ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នាយកដ្ឋានទំនាក់ទំនងវប្បធម៌ និងអាហារូបករណ៍ នៃក្រសួងអប់រំ យុវជន និងកីឡា បានបញ្ជាក់ថា នៅក្នុងឆ្នាំ២០២៣ គេគ្រោងនឹងប្រឡងជ្រើសរើសនិស្សិតអាហារូបករណ៍ទៅសិក្សានៅបរទេសសរុបចំនួន ៦៧២នាក់។
ក្នុងនោះ នៅខែមករា ឆ្នាំ២០២៣ មានការប្រឡងអាហារូបករណ៍ចំនួន ១៥០កន្លែង សម្រាប់ការសិក្សាថ្នាក់ឧត្តមសិក្សា និងក្រោយឧត្តម ដែលផ្តល់ដោយរដ្ឋាភិបាលចិន។ នៅខែកុម្ភៈ មានអាហារូបករណ៍ចំនួន ៣៥កន្លែង ក្នុងនោះ ទៅសិក្សានៅប្រទេសជប៉ុនចំនួន ៥កន្លែង លើការស្រាវជ្រាវ និងទៅប្រទេសហុងគ្រី ចំនួន៣០កន្លែង សម្រាប់ការសិក្សាថ្នាក់ឧត្តមសិក្សា និងក្រោយឧត្តមសិក្សា។
នៅខែមីនា ឆ្នាំ២០២៣ មានអាហារូបករណ៍ចំនួន១០កន្លែង សម្រាប់ការសិក្សាបរិញ្ញាបត្រនៅប្រទេសចិន (SUS Tech) ។ ខែឧសភា មានអាហារូបករណ៍ចំនួន ៣២កន្លែង សម្រាប់ការសិក្សាថ្នាក់ឧត្តមសិក្សា ក្នុងនោះអាហារូបករណ៍សាធារណរដ្ឋគូបា ចំនួន២កន្លែង និងសហព័ន្ធរុស្ស៊ីចំនួន ៣០កន្លែង។
ខែមិថុនា ឆ្នាំ២០២៣ មានអាហារូបករណ៍ចំនួន ១៦០កន្លែង ក្នុងនោះទៅសិក្សានៅប្រទេសជប៉ុន ៥០កន្លែង សម្រាប់ថ្នាក់ឧត្តមសិក្សា មធ្យមសិក្សា និងបច្ចេកទេសវិជ្ជាជីវៈ, អាហារូបករណ៍ទៅប្រទេសចិន ចំនួន១០កន្លែង សម្រាប់ការសិក្សាថ្នាក់បរិញ្ញាបត្រ និង អាហារូបករណ៍ទៅសិក្សានៅប្រទេសវៀតណាមចំនួន ១០០កន្លែង សម្រាប់ថ្នាក់បរិញ្ញាបត្រ។
នៅខែកក្កដា មានការប្រឡងអាហារូបករណ៍ចំនួន ១០កន្លែង សម្រាប់ការទៅសិក្សានៅប្រទេសចិន លើការបណ្តុះបណ្តាលថ្នាក់បរិញ្ញាបត្រ ខណៈខែសីហា មានអាហារូបករណ៍ចំនួន១៥កន្លែង សម្រាប់សិក្សាថ្នាក់បរិញ្ញាបត្រនៅប្រទេសឡាវ។
នៅខែវិច្ឆិកា ឆ្នាំ២០២៣ អាហារូបករណ៍ទៅសិក្សានៅប្រទេសថៃ លើថ្នាក់បណ្ឌិត បរិញ្ញាបត្រជាន់ខ្ពស់ និងបរិញ្ញាបត្រ មានចំនួន ២៥០កន្លែង ដោយក្នុងនោះប្រឡងលើកទី១ ជ្រើសយក១០០០នាក់ និងលើកទី២ សម្រាំងយក ២៥០នាក់។
នៅចុងឆ្នាំ២០២៣ ពោលគឺនៅខែធ្នូ ក៏មានការប្រឡងអាហារូបករណ៍ សម្រាប់ការសិក្សាថ្នាក់បរិញ្ញាបត្រ នៅប្រទេសមីយ៉ាន់ម៉ា ចំនួន១០កន្លែងផងដែរ។
ដូច្នេះសម្រាប់សិស្សនិស្សិតដែលមានបំណងចង់បន្តការសិក្សានៅក្រៅប្រទេស សូមត្រៀមខ្លួនក្នុងការពង្រឹងសមត្ថភាព និងស្វែងរកព័ត៌មានលម្អិតពីអាហារូបករណ៍ នៅការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ ដែលមានអាសយដ្ឋានអគារលេខ២៣ ផ្លូវ៣៦០ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ៕
