ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីអបអរទិវាជាតិអំណានលើកទី៩ ដែលនឹងប្រព្រឹត្តទៅនៅថ្ងៃទី១១ ខែមីនា ឆ្នាំ២០២៤ ក្រសួងអប់រំយុវជន និងកីឡា បានរៀបចំឱ្យមានការប្រឡងប្រជែងបកស្រាយប្រធានបទ «តួនាទីព្រះពុទ្ធសាសនាក្នុងការលើកកម្បស់ការអប់រំសីលធម៌ និងចរិយាធម៌» ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា មូលហេតុដែលក្រសួងអប់រំជ្រើសរើសយកប្រធានបទខាងលើ ដាក់ឱ្យមានការប្រកួតប្រជែងបកស្រាយ គឺផ្អែកទៅលើមូលហេតុចំនួន៣ រួមមាន ទី១. ស្របទៅតាមអាទិភាពរបស់រាជរដ្ឋាភិបាល នៅក្នុងវិស័យអប់រំដែលនឹងផ្តោតលើការពង្រឹងអភិបាលកិច្ច សុខភាព ការចូលរួមរបស់អាណាព្យាបាល និងចំណុចសំខាន់ចុងក្រោយដែលពាក់ព័ន្ធនឹងប្រធានបទតែម្ដងគឺ ការកែសម្រួលកម្មវិធីសិក្សា ស្របតាមតម្រូវការពង្រឹងចំណេះដឹង វិស័យសីលធម៌និងឥរិយាបទរបស់សិស្ស។ ទី២. គឺប្រធានបទនេះឆ្លើយតបនឹងកម្មវិធីសិក្សា របស់ក្រសួងអប់រំដែលបានគូសបញ្ជាក់ពីគុណសម្បទាទាំង៣របស់សិស្ស (វិជ្ជាសម្បទា បំណិនសម្បទា និងចរិយាសម្បទា) ដែលត្រូវមានក្រោយបញ្ចប់ការសិក្សាឈានទៅក្លាយជាពលរដ្ឋពេញលេញ។
មូលហេតុចុងក្រោយ គឺមកពី ព្រះពុទ្ធសាសនាជាសាសនារបស់រដ្ឋ ចំណែកប្រលោមលោក ឬស្នាដៃតែងនិពន្ធផ្សេងនៅកម្ពុជាភាគច្រើន គឺផ្អែកទៅតាមបែបពុទ្ធនិយម។ ហេតុនេះក្រសួងជឿជាក់ថា អ្នកចូលរួមប្រកួតប្រជែងនឹងប្រើប្រាស់ស្នាដៃទាំងនោះជាមូលដ្ឋាន បកស្រាយប្រធានបទដែលក្រសួងបានដាក់ចេញ។
បើតាមសេចក្តីជូនដំណឹងរបស់ក្រសួងអប់រំ បេក្ខជនដែលអាចចូលរួមក្នុងការប្រឡងប្រជែងបាន គឺមានដូចជា មន្រ្តីអប់រំ គ្រូបង្រៀន គរុនិស្សិត គរុសិស្ស សិស្ស និស្សិត និងសាធារណជនទូទៅ។ បេក្ខជនត្រូវសរសរការបកស្រាយប្រធានបទចំនួនពី១៥ទំព័រ ទៅ២០ទំព័រ ដោយកុំព្យូទ័រ ប្រើពុម្ពអក្សរ Khmer OS Moul Light 12 (សម្រាប់ចំណងជើងនិងចំណងជើងរង) និង Khmer OS Siemreap ទំហំអក្សរ ១២ (សម្រាប់អត្ថបទ)។
កាលបរិច្ឆេទឈប់ទទួលស្នាដៃ គឺត្រឹមថ្ងៃទី២០ ខែកុម្ភៈ ឆ្នាំ២០២៤ វេលាម៉ោង៥រសៀលជាកំហិត។ បេក្ខជនអាចផ្ញើស្នាដៃតាមរយៈតេឡេក្រាម 010 22 07 88៕
