ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឆ្នាំនេះ ក្រសួងអប់រំ យុវជន និងកីឡា គ្រោងនឹងរៀបចំការប្រឡងសិស្សពូកែទូទាំងប្រទេស សម្រាប់ថ្នាក់ទី៩ និងថ្នាក់ទី១២ នាថ្ងៃទី២៧ ខែមេសា ឆ្នាំ២០២៦ខាងមុខ នៅវិទ្យាល័យ ជាស៊ីម សន្ធរម៉ុក រាជធានីភ្នំពេញ។ ដើម្បីជាការលើកទឹកចិត្តបន្ថែមដល់សិស្សពូកែជ័យលាភី ក្រសួងអប់រំបានស្នើដល់សប្បុរសជនឱ្យចូលរួមឧបត្ថម្ភទាំងថវិកា ឬសម្ភារៈ។
ក្រសួងអប់រំ យុវជន និងកីឡា តែងតែរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់ថ្នាក់ទី៩ និងទី១២ ជារៀងរាល់ឆ្នាំ ក្នុងគោលបំណងលើកកម្ពស់គុណភាពអប់រំ និងអភិវឌ្ឍធនធានមនុស្សដែលមានចំណេះដឹង និងជំនាញខ្ពស់។ នៅក្នុងឆ្នាំ២០២៥កន្លងទៅ មានបេក្ខជនចំនួន៣០នាក់ មកពីរាជធានីខេត្តចំនួន១៤ បានជាប់ជ័យលាភី។
សម្រាប់ឆ្នាំ២០២៦នេះ ពិធីបិទ និងចែករង្វាន់ ក្រសួងគ្រោងនឹងរៀបចំធ្វើនៅរសៀលថ្ងៃទី៣០ ខែមេសា ហើយសប្បុរសជនដែលចូលរួមឧបត្ថម្ភ នឹងត្រូវអញ្ជើញឱ្យចូលរួម ដើម្បីទទួលលិខិតថ្លែងអំណរគុណពីក្រសួងអប់រំ យុវជន និងកីឡា។ ដូច្នេះសម្រាប់សប្បុរសជនដែលមានបំណងចង់ចូលរួមឧបត្ថម្ភសម្រាប់រង្វាន់លើកទឹកចិត្តបន្ថែមដល់ជ័យលាភីសិស្សពូកែ សូមទំនាក់ទំនងទៅកាន់នាយកដ្ឋានកិច្ចការប្រឡង ស្ថិតនៅអគារលេខ ១៦៩ មហាវិថីព្រះនរោត្តម រាជធានីភ្នំពេញ ឬទំនាក់ទំនងតាមទូរស័ព្ទ ០៧៧ ៩៩៤ ២០០។
បើតាមប្រកាសរបស់ក្រសួងអប់រំ បេក្ខជនដែលជាប់ជ័យលាភីក្នុងការប្រឡងសិស្សពូកែទូទាំងប្រទេសនេះ នឹងទទួលបានរង្វាន់ និងការលើកទឹកចិត្តពីរាជរដ្ឋាភិបាលផងដែរ ដូចជា ប្រកាសស្តីពីការទទួលស្គាល់សិស្សពូកែដោយឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មួយច្បាប់, មេដាយមួយគ្រឿង សម្រាប់បេក្ខជនជ័យលាភី ចំណាត់ថ្នាក់ពីលេខ១ ដល់លេខ៣ ព្រមទាំងវិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់។
ជាមួយគ្នានេះ ជ័យលាភីសិស្សពូកែពីលេខ១ ដល់លេខ៥ ក៏ទទួលបានជាប្រាក់រង្វាន់តាមចំណាត់ថ្នាក់ ពី ២លាន៣សែនរៀន ដល់ ៣លាន៥សែនរៀល ហើយអាចមានប្រាក់រង្វាន់ ឬវត្ថុផ្សេងៗបន្ថែមទៀតពីសប្បុរសជន៕
