ក្រោយ​ចំណាយពេល​អស់រយៈពេល៨ខែ ទីបំផុតគណៈកម្មការបានរកឃើញម្ចាស់ជ័យលាភីលេខ១ និងជាអ្នកលើកពាន នៃកម្មវិធីជជែកដេញដោលយុវជនថ្នាក់ជាតិ ឆ្នាំ២០២៤ ដោយបានទៅលើក្រុមបេក្ខជនមកពីសាលាប៊ែលធី អន្តរជាតិ រាជធានីភ្នំពេញ ខណៈជ័យលាភីលេខ២ បានទៅលើក្រុមបេក្ខជនមកវិទ្យាល័យហ៊ុនសែន កំពង់ចាម សាលា​រៀនជំនាន់ថ្មី ។ ការប្រកួតវគ្គផ្តាច់ព្រ័ត្រនៃកម្មវិធីជជែកដេញដោលយុវជនថ្នាក់ជាតិ២០២៤ បានប្រព្រឹត្តិទៅនៅថ្ងៃទី០៨ ខែសីហា ឆ្នាំ២០២៤ នៅវិទ្យាស្ថានជាតិអប់រំ ស្របនឹងខួបលើកទី២៥ ទិវាអន្តរជាតិសម្រាប់យុវជន ក្រោមប្រធានបទ “នវានុវត្តន៍ឌីជីថលរបស់យុវជនសម្រាប់ការអភិវឌ្ឍប្រកបដោយចីរភាព”។

ក្នុង​វគ្គផ្តាច់ព្រ័ត្រកម្មវិធីជជែកដេញដោលយុវជនថ្នាក់ជាតិ ២០២៤ ក្រុមបេក្ខជនមកពីវិទ្យាល័យ ហ៊ុន សែន កំពង់ចាម សាលារៀនជំនាន់ថ្មី ខេត្តកំពង់ចាម ជាក្រុមស្រប ត្រូវ​ប្រកួតជាមួយ ក្រុមបេក្ខជនមកពីសាលា ប៊ែលធី អន្តរជាតិ រាជធានីភ្នំពេញ ជាក្រុមបដិសេធ ដោយធ្វើការជជែកដេញដោលលើប្រធានបទ “ការបង្កើនសាលារៀនគម្រូ គឺជាមាគ៌ាអទិភាពក្នុងការលើកកម្ពស់គុណភាពអប់រំនៅកម្ពុជា”។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ អបអរចំពោះបេក្ខជនទាំង២ក្រុមដែលបានបង្ហាញនូវចំណេះដឹង ក៏ដូចជាបំណិន ក្នុងការជជែកដោល។ ឯកឧត្តមបណ្ឌិតសភាចារ្យ ជឿជាក់ថា សម្រាប់ក្មួយៗទាំង២ក្រុម គឺសុទ្ធតែឈ្នះទាំងអស់គ្នា ។ ឈ្នះទាំងអស់គ្នាត្រង់នេះ មានន័យថា ដើម្បីចូលរួមនៅក្នុងការប្រកួតប្រជែង សិស្សជាបេក្ខជនប្រកួត បានធ្វើការស្រាវជ្រាវ ធ្វើការងារជាក្រុម ត្រិះរិះពិចារណា ជជែកវែកញែក​ជ្រើសរើសទឡ្ហីករណ៍ ហើយបានរៀនសូត្រទាំងលើប្រធានបទ និងវិធីរៀបចំទឡ្ហីករណ៍ ជាពិសេសរៀនសូត្រនូវបំណិនវោហាសព្ទសម្រាប់ការនិយាយជាសាធារណៈ។ ក្រុមទាំង២ ពិតជាបានបង្ហាញនូវសមត្ថភាពពិតប្រាកដមែន ហើយសមត្ថភាពនេះ នឹងជួយដល់ក្មួយៗទាំងអស់គ្នាបន្តការសិក្សាបន្ថែមទៀត ព្រមទាំងជាសមត្ថភាពរយៈពេលវែង។

«ថ្ងៃនេះអាចមានអ្នកបានលេខ១ និងលេខ២ ប៉ុន្តែសម្រាប់រយៈពេលមធ្យម និងរយៈពេលវែង គឺក្រុមទាំង២ ឈ្នះទាំងអស់គ្នា ដោយសារតែតាមរយៈការជជែកដេញដោលថ្ងៃនេះ ក្មួយៗនឹងទទួលបាននូវចំណេះដឹង ជាពិសេសរបៀបស្រាវជ្រាវ របៀបរៀនសូត្រសម្រាប់អនាគត ហើយក្មួយៗនឹងចងចាំជានិច្ចអំពីព្រឹត្តិការណ៍ថ្ងៃនេះដែលនឹងជួយឱ្យក្មួយៗពង្រឹងសមត្ថភាពតបន្តទៀត»

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា

យុវតី សុខម៉េង ម៉ីច័ន្ទម៉ាយ៉ាលីន ជាបេក្ខជនមួយរូបមកពីសាលារៀនប៊ែលធី អន្តរជាតិ រាជធានីភ្នំពេញ បានប្រាប់ឱ្យដឹងថា រូបគេពិតជាមានអារម្មណ៍សប្បាយរីករាយដែលបានឡើងមកប្រកួតក្នុងវគ្គផ្ដាច់ព្រ័ត្រនៃកម្មវិធីជជែកដោលយុវជនថ្នាក់ជាតិ ២០២៤។ បេក្ខជនជ័យលាភីរូបនេះ បញ្ជាក់បន្ថែមថា ក្រុមរបស់ខ្លួនបានចំណាយពេលវេលាចូលរួមក្នុងការប្រកួតកម្មវិធីនេះជាង៩ខែមកហើយ ទើបបានឈានមកដល់វគ្គផ្ដាច់ព្រ័ត្រក្នុងឆ្នាំ២០២៤នេះ។ ម៉ីច័ន្ទម៉ាយ៉ាលីន បន្តថា ក្រុមរបស់ខ្លួន ពិតជារំភើបដែលបានបង្ហាញសមត្ថភាពប្រកួតនៅលើឆាកក្នុងវគ្គផ្ដាច់ព្រ័ត្រមួយនេះ ហើយក៏បានប្ដេជ្ញាចិត្តថា ក្រុមរបស់ខ្លួននឹងខិតខំប្រឹងប្រែងយកជ័យជំនះឱ្យបានក្នុងការប្រកួតជជែកដេញដោលយុវជនថ្នាក់ជាតិ២០២៤នេះ។

គួរជម្រាបជូនថា កម្មវិធីជជែកដេញដោលយុវជនថ្នាក់ជាតិ ត្រូវបានរៀបចំឡើងដោយអគ្គនាយកដ្ឋានយុវជន នៃក្រសួងអប់រំ​យុវជន និង​កីឡា ដោយ​មានគោលបំណងផ្តល់ជូនជាវេទិកាសម្តែងមតិដល់យុវជនកម្ពុជា និងជាសង្វៀនវោហារសព្ទដើម្បីបណ្តុះបណ្តាល និងពង្រឹងបំណិនស្រាវជ្រាវ ការនិយាយជាសាធារណៈ ការដោះស្រាយបញ្ហា ការធ្វើការងារជាក្រុម ការច្នៃប្រតិដ្ឋ ការវិភាគនិងសំយោគ ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីអភិវឌ្ឍន៍សមត្ថភាពយុវជននៅកម្រិតមធ្យមសិក្សាក្នុងប្រទេសកម្ពុជា ឱ្យក្លាយខ្លួនជាពលរដ្ឋមានទំនួលខុសត្រូវក្នុងសង្គមជាតិ៕