ភ្នំពេញ – ក្រោយ​ការ​ប្រកាស​លទ្ធផល​បាក់ឌុប សម្រាប់​សិស្សានុសិស្ស​​ដែល​រស់នៅជនបទ ឬតាមបណ្តាខេត្ត​នានា ប្រាកដជា​កំពុង​តែពិបាក​ក្នុង​ការ​សម្រេច​ចិត្តថា តើពួកគេ​គួរ​តែ​មកបន្ត​ការ​សិក្សា​ថ្នាក់ឧត្តមសិក្សា​នៅ​រាជធានីភ្នំពេញ ឬក៏​គួរ​រៀន​នៅ​មហាវិទ្យាល័យ ឬសាកលវិទ្យាល័យ ដែលមាន​នៅ​តាម​បណ្តា​ខេត្ត​របស់ពួកគេ?

លោកបណ្ឌិត យង់ ពៅ អគ្គលេខាធិការ នៃរាជ្យបណ្ឌិត្យសភាកម្ពុជា មានប្រសាសន៍ថា ការបន្តការសិក្សាថ្នាក់ឧត្តមសិក្សា​នៅ​ភ្នំពេញ ឬបន្តការសិក្សានៅ​តាម​សាកលវិទ្យាល័យតាមបណ្តា​ខេត្ត គឺជាជម្រើសល្អដូចគ្នា ប៉ុន្តែវា​ក៏​អាស្រ័យទៅលើលទ្ធភាពរបស់សិស្ស ឬអាណាព្យាបាល។

អគ្គលេខាធិការនៃរាជ្យបណ្ឌិត្យសភាកម្ពុជា បន្តថា វាមិនពិបាកក្នុងការជ្រើសរើសជំនាញសិក្សាឡើយ ។ លោកថា ប្រសិនបើយុវជនរៀននៅខេត្ត គឺអាចសម្លឹងមើលទៅថា ឱកាសការងារណាដែលមាននៅក្នុងខេត្តរបស់ខ្លួន បើទោះជាគ្រូបឋមសិក្សា គ្រូមធ្យមសិក្សា ឬរៀនវិជ្ជាជីវៈផ្សេងដែលខេត្តកំពុងត្រូវការ។ លោកបណ្ឌិត​បាន​លើក​ឧទាហរណ៍ថា ដូចជាខេត្តដែលនៅតំបន់ទេសចរណ៍ ខេត្តនៅមាត់សមុទ្រ ខេត្តសៀមរាប យុវជន​គួរតែរៀនផ្នែកវិស័យទេសចរណ៍ ។ តែលោក​ក៏​បាន​បញ្ជាក់ថា ការ​ណែនាំនេះ គឺសម្រាប់សិស្សរស់នៅក្នុងខេត្តនោះ ហើយ​មានឧបនិស្ស័យចំពោះការងារ និងមានឧបនិស្ស័យទៅលើជំនាញជាចំណង់ចំណូលចិត្ត។

លោកបណ្ឌិត យង់ ពៅ បន្ថែមថា ការ​ជ្រើសរើសរៀននៅខេត្ត គឺគួរ​តែគិត​លើ២ចំណុច ទី១.គួរជ្រើសរើសជំនាញវិជ្ជាជីវៈដែលអាចបម្រើនៅក្នុងសង្គមសេដ្ឋកិច្ចខេត្តរបស់ខ្លួន ទី២.សមស្របនឹងចំណង់ចំណូលចិត្តអ្វីដែលយើងមានសេចក្ដីប៉ងប្រាថ្នា និងស្របទៅតាមតម្រូវការទីផ្សារដែលសង្គមត្រូវការ។

លោកបណ្ឌិត យង់ ពៅ អគ្គលេខាធិការនៃរាជ្យបណ្ឌិត្យសភាកម្ពុជា

“ខ្ញុំលើកទឹកចិត្តឱ្យយុវជនរៀនជំនាញវិជ្ជាជីវៈ (TVET) ព្រោះងាយនឹងរកការងារធ្វើ បង្កើតការងារធ្វើ អាចធ្វើជាថៅកែខ្លួនឯងបានលឿន ហើយជំនាញវិជ្ជាជីវៈនេះ ទ្រទ្រង់សេដ្ឋកិច្ចសង្គមបានរឹងមាំ ព្រោះអ្នករៀនទាំងអស់ត្រូវតែមានការងារធ្វើ និងត្រូវតែមានមុខរបរ”

