យោងតាមរបាយការណ៍ របស់ក្រុមហ៊ុនជ្រើសរើសបុគ្គលជំនាញរបស់ប្រទេសជប៉ុន Robert Walters Japan បានប្រកាសអំពីលទ្ធផលនៃការស្ទង់មតិបុគ្គលិកក្នុងប្រទេសជប៉ុន អំពីបញ្ហា Burn Out និងបញ្ហាសុខភាពផ្លូវចិត្ត។ ខណៈ​​បញ្ហា Burn Out ដែលជារោគសញ្ញានៃភាពតានតឹងនៅកន្លែងធ្វើការរ៉ាំរ៉ៃ មិនមែនជាបាតុភូតថ្មីនោះ បានក្លាយជាការព្រួយបារម្ភមួយចាប់តាំងពីជំងឺរាតត្បាតបានផ្ទុះឡើង ហើយមនុស្សលែងមានតុល្យភាពរវាងការងារនិងជីវិត។

បុគ្គលិកដែលបានចូលរួមក្នុងការស្ទង់មតិចំនួន ៥៦ភាគរយ បានលើកឡើងថា ពួកគេបានមានអារម្មណ៍ថា ពួកគេកំពុងមានរោគសញ្ញា Burn Out ហើយក្នុងចំណោមនោះ ៦០ភាគរយបាននិយាយថា ជីវិតផ្ទាល់ខ្លួនរបស់ពួកគេ បានរងឥទ្ធិពលអវិជ្ជមានពីកន្លែងការងារ។ ទន្ទឹមនឹងនេះ ស្ត្រីជនជាតិជប៉ុនមានអារម្មណ៍តានតឹងនៅកន្លែងធ្វើការ ហើយ ៦០ភាគរយនៃបុគ្គលិកជាស្ត្រីជឿថា ក្រុមហ៊ុនរបស់ពួកគេមិនផ្ដល់អាទិភាពដល់សុខភាពផ្លូវចិត្តបុគ្គលិកនោះទេ។

បើក្រឡេកមើលអំពីក្រុមភេទ និងអាយុបុគ្គលិក ដែលកំពុងជួបបញ្ហានេះ បុគ្គលិកជាស្ត្រី ៦៥ភាគរយ ធ្លាប់ជួបប្រទះបញ្ហា Burn Out ដែលមានអត្រាខ្ពស់ជាងបុគ្គលិកបុរសចំនួន ១៣ភាគរយ។ ទំនាក់ទំនង និងបន្ទុកនៅកន្លែងការងារត្រូវបានគេលើកឡើងជាហេតុផល ដែលនាំឱ្យមានបញ្ហា Burn Out ។ ជាមួយគ្នានេះ ជាង ៦០ភាគរយ នៃបុគ្គលិក ដែលមានអាយុ៤០ឆ្នាំ បានជួបប្រទះនឹងបញ្ហា Burn Out ខណៈ ៧០ភាគរយនៃបុគ្គលិកដែលមានអាយុ ៣០ឆ្នាំ ឬក្មេងជាងនេះ មានអារម្មណ៍ថា ជីវិតផ្ទាល់ខ្លួនរបស់ពួកបានទទួលឥទ្ធិពលអវិជ្ជមានពីការងារ។

ចំពោះវិធានការ ដើម្បីទប់ទល់នឹងបញ្ហា Burn Out នេះ បើយោងតាមការស្ទង់មតិបុគ្គលិកក្រុមហ៊ុន មានចំនួន ៤៨ភាគរយ បានលើកឡើងថា អ្នកដែលព្រួយបារម្ភពីបញ្ហា Burn Out គួរនិយាយបញ្ហានេះទៅកាន់នរណាម្នាក់ដែលអ្នកទុកចិត្ត, ៤១ ភាគរយ បានផ្ដល់យោបល់ឱ្យផ្លាស់ប្ដូរការងារ និង ៣៣ភាគរយ បានផ្ដល់យោបល់ឱ្យ បញ្ជាក់ពីសមត្ថភាពទទួលបន្ទុកការងារទៅកាន់ថ្នាក់លើ។

ដោយផ្អែកលើលទ្ធផលនេះ គេអាចសន្និដ្ឋានបានថា ការនិយាយពីបញ្ហាដែលខ្លួនជួបប្រទះចេញក្រៅ, ការផ្លាស់ប្ដូរការងារ និងដឹងច្បាស់ពីលទ្ធភាពទទួលការងារ អាចជួយឱ្យបុគ្គលិកអាចទប់ទល់នឹងបញ្ហា Burn Out បាន។ សម្រាប់ក្រុមហ៊ុនវិញ ការបំពេញការងារមិនបានល្អរបស់បគ្គលិក និងអវត្តមានដោយសារ បញ្ហា Burn Out គឺជាបញ្ហាចម្បងដែលប៉ះពាល់ដល់ផលិតភាព និងដំណើរការអាជីវកម្ម។ ខណៈបុគ្គលិកកាន់តែពូកែ កាន់តែទទួលបន្ទុកការងារច្រើន ហេតុនេះក្រុមហ៊ុនប្រហែលជាត្រូវបង្កើតប្រព័ន្ធគ្រប់គ្រងពេលវេលា និងបង្កើតក្រុម ដែលអាចត្រួតពិនិត្យទៅលើលទ្ធភាពបំពេញការងាររបស់បុគ្គលិក ថាតើបុគ្គលិកមានពេលសម្រាកបានត្រឹមត្រូវឬអត់៕