កាលពីខែសីហា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានដាក់ចេញវិធានការគន្លឹះ​ក្នុងគោលដៅ​ពង្រឹង​គុណភាព​គ្រឹះស្ថាន​សិក្សា​រដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា ។ ជាមួយ​គ្នានេះដែរ រាជរដ្ឋាភិបាល​ក៏​បានដាក់ឱ្យ​ប្រើប្រាស់​ជាផ្លូវការ​នូវ «ស្តង់ដាសាលារៀនគំរូ» និង «ពានរង្វាន់សាលារៀនគំរូ សម្តេចមហាបវរធិបតី» សម្រាប់សាលារៀន​ដែលសម្រេចបាននូវស្តង់ដាសាលារៀនគំរូ ផងដែរ, តើសាលារៀនណា ដែលជា​មុខ​សញ្ញាក្នុងការវាយតម្លៃពានរង្វាន់ស្តង់ដាសាលារៀនគំរូ ?

បើតាមឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា ក្នុងពិធីប្រកាស​ដាក់​ឱ្យ​អនុវត្ត​ស្តង់ដាសាលាមធ្យមសិក្សា​ចំណេះទូទៅ​សាធារណៈគំរូ នៅសាកលវិទ្យាល័យជាតិបាត់ដំបង កាលពីពេលថ្មីៗនេះបញ្ជាក់ថា សាលារៀនដែលជាមុខសញ្ញាក្នុងការវាយតម្លៃជាប់ពានរង្វាន់ស្តង់ដា សាលារៀនគំរូ មានដូចជា ៖ សាលារៀលដែលកំពុងអនុវត្តគម្រោង សាលារៀនដែលទទួល មូល និធិ អភិវឌ្ឍពីរដ្ឋាភិបាល សាលារៀនដែលស្ថិតនៅក្រោមការគាំពីដៃគូ សាលារៀនដែលមានភាពម្ចាស់ការ សាលារៀនដែលធ្លាប់ជាប់ចំណាត់ថ្នាក់នាយកល្អ សាលារៀនជំនាន់ថ្មី សាលារៀនដែលមានសិស្ស ប្រឡងមធ្យមសិក្សាទុតិយភូមិ ជាប់និទ្ទេស A B C ច្រើន និងភាគរយប្រឡងជាប់លើសថ្នាក់ជាតិ ជាដើម។

តាមរយៈបទបង្ហាញ របស់ ឯកឧត្តម អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា ស្តង់ដាសាលារៀនគំរូ រួមមាន ស្តង់ដាទី១ លទ្ធផលសិក្សារបស់សិស្ស, ស្តង់ដាទី២ ការបង្រៀននិងរៀន, ស្តង់ដាទី៣ ការចូលរួមរបស់សហគមន៍, ស្តង់ដាទី៤ ដំណើរប្រតិបត្តិការ និងរដ្ឋបាលសាលារៀន និងស្តង់ដាទី៥ គណនេយ្យភាពរបស់សាលារៀន ក៏ដូចជាបានបង្ហាញពីទស្សនទាននៃសាលារៀនគំរូដូចខាងក្រោម ៖

(ទី១).សាលារៀនមានគណនេយ្យភាពជាមួយសហគមន៍និងធ្វើការកែលម្អសាលារៀនស្របតាមស្តង់ដាគំរូដោយមានការចូលរួមពីអ្នកពាក់ព័ន្ធជាពិសេសមាតាបិតាឬអ្នកអាណាព្យាបាលតាមរយៈការបង្កើតនិងដំណើរការគណៈកម្មការគ្រប់គ្រងសាលារៀននិងគណៈកម្មការគ្រប់គ្រងថ្នាក់រៀន

(ទី២).សាលារៀនមានស្វ័យភាពក្នុងការងារផែនការកែលម្អសាលារៀននិងថ្នាក់រៀនព្រមទាំងការផ្តល់ការអភិវឌ្ឍវិជ្ជាជីវៈជាប្រចាំដល់គណៈគ្រប់គ្រងសាលារៀននិងគ្រូបង្រៀន

(ទី៣).សាលារៀនអនុវត្តតេស្តស្តង់ដាជាប្រចាំនិងប្រើប្រាស់លទ្ធផលនៃតេស្តស្តង់ដាដើម្បីធ្វើការកែលម្អការបង្រៀននិងរៀន,ការជួយសិស្សរៀនយឺត,ផ្តល់ព័ត៌មានដល់មាតាបិតាឬអ្នកអាណាព្យាបាលនិងសហគមន៍ឱ្យចូលរួមគាំទ្របន្ថែម

(ទី៤).សាលារៀនស្វ័យភាពក្នុងការអនុវត្តកម្មវិធីសិក្សានិងការរៀបចំកម្មវិធីក្រៅម៉ោងសិក្សាដោយផ្ដោតលើកម្មវិធីអភិវឌ្ឍយុវជនកម្មវិធីអប់រំច្បាស់ចរាចរ,ការងារសហគមន៍និងការអប់រំសីលធម៌

(ទី៥).សាលារៀនយកចិត្តទុកដាក់លើការអប់រំសុខភាពអនាម័យបរិស្ថានស្អាតសាលារៀនគ្មានសំរាមនិងគិតគូរដល់អាហារូបត្ថម្ភសិស្សានុសិស្ស

(ទី៦).ការជំរុញការចូលរួមរបស់មាតាបិតាអ្នកអាណាព្យាបាលនិងសហគមន៍ក្នុងការគាំទ្រនិងការអភិវឌ្ឍសាលារៀន៕