ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានសម្រេចដាក់ឱ្យអនុវត្តសាកល្បងនូវ «ជំនាញគណនេយ្យ» ផ្អែកលើតម្រូវការសិក្សា នៅតាមវិទ្យាល័យចំនួន ៦ ស្ថិតក្នុងរាជធានី-ខេត្តចំនួន ៥ ក្នុងឆ្នាំសិក្សា ២០២៦-២០២៧ ខាងមុខនេះ។ នេះបើតាមការបញ្ជាក់របស់ លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។
បើតាមប្រសាសន៍របស់លោកជំទាំវ ឃួន វិច្ឆិកា នៅក្នុងដំណាក់កាលសាកល្បងនេះ ក្រសួងបានជ្រើសរើសគ្រឹះស្ថានសិក្សាចំនួន ៦ នៅក្នុងភូមិសាស្ត្ររាជធានីភ្នំពេញ ចំនួន ២ វិទ្យាល័យ, ខេត្តកណ្តាល ចំនួន ២ វិទ្យាល័យ, ខេត្តកំពង់ចាម ចំនួន ១ វិទ្យាល័យ និងខេត្តបន្ទាយមានជ័យ ចំនួន ១ វិទ្យាល័យ។ ក្នុងការអនុវត្តជំនាញគណនេយ្យនេះ ក្រសួងបានសហការជាមួយសាកលវិទ្យាល័យពាណិជ្ជសាស្ត្រអេស៊ីលីដា ក្នុងការបង្រៀនអនឡាញ និងដឹកនាំអនុវត្តនៅថ្នាក់រៀនដោយគ្រូជំនួយ។
ការដាក់បញ្ចូលជំនាញគណនេយ្យសម្រាប់សិស្សវិទ្យាល័យនេះ គឺស្ថិតនៅក្រោមក្របខ័ណ្ឌនៃ «គន្លងអប់រំថ្មី» នៅកម្រិតមធ្យមសិក្សាទុតិយភូមិ (ចាប់ពីថ្នាក់ទី១០ ដល់ទី១២) ដែលជាកិច្ចសហការរវាងក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ។ បើតាមលោកជំទាវ ឃួន វិច្ឆិកា ជំនាញគណនេយ្យនេះ មានសិស្សចាប់អារម្មណ៍ច្រើន។
នៅក្នុងឆ្នាំសិក្សា២០២៥-២០២៦នេះ ក្រសួងអប់រំ យុវជន និងកីឡា បានសាកល្បងអនុវត្តគន្លងអប់រំថ្មី ដែលមានគន្លងវិទ្យាសាស្ត្រ គន្លងវិទ្យាសាស្ត្រសង្គម និងគន្លងវិជ្ជាជីវៈ នៅតាមគ្រឹះស្ថានសិក្សាចំនួន ៤៩រួចមកហើយ ដើម្បីបើកច្រកដល់អ្នកសិក្សាឱ្យមានជម្រើសកាន់តែច្រើន ក្នុងការសម្រេចចិត្តរៀបចំផែនការសិក្សា ជ្រើសរើសផ្លូវសិក្សា និងផែនការអាជីព សមស្របតាមលក្ខណៈសម្បត្តិផ្ទាល់ខ្លួន ឧបនិស្ស័យ សមត្ថភាពពីកំណើត និងចំណូលចិត្តរបស់បុគ្គលម្នាក់ៗ ក្នុងន័យអភិវឌ្ឍមូលធនមនុស្សប្រកបដោយបរិយាបន្ន និងភាពធន់៕
