នៅពាក់កណ្តាលខែកុម្ភៈ នេះ ពោលគឺនៅក្នុង​ឱកាស​សន្និសីទ និង​ពិព័រណ៌​បច្ចេកវិទ្យាអប់រំ​កម្ពុជា​លើកទី១ ក្រសួងអប់រំ យុវជន និងកីឡា គ្រោង​នឹងប្រកាស​ជាផ្លូវការ ក្នុង​ការ​ដាក់​ឱ្យ​ប្រើប្រាស់​សាលាឌីជីថល ដែល​វាក៏នឹងជំរុញ​ឱ្យ​សាលា​រៀនទាំងអស់​នៅទូទាំង​ប្រទេស​ប្រើប្រាស់​បច្ចេកវិទ្យា ដើម្បី​លើក​កម្ពស់​ការ​រៀន និង​បង្រៀន។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា សាលាឌីជីថល គឺជាថ្នាលសិក្សាមួយដែលក្រសួងអប់រំ បានរៀបចំឡើងដើម្បីចែករំលែកនូវព័ត៌មាន ឯកសារបង្រៀនជាសៀវភៅ ឯកសារជាសំឡេង និងវីដេអូ ដែលសិស្សានុសិស្សអាចទាញយកមកមើលបាន។ ហើយកម្មវិធីនេះ លោកគ្រូ អ្នកគ្រូ ក៏ អាចទាញយកបានដើម្បីចែករំលែកទៅដល់សិស្សានុសិស្សផងដែរ។

ដើម្បី​ឱ្យ​ការ​ប្រើប្រាស់សាលាឌីជីថល​កាន់តែទូលំទូលាយថែមទៀត បើតាមការ​បញ្ជាក់អ្នកនាំពាក្យក្រសួងអប់រំ ក្រៅពីការផ្សព្វផ្សាយទូលំទូលាយដែលសិស្សានុសិស្សអាចទាញយកនៅទីកន្លែងដែលមានអ៊ីនធើណិតបាន​ ក្រសួងក៏បានបញ្ជូលជា ឯកសារជាទម្រង់ឌីជីថល (Soft Copy) និងបានជំរុញឱ្យមន្ទីរអប់រំ យុវជន និងកីឡា ក៏ដូចជាការិយាល័យអប់រំស្រុក និងគណៈគ្រប់គ្រង រៀបចំឱ្យមានឯកសារទាំងនេះនៅក្នុងបន្ទប់កុំព្យូទ័រនៅក្នុងសាលារៀន ឬបណ្ណាល័យ ធ្វើយ៉ាងណាដើម្បីឱ្យសិស្សានុសិស្សអាចចូលទៅសិក្សា និងអានឯកសារទាំងអស់នោះបាន។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា បានបង្ហាញការគាំទ្រចំពោះការដាក់ឱ្យប្រើប្រាស់សាលាឌីជីថល ដើម្បីដើរឱ្យទាន់ការវិវត្តិន៍របស់សង្គមជាតិ។​ តែយ៉ាងណាសម្រាប់បណ្ឌិត យង់ ពៅ ប្រសិនបើមានសាលាឌីជីថលហើយ ក៏ត្រូវតែគិតគូក្នុងការ​បំពាក់ឧបករណ៍ឌីជីថលឱ្យបានគ្រប់គ្រាន់នៅតាមសាលារៀនទាំងអស់ ដើម្បីជួយសម្រួលដល់ការរៀន និងបង្រៀន ជាពិសេសជំរុញឱ្យមានមនុស្សឌីជីថល ដោយ​មានន័យថា ទាំងគ្រូបង្រៀន និងសិស្ស ចេះប្រើប្រាស់ឌីជីថល។

សូមបញ្ជាក់ថា សាលាឌីជីថល (sala.moeys.gov.kh) គឺជាសាលានិម្មិតនៅលើប្រព័ន្ធឌីជីថលសម្រាប់សិស្សានុសិស្ស គ្រូបង្រៀន អ្នកជំនាញ សាធារណជន ទូទៅ ធ្វើការចែករំលែកចំណេះដឹងទៅកាន់អ្នកសិក្សាដទៃទៀត។ ថ្នាលឌីជីថលមួយនេះ ផ្ដល់ភាពងាយស្រួលដល់គ្រឹះស្ថានសិក្សា គ្រូបង្រៀន និងសាធារណជនទូទៅក្នុងការបង្កើតសាលារៀននិម្មិត និងបង្កើតវគ្គសិក្សានានា សម្រាប់សិស្សានុសិស្សចូលធ្វើស្វ័យសិក្សាដោយសេរីមិនគិតថ្លៃ គ្រប់ពេលវេលា និងទីកន្លែង។

មកដល់បច្ចុប្បន្ន សាលាឌីជីថល មានអ្នកចូលទៅប្រើប្រាស់ប្រមាណជិត១០ម៉ឺននាក់ ដោយមានសៀវភៅជិត៥ពាន់ក្បាល និង២៣៨មេរៀន៕