ក្រោយការប្រកួតជជែកដេញដោលលើប្រធានបទជាច្រើនរបស់បេក្ខជនទាំង៨ក្រុម ក្នុងវគ្គជម្រុះជុំទី៣, ទីបំផុតអគ្គនាយកដ្ឋានយុវជន នៃក្រសួងអប់រំ យុវជន និងកីឡា បានរកឃើញបេក្ខជន៤ក្រុម បន្តទៅកាន់វគ្គពាក់កណ្តាលផ្តាច់ព្រ័ត្រក្នុងកម្មវិធីជជែកដេញដោលយុវជនថ្នាក់ជាតិ២០២៥។

បេក្ខជនទាំង៤ក្រុម ដែលនឹងបន្តទៅកាន់វគ្គពាក់កណ្តាលផ្តាច់ព្រ័ត្រក្នុងកម្មវិធីជជែកដេញដោលយុវជនថ្នាក់ជាតិ២០២៥ រួមមាន ១.វិទ្យាល័យ សម្តេចតេជោ ហ៊ុនសែន សំពៅលូន ខេត្តបាត់ដំបង, ២.វិទ្យាល័យពោធិ៍សាត់ ខេត្តពោធិ៍សាត់, ៣.សមាគមកាយឫទ្ធិនារីកម្ពុជា និង៤. វិទ្យាល័យ ហ៊ុន សែន ប្រាសាទបាគង ខេត្តសៀមរាប។

ក្នុងពិធីបើកការប្រកួតវគ្គជម្រុះជុំទី៣ នៃកម្មវិធីជជែកដេញដោលយុវជនថ្នាក់ជាតិ២០២៥ ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍អំពាវនាវដល់ថ្នាក់ដឹកនាំមន្ទីរអប់រំ យុវជន និងកីឡា ការិយាល័យយុវជននៃមន្ទីរ ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ គណៈគ្រប់គ្រងសាលារៀន និងគ្រប់ភាគីពាក់ព័ន្ធទាំងអស់ បន្តជំរុញការអនុវត្តកម្មវិធីជជែកដេញដោលយុវជននេះបន្ថែមទៀតនៅតាមសាលារៀន ដើម្បីផ្តល់ឱកាសកាន់តែច្រើនដល់សិស្សានុសិស្សក្នុងមូលដ្ឋាន ក្នុងការអភិវឌ្ឍសមត្ថភាព លើបំណិនស្រាវជ្រាវ បំណិននិយាយជាសាធារណៈ បំណិនការងារជាក្រុម បំណិនវិភាគ និងសំយោគមតិ ការបញ្ចេញមតិប្រកបដោយសន្តិសហវិជ្ជមាន ផ្អែកលើមូលដ្ឋានព័ត៌មានច្បាស់លាស់។

ឯកឧត្តម សេរី ជំនះ ក៏បានសំណូមពរដល់លោកគ្រូ អ្នកគ្រូដែលជាគ្រូដឹកនាំ និងគ្រូបង្វឹក និងសិស្សានុសិស្សជាបេក្ខជនទាំងអស់ បន្តការយកចិត្តទុកដាក់ បន្តដំណើរជាមួយគណៈកម្មការរៀបចំរបស់អគ្គនាយកដ្ឋានយុវជនជាបន្តបន្ទាប់ តាមនីតិវិធី និងដំណាក់កាលនីមួយៗ រហូតដល់ការប្រកួតវគ្គផ្ដាច់ព្រ័ត្រ ដែលគ្រោងនឹងធ្វើនៅថ្ងៃទី២៨ ខែកក្កដា ឆ្នាំ២០២៥ខាងមុខនេះ។

គួរបញ្ជាក់ថា កម្មវិធីជជែកដេញដោលយុវជនថ្នាក់ជាតិ ត្រូវបានរៀបចំឡើងក្នុងគោលបំណងបណ្តុះបណ្តាលសមត្ថភាពយុវជនកម្ពុជា លើបំណិនសតវត្សរ៍ទី២១ ពោលគឺពង្រឹងបំណិនស្រាវជ្រាវ បំណិនត្រឹះរឹះពិចារណា នវានុវត្តន៍ ការនិយាយជាសាធារណៈ មូលដ្ឋានចំណេះដឹង ឌីជីថល ការដោះស្រាយបញ្ហា ការធ្វើការងារជាក្រុម ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីក្លាយខ្លួនជាពលរដ្ឋល្អដែលមានទំនួលខុសត្រូវក្នុងសង្គមជាតិ៕