ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គម្រោងកែលម្អការអប់រំកម្រិតមូលដ្ឋាន (BEIP) ដែលជាគម្រោងដ៏សំខាន់មួយ ក្នុងការលើកកម្ពស់មូលដ្ឋានគ្រឹះនៃការរៀនសូត្រសម្រាប់សិស្សនៅបឋមសិក្សា ត្រូវបានដាក់ឱ្យអនុវត្តជាផ្លូវការ កាលពីថ្ងៃទី៩ ខែធ្នូ ឆ្នាំ២០២៥។
គម្រោង BEIP នឹងផ្តល់អត្ថប្រយោជន៍ដល់កុមារចំនួនប្រហែល ១.៧ លាននាក់ តាមរយៈការកែលម្អគុណភាពអប់រំបឋមសិក្សា, ធ្វើឱ្យមានការបន្ថែមគុណវុឌ្ឍិបង្រៀនសម្រាប់គ្រូប្រហែល ៣៧០០០ នាក់ តាមរយៈការប្រឹក្សា ណែនាំ និងគាំទ្របច្ចេកទេស, ពង្រីកការអប់រំកុមារតូចនិងសេវាថែទាំទារកនិងកុមារតូច—សាងសង់ទារកដ្ឋានចំនួន ៦០និងបើកថ្នាក់មត្តេយ្យ ៦០, លើកកំពស់ហេដ្ឋារចនាសម្ព័ន្ធសាលា ដោយសាងសង់បន្ថែមបន្ទប់រៀនប្រមាណ ៩០០ បន្ទប់ និងកែលម្អបណ្ដាញទឹក និងអនាម័យ និងអនាម័យខ្លួនប្រាណ, និងពង្រឹងប្រព័ន្ធគ្រប់គ្រងការអប់រំ ដើម្បីធ្វើឱ្យការសិក្សាមានភាពធន់ និងប្រកបដោយបរិយាបន្នជាងមុន។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការដាក់ដំណើរការជាផ្លូវការគម្រោង BEIP នេះ បង្ហាញពីការបន្តគាំទ្រលើវិស័យអប់រំកម្ពុជា ជាពិសេសផ្តោតយកចិត្តទុកដាក់លើការពង្រឹងការអប់រំកម្រិតមូលដ្ឋាន ការជំរុញ និងពន្លឿនកំណែទម្រង់ការអប់រំ ការពង្រឹងស្ថាប័ន និងការលើកកម្ពស់លទ្ធផលនៃការសិក្សារបស់សិស្សនៅកម្ពុជា។
ឯកឧត្តមលើកឡើងថា ក្នុងអំឡុងមួយទសវត្សមកនេះ រាជរដ្ឋាភិបាលបានចាត់ទុកវិស័យអប់រំជាស្នូល នៃការកសាងមូលធនមនុស្ស ដូចមានបញ្ជាក់ក្នុងយុទ្ធសាស្ត្របញ្ចកោណ ដំណាក់កាលទី១។ តាមរយៈកំណែទម្រង់អប់រំកន្លងមក ក្រសួងសម្រេចបាននូវលទ្ធផលគួរឱ្យកត់សម្គាល់ជាច្រើន ទាំងបរិមាណវិស័យ និងគុណវិស័យ ដូចជា៖ (១) កំណើនសិស្សចូលរៀនគ្រប់កម្រិត កំណើនអត្រាបញ្ចប់ការសិក្សា និងអត្រាបោះបង់ការសិក្សាថយចុះ (២) លទ្ធផលនៃរង្វាយតម្លៃសិក្សាសិស្សបឋមសិក្សាកម្រិតតំបន់ SEA-PLM ឆ្នាំ ២០២៤ បង្ហាញថា សិស្សកម្ពុជាមានពិន្ទុជាមធ្យមផ្នែកអំណានកើនឡើង ៦ពិន្ទុ (២៩០ ក្នុងឆ្នាំ២០១៩ កើនដល់ ២៩៦ ក្នុងឆ្នាំ២០២៤) និងពិន្ទុជាមធ្យមផ្នែកគណិតវិទ្យាកើនឡើង ១២ពិន្ទុ (២៨៩ ក្នុងឆ្នាំ២០១៩ កើនដល់ ៣០១ ក្នុងឆ្នាំ២០២៤)។ ក្នុងចំណោមប្រទេសដែលបានចូលរួមក្នុងរង្វាយតម្លៃ SEA-PLM ទាំងពីរលើក ពិន្ទុផ្នែកអំណាន និង គណិតវិទ្យារបស់សិស្សកម្ពុជានៅតែស្ថិតនៅកណ្តាល ក្នុងលំដាប់ទី៤ (បន្ទាប់ពី វៀតណាម ម៉ាឡេស៊ី និងមីយ៉ាន់ម៉ា)។ ជាមួយគ្នានេះ ក្នុងចំណោមប្រទេសដែលមានពិន្ទុសិស្សកើនឡើង ពិន្ទុរបស់សិស្សកម្ពុជាកើនឡើងច្រើនជាងគេបង្អស់។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ភាគីពាក់ព័ន្ធទាំងអស់ ដែលបានចូលរួមអនុវត្តកំណែទម្រង់វិស័យអប់រំឱ្យសម្រេចបានវឌ្ឍនភាពជាច្រើន ជាពិសេសការចូលគាំទ្រពីសំណាក់មាតាបិតា និងសហគមន៍ ដោយបញ្ជាក់ថា ការប្រកាសដាក់ឱ្យដំណើរការគម្រោង BEIP គឺជាសក្ខីភាពនៃការប្តេជ្ញារបស់កម្ពុជាចំពោះកុមារទូទាំងប្រទេស ដែលនឹងក្លាយជាកម្លាំងពលកម្មនាពេលអនាគត ហើយតាមរយៈគម្រោងនេះ កម្ពុជានឹងកសាងមូលដ្ឋានគ្រឹះសម្រាប់ការបង្កើនការចូលរៀននៅមធ្យមសិក្សា ការអនុវត្តគន្លងអប់រំថ្មីប្រកបដោយប្រសិទ្ធភាព និងការអភិវឌ្ឍមូលធនមនុស្សដើម្បីការអភិវឌ្ឍសេដ្ឋកិច្ចសង្គម។
លោកស្រី Tania Meyer នាយិកាធនាគារពិភពលោកប្រចាំនៅកម្ពុជា មានប្រសាសន៍ថា គម្រោងសហប្រតិបត្តិការរបស់ធនាគារពិភពលោក សម្រាប់កម្ពុជា ឆ្នាំ២០២៥-២០២៩ ត្រូវបានរៀបចំឡើងតាមរយៈការពិភាក្សាទូលំទូលាយ ជាមួយដៃគូរាជរដ្ឋាភិបាល រួមទាំងក្រសួងអប់រំ យុវជន និងកីឡា ក៏ដូចជាអ្នកដឹកនាំវិស័យឯកជន និងតំណាងសង្គមស៊ីវិល ដើម្បីគាំទ្រការអភិវឌ្ឍរបស់កម្ពុជា។ លោកស្រីសង្កត់ធ្ងន់ថា ការពង្រឹងធនធាន មនុស្ស ជាពិសេសការអប់រំមូលដ្ឋាន គឺជាអាទិភាពកម្រិតខ្ពស់មួយក្នុងចំណោមបីគោលដៅទៀត ដែលធនាគារពិភពលោកនឹងត្រូវផ្ដោតអនុវត្ត៕