អគ្គលេខាធិការ នៃរាជ្យបណ្ឌិត្យសភាកម្ពុជា បន្តថា ជំនាញបណ្ដុះបណ្ដាលវិជ្ជាជីវៈ (TVET) នេះ ពិតជាមានសារៈសំខាន់ណាស់ ព្រោះសូម្បីតែប្រទេសជឿនលឿនបំផុតដូចជា​សហរដ្ឋអាមេរិក ប្រទេសនៅអ៊ឺរ៉ុបក៏ដោយ ពេលនេះ TVET នៅតែដើរតួនាទីសំខាន់សម្រាប់ទ្រទ្រង់សេដ្ឋកិច្ចសង្គម ក៏ដូចជាបុគ្គលផ្ទាល់ ។ មានន័យថា រៀន TVET គឺឆាប់មានឱកាសធ្វើការ អាចបង្កើតមុខរបរដោយខ្លួនឯងបាន ហើយ​ជំនាញវិជ្ជាជីវៈ (TVET) នេះ ចំណាយដើមទុនតិច អាចបង្កើតមុខរបរបាន។

លោកបណ្ឌិត យង់ ពៅ អគ្គលេខាធិការ នៃរាជ្យបណ្ឌិតសភាកម្ពុជា

“ឧទាហរណ៍ថា ឥឡូវមនុស្សចូលចិត្តហូបកាហ្វេ ដូចនេះ ការៀនឆុងកាហ្វេដែលមានឱជារសឆ្ងាញ់ ដែលផ្សំដោយសារធាតុល្អ បើកតែតូប ឬហាងលក់កាហ្វេមួយ រៀបចំរចនាហាងឱ្យស្អាតនៅតំបន់ខេត្តទេសចរណ៍គឺនឹងលក់ដាច់ ឬក៏ជំនាញធ្វើម្ហូប ជំនាញជួសជុលយានយន្ត និងជំនាញជាច្រើនទៀតដែលជាឱកាសការងារងាយស្រួលផ្ដល់ឱ្យយុវជនមានការងារធ្វើ និងធ្វើជាថៅកែដោយខ្លួនឯង”

ជាមួយ​គ្នានេះ លោកបណ្ឌិត យង់ ពៅ ក៏បានសំណូមពរ​ទៅដល់យុវជនទាំង​ត្រូវចាប់ឱកាសរៀនពេញមួយជីវិត ដោយកុំគិតថារៀនចប់បរិញ្ញាបត្រ បរិញ្ញាបត្រជាន់ខ្ពស់ ចប់បណ្ឌិត ឬប្រឡងបាននិទ្ទេស A ឬប្រឡងធ្លាក់ហើយក៏ឈប់រៀន ។ លោកថា នោះមិនមែនជារឿងល្អទេ ពោល​គឺមនុស្សទាំងអស់ត្រូវតែរៀនពេញមួយជីវិត ហើយជាមួយ​គ្នា​ក៏​សូមកុំបាក់ទឹកចិត្តប្រសិនបើប្រឡងធ្លាក់បាក់ឌុប ដោយ​យើងអាចរៀនជំនាញវិជ្ជាជីវៈ (TVET)បាន។ ដូចនេះ ទាំងអ្នកប្រឡងបានលទ្ធផលល្អ ឬមិនល្អត្រូវចាប់យកឱកាសរៀនពេញមួយជិវិត និងសម្លឹងមើលការបណ្ដុះបណ្ដាលជំនាញវិជ្ជាជីវៈដែលជាឱកាសល្អបំផុតក្នុងដំណាក់កាលនៃការអភិវឌ្ឍប្រទេស។ លើសពីនេះ ក៏​ត្រូវសម្លឹងមើលនិន្នាការសង្គមដែរ ដោយ​ប្រសិនជាយុវជនពូកែផ្នែកវិទ្យាសាស្រ្ត (STEM) គួរ​ចាប់យក​ខាងបច្ចេកវិទ្យាព័ត៌មានវិទ្យា ព្រោះសង្គមកំពុងត្រូវការធនធានមនុស្សសម្រាប់អភិវឌ្ឍប្រទេសក្នុងយុគ្គសម័យ៤.០នេះ៕