អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានសិក្សាជាលើកដំបូងអំពីសមត្ថភាពក្នុងការសិក្សា និងសុខុមាលភាពរបស់សិស្ស ចាប់តាំងពីជំងឺរាតត្បាត បានចេញផ្សាយអំពីរូបភាពនៃក្ដីបារម្ភរបស់ខ្លួន។

កម្មវិធីសម្រាប់ការវាយតម្លៃនិស្សិតអន្តរជាតិ (ដែលត្រូវបានគេស្គាល់ថា PISA) នៅឆ្នាំ ២០២២ បានរកឃើញថា ការខិតខំសិក្សារបស់សិស្សបានធ្លាក់ចុះមិនធ្លាប់មានពីមុនមក នៅតំបន់ OECD ដែលមានប្រទេសចំនួន ៣៧ ចូលរួម។ បើប្រៀបធៀបទៅនឹងការបោះពុម្ពចុងក្រោយក្នុងឆ្នាំ២០១៨ ការអានជាមធ្យមបានធ្លាក់ចុះចំនួន ១០ពិន្ទុ ខណៈគណិតវិទ្យាធ្លាក់ចុះជិត ១៥ពិន្ទុ។

OECD បានលើកឡើងថា ការធ្លាក់ចុះនៃមុខវិជ្ជាគណិតវិទ្យានេះ បានកើតឡើងនៅក្នុងប្រទេស អាល្លឺម៉ង់ អ៊ីស្លង់ ហូឡង់ ន័រវេស និងប៉ូឡូញ ដោយធ្លាក់ចុះប្រមាណ ២៥ពិន្ទុ ឬច្រើនជាងនេះ។ ទន្ទឹមនឹងនេះ ជំងឺរាតត្បាត COVID-19 ក៏បង្ករឱ្យមានផលប៉ះពាល់របស់វាទៅលើការសិក្សាផងដែរ ប៉ុន្តែជាផ្នែកមួយប៉ុណ្ណោះ ព្រោះការធ្លាក់ចុះពិន្ទុគណិតវិទ្យា និងវិទ្យាសាស្ត្រ គឺចាប់ផ្ដើមស្ដែងឡើងតាំងពីមុនឆ្នាំ ២០១៨ មកម្ល៉េះ។

នាយកផ្នែកអប់រំរបស់ OECD លោក Andreas Schleicher បានលើកឡើងក្នុងសន្និសីទសារព័ត៌មានមួយថា «COVID ប្រហែលជាមានឥទ្ធិពលខ្លះ ប៉ុន្តែមិនមែនទាំងស្រុងនោះទេ មានកត្តារួចចំណែកជាច្រើនទៀត ហើយកត្តាទាំងនោះ ទំនងជាមានលក្ខណៈអចិន្ត្រៃយ៍ក្នុងប្រព័ន្ធអប់រំ ដែលអ្នកបង្កើតគោលនយោបាយ គួរតែយកចិត្តទុកដាក់ឱ្យមែនទែន។»

ហេតុអ្វីបានជាទិន្នន័យសំខាន់ ?

PISA ត្រូវបានបង្កើតឡើងនៅក្នុងឆ្នាំ ២០១០ ហើយបានផ្ដល់នូវរូបភាពរយៈពេលវែងនៃការទទួលបានការអប់រំនៅទូទាំងប្រទេសចំនួន ៨២ ដែលជាសមាជិក OECD ។ ជាមួយនឹងក្មេងអាយុ ១៥ឆ្នាំ ប្រហែល ៧០ ម៉ឺននាក់ ដែលត្រូវបានធ្វើតេស្តនៅក្នុង PISA ចុងក្រោយនេះ ទិន្នន័យ និងការយល់ច្បាស់ពីប្រភពនៃបញ្ហា គឺជាប្រភពព័ត៌មានដ៏មានតម្លៃ សម្រាប់ប្រទេសនៅជុំវិញពិភពលោក។

លោក Mathias Cormann អគ្គលេខាធិការ OECD បានពន្យល់ថា « PISA 2022 ជួយកំណត់ភាពខ្លាំងប្រៀបធៀប នៃប្រព័ន្ធអប់រំ ដែលដំណើរការបានល្អ ទោះបីជាមានការភ្ញាក់ផ្អើលនាពេលថ្មីៗនេះក៏ដោយ។» លោកបន្តថា «ទិន្នន័យនេះ អនុញ្ញាតឱ្យអ្នកបង្កើតគោលនយោបាយទូទាំង ៨១ប្រទេស និងសេដ្ឋកិច្ចដែលចូលរួម​ អាចពឹងផ្អែកបាន ហើយសម្របខ្លួនទៅនឹងកាលៈទេសៈជាក់ស្ដែងរបស់ប្រទេសពួកគេ និងបន្តការកែទម្រង់ប្រព័ន្ធអប់រំសម្រាប់អនាគតដ៏ភ្លឺស្វាង និងវិបុលភាព។»

