ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈសារលិខិត ក្នុងឱកាសទិវាអក្ខរកម្មជាតិ ៨ កញ្ញា លើកទី២៦ ក្រោមប្រធានបទ «អក្ខរកម្មលើកកម្ពស់គុណភាពអប់រំប្រកបដោយបរិយាបន្ន» សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យពង្រឹងការអប់រំបរិយាបន្ន និងការរៀនសូត្រពេញមួយជីវិត ដើម្បីកសាងមូលធនមនុស្ស និងសមធម៌សង្គម។
សម្តេចធិបតី ហ៊ុន ម៉ាណែត បានគូសបញ្ជាក់ថា ទិវាអក្ខរកម្មជាតិ ៨ កញ្ញា នៅក្នុងបរិបទសតវត្សទី២១ អត្ថន័យនៃអក្ខរកម្មមិនត្រឹមតែសំដៅលើសមត្ថភាពអាន សរសេរ និងគណនាលេខប៉ុណ្ណោះទេ ប៉ុន្តែថែមទាំងរាប់បញ្ចូលទាំងសមត្ថភាពប្រើប្រាស់ព័ត៌មាន ការគិតវិភាគ ការដោះស្រាយបញ្ហា អក្ខរកម្មឌីជីថល និងភាពជាពលរដ្ឋឌីជីថល ដែលជាតម្រូវការចាំបាច់ក្នុងការរស់នៅក្នុងយុគសម័យបច្ចេកវិទ្យា និងវិទ្យាសាស្ត្រទំនើប។
ស្របគ្នានឹងគោលដៅអភិវឌ្ឍន៍ជាតិ និងការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការអនុវត្តរបៀបវារៈអភិវឌ្ឍន៍ប្រកបដោយចីរភាពឆ្នាំ២០៣០ ជាពិសេសគោលដៅទី៤ ស្តីពី «ការធានាការអប់រំប្រកបដោយគុណភាព សមធម៌ បរិយាបន្ន និងការលើកកម្ពស់ឱកាសសិក្សាពេញមួយជីវិតសម្រាប់មនុស្សគ្រប់រូប» ទស្សនវិស័យរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានដាក់ចេញនៅក្នុងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព ដោយកំណត់យក «មនុស្ស» ជាអាទិភាពគន្លឹះទី១ និងផ្តោតលើការពង្រឹងគុណភាពអប់រំ ការលើកកម្ពស់អក្ខរកម្ម ការអភិវឌ្ឍជំនាញ និងឱកាសសិក្សាពេញមួយជីវិត ដោយធានាថា មនុស្សគ្រប់រូប ទាំងកុមារ យុវជនក្រៅសាលា កម្មករ កម្មការិនីរោងចក្រ និងមនុស្សពេញវ័យនៅគ្រប់តំបន់ ជាពិសេសអ្នករស់នៅតំបន់ជនបទ តំបន់លំបាកលំបិន ជនជាតិដើមភាគតិច ជនមានពិការភាព និងក្រុមប្រជាជនងាយរងគ្រោះ មានឱកាសទទួលបានការអប់រំដោយគ្មានការរើសអើង និងគ្មាននរណាម្នាក់ត្រូវបានបោះបង់ចោលឡើយ។
សម្តេចធិបតី ហ៊ុន ម៉ាណែត ក៏បានវាយតម្លៃខ្ពស់ចំពោះក្រសួងអប់រំ យុវជន និងកីឡា ដែលបានបន្តធ្វើការកែទម្រង់លើអាទិភាពមួយចំនួនក្នុងវិស័យអប់រំ ដូចជា ការពង្រឹងអភិបាលកិច្ចសាលារៀន កម្មវិធីសាលារៀនគំរូ ការអភិវឌ្ឍសមត្ថភាពគ្រូបង្រៀន កំណែទម្រង់ការប្រឡង ជាពិសេសការធ្វើបរិវត្តកម្មឌីជីថលក្នុងវិស័យអប់រំ តាមរយៈការជំរុញការប្រើប្រាស់បច្ចេកវិទ្យាឌីជីថលក្នុងការសិក្សា មុខវិជ្ជាទាក់ទងនឹងវិទ្យាសាស្ត្រ និងបច្ចេកវិទ្យានៅមធ្យមសិក្សាចំណេះទូទៅ ការសិក្សាជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យានៅឧត្តមសិក្សា, ការលើកកម្ពស់ការសិក្សាភាសាបរទេស ការបណ្តុះបណ្តាលជំនាញសតវត្សទី២១ ការអប់រំឌីជីថល ការអប់រំបច្ចេកទេសនៅតាមវិទ្យាល័យចំណេះទូទៅនិងបច្ចេកទេស និងការលើកកម្ពស់ឱកាសសិក្សាពេញមួយជីវិត។
លើសពីនេះ ក្រសួងអប់រំ បានផ្តល់ការគាំទ្រកម្មវិធីផ្សេងៗជាច្រើនសម្រាប់យុវជន និងកុមារងាយរងគ្រោះ ក្នុងនោះកម្មវិធីអក្ខរកម្មបំប៉នភាសាសម្រាប់ជនពេញវ័យ តាមរយៈការអប់រំក្រៅប្រព័ន្ធ និងកម្មវិធីអប់រំពហុភាសាសម្រាប់កុមារមកពីសហគមន៍ជនជាតិដើមភាគតិច តាមរយៈការអប់រំក្នុងប្រព័ន្ធ។ កម្មវិធីនេះ អនុវត្តដោយមានការផ្តើមគំនិតចងក្រងប្រព័ន្ធអក្សរក្រម សម្រាប់ភាសាកំណើតជនជាតិដើមភាគតិចចំនួន ៥ គឺ គ្រឹង ព្រៅ កាវ៉ែត ស្ទៀង និងភាសាចារ៉ាយ ដោយយកប្រព័ន្ធអក្សរក្រមភាសាខ្មែរធ្វើជាគោល ហើយមានយន្តការក្របខ័ណ្ឌតម្លាភាព កម្មវិធីសិក្សា និងសម្ភារសិក្សា ស្របតាមកម្មវិធីសិក្សាជាតិ ដោយផ្សារភ្ជាប់ទៅនឹងទំនៀមទម្លាប់ ប្រពៃណី និងវប្បធម៌របស់សហគមន៍ជនជាតិដើមភាគតិចនីមួយៗ។ ទន្ទឹមនឹងនេះ ក្រសួងបានយកចិត្តទុកដាក់ជាពិសេសលើការផ្តល់ឱកាសសិក្សាដល់ជនមានពិការភាព និងជនស្ថិតក្នុងសេចក្តីត្រូវការពិសេស តាមរយៈការពង្រឹងការអប់រំបរិយាបន្ន ការអប់រំពិសេស ការបណ្តុះបណ្តាលគ្រូបង្រៀន ការកែលម្អបរិយាកាសសិក្សា ការអភិវឌ្ឍសម្ភារសិក្សា និងផ្តល់សម្ភារសិក្សាសមស្រប ការប្រើប្រាស់ភាសាសញ្ញា អក្សរប្រៃយ៍ (Braille) និងឧបករណ៍ជំនួយផ្សេងៗ ដើម្បីធានាថា គ្មានកុមារ យុវជន ឬជនណាម្នាក់ ត្រូវបានរារាំងពីការទទួលបានការអប់រំដោយសារតែពិការភាព ឬសេចក្តីត្រូវការពិសេសរបស់ខ្លួនឡើយ។
នាយករដ្ឋមន្ត្រីកម្ពុជា បានអំពាវនាវដល់ក្រសួង ស្ថាប័នពាក់ព័ន្ធ អង្គការជាតិ-អន្តរជាតិ ដៃគូអភិវឌ្ឍន៍ សហគមន៍ និងប្រជាពលរដ្ឋគ្រប់រូប សូមយកចិត្តទុកដាក់ជាពិសេសបន្ថែមទៀតលើការងារអក្ខរកម្ម ក៏ដូចជាការងារអប់រំទាំងក្នុងប្រព័ន្ធ ក្រៅប្រព័ន្ធ និងមិនផ្លូវការ ដើម្បីលើកកម្ពស់ប្រព័ន្ធអប់រំកម្ពុជាប្រកបដោយគុណភាព ប្រសិទ្ធភាព សមធម៌ និងបរិយាបន្ន៕
