ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបសម្តែងការគួរសម និងពិភាក្សាការងារជាមួយ គណៈប្រតិភូសមាគមជប៉ុន-កម្ពុជា (Japan-Cambodia Association) កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការបើកវិទ្យាស្ថានភាសា AIWA នៅរាជធានីភ្នំពេញ ដែលជាផ្នែកមួយនៃគម្រោងរបស់វិទ្យាស្ថាន AIWA និងសមាគមជប៉ុន-កម្ពុជា គឺជាជំហានដ៏សំខាន់មួយក្នុងការផ្តល់ឱកាសអប់រំដ៏សំខាន់ដល់យុវជនកម្ពុជា ដោយវិទ្យាស្ថានភាសាAIWA មិនត្រឹមតែផ្តល់ការបណ្តុះបណ្តាលភាសាជប៉ុនប៉ុណ្ណោះទេ ប៉ុន្តែថែមទាំងផ្តល់ជំនាញបច្ចេកវិទ្យាព័ត៌មាន (IT) និងជំនាញវិជ្ជាជីវៈផ្សេងទៀត ដែលកំពុងមានតម្រូវការខ្ពស់។
រដ្ឋមន្ត្រីក្រសួងអប់រំ បន្ថែមថា គំនិតផ្តួចផ្តើមនេះនឹងជួយគាំទ្រក្នុងការផ្តល់សក្តានុពលពេញលេញដល់យុវជនកម្ពុជា និងជាពិសេសបង្កើតផ្លូវសម្រាប់ឱ្យពួកគាត់ ទទួលបានការងារដែលមានប្រាក់ខែខ្ពស់ ទាំងនៅប្រទេសកម្ពុជា និងនៅប្រទេសជប៉ុន។
ឯកឧត្តម Takahashi Fumiaki ប្រធានសមាគមជប៉ុន-កម្ពុជា មានប្រសាសន៍ថា ជាចក្ខុវិស័យរបស់ វិទ្យាស្ថានភាសា AIWA នៃប្រទេសជប៉ុន មានបំណងចង់បង្កើតសាលារៀនក្នុងរាជធានីភ្នំពេញ ដើម្បីជួយគាំទ្រដល់វិស័យអប់រំ។ ជាពិសេសផ្តល់ឱកាសដល់សិស្សានុសិស្សកម្ពុជា អាចស្វែងរកការងារដែលប្រាក់ខែល្អសមរម្យក្នុងក្រុមហ៊ុនជប៉ុន ទាំងក្នុងប្រទេសកម្ពុជា និងនៅក្នុងប្រទេសជប៉ុនផ្ទាល់។
ប្រធានសមាគមជប៉ុន-កម្ពុជា ក៏បានបង្ហាញសេចក្តីរីករាយដែលមានឱកាសចូលជួបពិភាក្សាការងារជាមួយ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក្នុងគោលដៅពង្រឹងទំនាក់ទំនងទ្វេភាគី និងកិច្ចសហប្រតិបត្តិការបន្ថែម ដើម្បីបង្កើនគុណភាពអប់រំ និងឱកាសការងារក្នុងប្រទេសកម្ពុជា។
គួរជំរាបជូនថា ទាកទិននឹងការបើកវិទ្យាស្ថានភាសា AIWA នៃប្រទេសជប៉ុននៅរាជធានីភ្នំពេញ រដ្ឋមន្ត្រីក្រសួងអប់រំ បានពន្យល់ពីដំណើរការនៃការបើកសាលារៀនក្នុងប្រទេសកម្ពុជាដល់គណៈប្រតិភូ ដែលមានលក្ខន្តិកៈមួយចំនួនត្រូវអនុវត្តតាម និងបានផ្តល់ជម្រើសប្រភេទសាលារៀនក្នុងការជ្រើសរើស ដូចជា ការបើកសាលាជាលក្ខណៈឯកជនផ្ទាល់ ឬអាចចាប់ផ្ដើមពីការសហការជាមួយសាកលវិទ្យាល័យមួយចំនួនក្នុងទីក្រុងភ្នំពេញជាដើម៕