ក្នុងអត្ថបទរបស់ WE Forum បានបន្ថែមថា ការកសាងប្រព័ន្ធអប់រំដែលបំពាក់ឱ្យសិស្សនូវជំនាញ អាកប្បកិរិយា និងតម្លៃ សម្រាប់សេដ្ឋកិច្ចនាពេលអនាគត គឺចាំបាច់ណាស់។ នៅខែមករា ឆ្នាំ ២០២២ វេទិកាសេដ្ឋកិច្ចពិភពលោកបានចេញផ្សាយនូវនិយមន័យនៃការអប់រំ 4.0 របស់ខ្លួន ដែលមានចំណងជើង ក្រដាសសសម្រាប់អនាគតនៃការរៀនសូត្រ ដែលមានគោលបំណងជួយអភិវឌ្ឍប្រព័ន្ធអប់រំឱ្យបានកាន់តែ​ប្រសើរ។

ការសម្រេចបាននូវភាពប៉ិនប្រសប់ជាមូលដ្ឋានក្នុងជំនាញទាំងនេះក៏នឹងមានសារៈសំខាន់សម្រាប់ការងារនាពេលអនាគតផងដែរ។ ជាពិសេស​ គឺការរៀនជំនាញថ្មី (Reskill) និងការសម្របខ្លួនទៅនឹងការមកដល់នៃនិន្នាការពិសេសៗដូចជា បញ្ញាសិប្បនិម្មិត (AI) កាន់តែមានសារៈសំខាន់។ ខណៈរបាយការណ៍អនាគតនៃការងាររបស់វេទិកាសេដ្ឋកិច្ចពិភពលោកឆ្នាំ ២០២៣ បានរកឃើញថា និយោជកប៉ាន់ស្មានថា ៤៤ភាគរយ នៃបុគ្គលិកនឹងត្រូវជួបឧបសគ្គក្នុងការងារបស់ខ្លួនក្នុងរយៈពេល ៥ឆ្នាំខាងមុខ។

Forum’s Education 4.0 Alliance កំពុងធ្វើការជាមួយរដ្ឋាភិបាល និងម្ចាស់អាជីវកម្ម ដើម្បីធានាថា ប្រព័ន្ធអប់រំកំពុងបណ្ដុះបណ្ដាលសិស្សសម្រាប់ការងារនាពេលអនាគត។

មេរៀននៃវិបត្តិកូវីដសម្រាប់ពិភពលោក្នុងប្រព័ន្ធអប់រំ

OECD រំលេចមេរៀនចំនួន ១០ ដែលអាចរៀនបានពីប្រព័ន្ធអប់រំដែលមានភាពធន់ នៅពេលដែលមានវត្តមានជំងឺរាតត្បាត COVID – 19 ដែលធ្វើឱ្យការអប់រំមានភាពទូលំទូលាយជាងមុន។

១. ជួយឱ្យសាលារៀនបើកបានយូរ ដើម្បីទទួលសិស្សបានកាន់តែច្រើន

២. ជួយឱ្យសិស្សបានត្រៀមខ្លួនសម្រាប់ការរៀនតាមរបៀបស្វ័យភាព

៣. កសាងមូលដ្ឋានគ្រឹះដ៏រឹងមាំសម្រាប់ការរៀនសូត្រ និងសុខុមាលភាពសម្រាប់សិស្សទាំងអស់

៤. កំណត់ពីមូលហេតុនៃការរំខាន ដែលបណ្ដាលមកពីការប្រើប្រាស់ឧបករណ៍ឌីជីថលនៅក្នុងថ្នាក់រៀន

៥. ពង្រឹងភាពជាដៃគូរវាងសាលា និងគ្រួសារសិស្ស និងជួយឱ្យឪពុកម្ដាយចូលរួមជាមួយសិស្ស ក្នុងការសិក្សា

៦. ពន្យារអាយុនៅពេលជ្រើសរើសទៅក្នុងកម្មវិធីអប់រំផ្សេងៗ

៧. ផ្តល់ការគាំទ្របន្ថែមដល់សិស្សដែលជួបការលំបាក ជំនួសឱ្យការតម្រូវឱ្យពួកគេរៀនឡើងវិញ ឬរៀននៅកម្រិតដដែល

៨. បង្កើតសាលារៀន ដែលដូចជាមជ្ឈមណ្ឌលសម្រាប់អន្តរកម្មសង្គម

៩. ធានាបាននូវបុគ្គលិក និងសម្ភារៈអប់រំដែលមានគុណភាពខ្ពស់ និងគ្រប់គ្រាន់

១០. រួមបញ្ចូលគ្នានូវស្វ័យភាពរបស់សាលា និងយន្តការធានាគុណភាព៕