដែលចូលចិត្តសប្បាយ យកភ្លេងមកផ្គួបផ្សំ ប្រហែលជាអាចឱ្យសិស្សានុសិស្សដែលរៀននៅវិទ្យាល័យ មើលវីដេអូនេះ​បានទាំងកម្សាន្តអារម្មណ៍ បានទាំងចំណេះដឹង។ ទន្ទឹមគ្នានេះ ដោយសារការចូលចិត្តច្រៀង សរសេរចម្រៀង និងចង្វាក់ភ្លេងខ្លួនឯងតាំងពីរៀននៅថ្នាក់ទី១០ ទើបរូបគេសម្រេចចិត្តប្រើប្រាស់ទេពកោសល្យនេះ មកដាក់បញ្ចូលក្នុងវីដេអូចែករំលែកចំណេះដឹង។

ខ្ញុំគិតថាការបង្កើតមាតិកាបែបនេះ ជាផ្នែកមួយជួយសិស្សវិទ្យាល័យ ឬនិស្សិត មើលវីដេអូនេះ ដើម្បីរំសាយអារម្មណ៍ ដែលអាចជាផ្លូវមួយជួយឱ្យគាត់មានអារម្មណ៍ថា ការសិក្សាគឺសប្បាយ នាំឱ្យសិស្សចង់រៀន ហើយការរៀនកាន់តែច្រើនកាន់តែល្អ

លោក ឈាន់ ប៉ហេង ជាអ្នកបង្កើតមាតិកាចែលរំលែកចំណេះដឹងតាមបណ្ដាញសង្គម

លោក ឈាន់ ប៉ហេង បន្ថែមទៀតថា ការបង្កើតវីដេអូលើបណ្ដាញសង្គមមានសារៈសំខាន់ខ្លាំង ពោលប្រសិនបើមានអ្នកចង់បង្កើតមាតិកាចែករំលែកចំណេះដឹង គន្លឹះចម្បងបំផុត ត្រូវច្បាស់ថា តើចង់ធ្វើឬអត់? ប្រសិនជាបង្កើតមាតិកាដើម្បីតែផលប្រយោជន៍ អាចមួយឆ្នាំទៅពីរឆ្នាំបាត់កម្លាំងជំរុញចិត្តនឹងនាំឱ្យឈប់ធ្វើក៏ថាបាន។ ប៉ុន្តែប្រសិនបើយើងស្រឡាញ់ការបង្កើតមាតិកាចែករំលែកចំណេះដឹងពិតប្រាកដ និងចង់ធ្វើពិតប្រាកដ នោះយើងនឹងធ្វើវាបានយូរ។ ទន្ទឹមគ្នានេះ អ្នកបង្កើតមាតិកាត្រូវអភិវឌ្ឍចំណេះដឹង សមត្ថភាពក្នុងការធ្វើបទបង្ហាញ ដើម្បីកាត់បន្ថយការអៀនពេលនិយាយនៅមុខកាមេរ៉ា។

ខ្ញុំចង់ឱ្យមានអ្នកផលិតមាតិកាទាក់ទងនឹងការអប់រំច្រើន ប៉ុន្តែបើគ្រាន់តែមានចំនួនក៏មិនល្អដែរ ចាំបាច់ត្រូវមានគុណភាព ដោយបញ្ចូលនូវចំណេះដឹងអ្វីមួយដែលល្អលើសពីការចែករំលែកនោះ

លោក ឈាន់ ប៉ហេង ជាអ្នកបង្កើតមាតិកាចែលរំលែកចំណេះដឹងតាមបណ្ដាញសង្គម

អ្នកបង្កើតមាតិកា រូបនេះ បញ្ជាក់ថា នៅពេលផលិតវីដេអូ ប្រសិនបើមិនបានផ្ដល់ប្រយោជន៍អ្វីមួយដល់អ្នកមើលទេ គឺមានអារម្មន៍ថាអៀនខ្លួនឯង។ ទន្ទឹមគ្នានេះ ការបង្កើតវីដេអូ ជាសិទ្ធរបស់បុគ្គល ប៉ុន្តែប្រសិនជាអាចប្រើគេហទំព័រដោយបញ្ចូលសារចំណេះដឹងខ្លះឱ្យអ្នកទស្សនាទទួលបាន គឺជារឿងល្អ៕